Home Gobierno Gobierno ta bay tin consulta grandi cu tur gremio Diaranson awor den...

Gobierno ta bay tin consulta grandi cu tur gremio Diaranson awor den cuadro di e condicion nobo di Hulanda

641
0
SHARE
- Advertisement -

Evelyn Wever-Croes a anuncia

*”E gobierno aki no ta bay permiti ningun forsa aheno”

ORANJESTAD (AAN): Un ley di Reino ta un ‘rijkswet’ cu ta un ley di consensus y no ta algo cu por wordo imponi, asina Prome Minister Evelyn Wever-Croes a declara dialuna mainta ora cu el a haci e anuncio cu Rijksministerraad a pone un condicion extra pa Aruba por haya su di tres fiansa.

E condicion aki ta un ley di Reino (Rft) cu Aruba mester bay di acuerdo cu ne. Si Aruba no bay di acuerdo cu ne diabierna awor Aruba no lo haya e fiansa cu tin mester.

E mandatario a splica cu ta trata di un ‘rijkswet’ y Aruba tin e opcion pa no acept’e, pero mirando cu Aruba ta lomba contra muraya, si Aruba no ta acepta e condicion aki e ora no ta haya e 204 miyon florin cu yuda resolve e necesidad financiero di gobierno pa e proximo tres lunanan.

 Esaki ta un presion cu e mandatario ta haya inaceptabel, pero lo sigui traha riba dje den e dianan aki, a bisa.

A pidi Knops pa pone tur cos riba papel. Pa gobierno di Aruba e asunto aki ta di un embergadura nacional y e decision mester wordo tuma conhuntamente cu stakeholders. Mester haya sa kico ta e entidad, kico ta e Rft y kico ta e beneficionan, e remarca.

CONSULTA CU GREMIO

Ya caba e stipula cu pa diaranson awor ta bay tin un consulta grandi cu tur gremio incluyendo Parlamento. Ta invitando tur gremio pa e consulta aki.

Diadomingo caba a cuminsa cu un ronda di consulta cu stakeholders pa compronde mihor unda ta para y kico ta e opcionnan, Prome Minister Evelyn Wever-Croes a remarca.

    Prome cu tuma un decision ta bay tin e consulta aki, “pasobra e decision aki Gobierno no ta bay tum’e su so”, e mandatario a indica.

BENEFICIONAN VS. AUTONOMIA

Un di e cosnan cu Secretario di Estado Knops a bisa ta cu un beneficio importante ta cu si ta cay bao di e regimen aki den futuro tur fiansa ta na cero porciento. Esey naturalmente, Wever-Croes a bisa, ta un beneficio pa Aruba, pero tin e debenan anterior tambe.

Si Hulanda tuma tur e debenan manera nan a haci cu Corsow y Sint Maarten, por pens’e. Si nan bisa cu no ta bay tuma tur e debe pero refinancia tur e debe na cero porcierto, e ora por pensa, e mandatario a señala, pero mester sa prome kico e ta y con esaki ta afecta autonomia di Aruba, con ta afecta e posicion economico y macro-economico di e pais.

“E gobierno aki no ta bay permiti ningun forsa aheno. Ni Hulanda, pa destrui nos economia manera nan a haci cu Corsow y cu Sint Maarten”, a expresa.

 Te cu dialuna mainta gobierno no a haya nada riba papel for di Secretario Knops y tin tres dia mas di trabao prome cu e reunion di Rijksministerraad diabierna.

Asina cu tin mas informacion lo trece esaki dilanti y lo bay den consulta cu e gremionan y cu parlamento riba e tema aki, e mandatario a expresa.

El a pidi pa keda cu cabes friu pa atende cu esaki y pa laga wak prome cu kico Hulanda ta bin. Un bes cu compronde e bentahanan y e desbentahanan, e ora por forma un opinion, a agrega.  

- Advertisement -

DUNA COMENTARIO

Please enter your comment!
Please enter your name here