Home Salud Fundacion BOB ta pidi hendenan muher pa yama y haya cita pa...

Fundacion BOB ta pidi hendenan muher pa yama y haya cita pa haci mamografia

172
0
SHARE
- Advertisement -

Dianta Nuesch, Manager di mercadeo

ORANJESTAD (AAN) – E Manager di Mercadeo di Stichting BOB, Dianta Nuesch, a expresa cu e fundacion ta hopi contento cu nan ta habriendo aworaki pa publico, despues di a keda cera pa un periodo largo y fastioso, y el a informa cu e personanan ya por tuma contacto cu BOB, pa traha cita.

Mescos cu hopi otro instancia BOB mester a cera porta, pero nan a keda traha riba nan protocol di higiene y salud, y aworaki nan ta dunando servicio na e damanan cu ta bin haci mamografia.

BOB tin un protocol nobo cu un tiki cambio. Por ehemplo, e damanan tin cu yama e fundacion pa traha nan cita. Prome, nan tabata wordo invita door di un carta cu BOB tabata manda, pero esaki no ta sosode mas pa evita cu hopi dama ta bin na mesun tempo na BOB.

Esaki ta e prome stap. E di dos ta pa e señoranan bin cu nan mondkapje bisti caba y uza nan hand sanitizer. Di tres, ta cu ora e cita ta confirma yega na ora stipula. Ni mucho mas tempran ni mas laat, pa evita cu hopi mas señora ta bin warda nan beurt.

Dianta Nuesch ta pidi tur e damanan cu ta bay haci e test pa prome biaha, cu si nan ta entre 45 pa 65 aña di edad, tuma contacto cu Fundacion BOB pa traha nan cita.

Door di yamada di e cliente BOB por confirma cu nan lo bin sigur, na e ora stipula. Nuesch a señala cu esey ta hopi importante awor, pasobra nan tin cu planea, na un manera hopi efectivo, cu BOB por haya suficiente cliente den e dia y yuda mas hende posible, pero tambe pone tempo meymey di cada persona, pa haci un limpieza completo.

Nuesch a remarca cu BOB kier haci tur dama pa tuma responsabilidad. E servicio di control di pecho semper BOB a dune, pero awor nan ta pidiendo cu si nan no a wordo yama, pero nan sa cu tin cu haci e control (pasobra e ta un biaha den cada dos aña tin derecho pa hacie), por fabor tuma contacto cu BOB y traha e cita.

El a subraya cu ta hopi importante pa tur dama sa si su pechonan ta saludable. Pesey e ta reitera pa “traha bo cita”.

 El a agrega cu BOB ta trahando riba un website cu ta hopi mas moderno, via cual e clientenan por registra tambe pero e ta un trabao den proceso. 

Finalmente, Dianta Nuesch a menciona cu BOB ta hopi activo riba su facebook page, y cu aki por haya hopi informacion tocante tur loke tin di haber cu cancer di pecho.

 

- Advertisement -

DUNA COMENTARIO

Please enter your comment!
Please enter your name here