Home Hudicial Fiscal ta exigi 2 aña di prison pa homber sospecha di a...

Fiscal ta exigi 2 aña di prison pa homber sospecha di a viola dama

247
0
SHARE
- Advertisement -

Abogado mr. Illes ta remarca cu no tin ningun prueba y tampoco DNA contra e sospechoso

ORANJESTAD (AAN) – Ayera mainta e homber F. a presenta den sala di Corte di Husticia pa e casonan penal cu Ministerio Publico a cuminsa contra dje. Tratamento di e caso a dura hopi. Den e articulo aki, DIARIO ta publica e caso di violacion di un dama. Den un otro articulo DIARIO lo publica e otro caso cu ta relaciona cu priva un hende di su libertad cu ta wordo considera como secuestro. 

VIOLA DAMA

E caso di violacion a sosode 22 September 2018, caminda e dama N. a haci denuncia. E dama a bisa cu el a bay un club nocturno y a bay cu un amigo na Eagle Beach caminda nan a tene relacion sexual.

Despues el a bay bek e club nocturno y a topa un otro amigo y a bay den toilette di e club y nan a tene relacion sexual. Seguridad di e club a bati na e porta pa nan sali. Segun e dama, nan a sali bay for di e club nocturno y el a bay na su auto caminda el a wordo acerca pa un homber kende despues a resulta di ta F. E dama a declara na Polis cu F. lo a bis’e cu un hende a filma ora e dama a tene relacion sexual riba beach y cu tin hende cu por pone esey riba facebook. E homber F. a bisa e dama pa nan bay na e beach pa asina e wak si por gara e homber.

     E dama, kende tabata tur spanta cu el a wordo filma a bay di acuerdo y den su auto nan a bay na e beach. Segun e dama, F. a tene relacion cun’e pretendiendo cu asina lo por gara e homber pero esey no tabata asina. E tabata un gañamento di F. segun e dama. E dama a rabia y a pusha F. y nan a bay. bek na e club nocturno. E dama a bay serca un amigo y a cont’e loke a sosode. E amigo a yama Polis mientras cu N. a bay hospital. N. a conta su mama kico a sosode. E dama lo a reconoce F. ora cu F. lo tabata busca manera drenta contacto cun’e via Instagram.

    El a mustra Polis e potret y asina a detene F. Despues F. a wordo laga liber pendiente di e caso penal.  Hues a mustra cu F. a duna muestra di DNA pasobra e ta para riba cu e no a haci nada. Instituto Forence na Hulanda a constata cu den e dama tabatin DNA di dos homber pero no di F.

   Den Corte, F. a admiti cu e tabata den e club nocturno y a bay baño. El a ripara cu tin un pareha tabata tene relacion sexual. Segun F. e no conoce e dama y no a haci nada. El a mira e pareha ta discuti y a filma esaki y saca potret. Su sobrino a bis’e kende e dama ta y e ora ey el a haci peticion pa amistad via Instagram. Segun F. na e club nocturno tin hopi muher di bida ta bay. Hues a mustra cu via camera di seguridad a mira F. ta sigui e pareha.

DEMANDA

Abogado mr. de Sousa cu a representa e dama N., a splica cu N. a keda traumatisa y ta keda cu miedo. No por drumi drechi anochi. Door di e incidente aki el a stop di bay school y hasta a stop di traha part time. El a bolbe bay dokter di cas y awor e mester bay psicologo pa haya tratamento. E abogado a demanda na daño inmaterial 35 mil florin. Tambe e ta calcula perdida di entrada 15 mil florin.

 

EXIGENCIA DI FISCAL

Fiscal ta haya cu tin prueba di violacion. El a mustra cu tin declaracion di e victima, tin imagennan di camera y tambe declaracion di testigo cu a mira N. hopi emociona. Fiscal a mustra riba sentencia di Corte Supremo cu e hecho si e persona despues di e incidente ta hopi emocional por wordo usa como prueba. Na opinion di Fiscal, F. ta un homber grandi y tabata un bouncer. Tur esaki ta crea e situacion cu e dama tabata bou presion.

Fiscal a bisa cu e ta haya e demanda di daño demasiado halto. E ta demasiado complica pa atende den un caso penal. El a pidi pa declara e demanda no admisibel. El a aproba 3500 florin di daño y e resto lo por haci un caso civil. Fiscal ta pensa cu F. tabata na beach y a mira tur cos y a bay na e club y a gaña e dama pa e tin un relacion sexual cun’e. Fiscal a exigi 24 luna di prison, kitando e tempo cu F. tabata sera.

 

DEFENSA

Mr. Illes a mustra cu F. ta para riba cu e no a haci esey. Na opinion di mr. Illes, F. no a papia, ni tabata den auto cu e dama. No por bay insinua cosnan pakico esaki sosode. E abogado a bisa cu no tin prueba cu ta F. a viola e dama. No ta asina cu F. lo tabata na e beach y lo a filma e dama tin relacion sexual manera Fiscal ta pretende. No tin ningun prueba. El a bisa cu a laga check con F. tabata core e anochi y ningun momento e tabata na Eagle Beach. F. no tabata sa nada di e relacion cu N. tabatin. Mas laat tampoco F. tabata na Eagle Beach. Pa loke ta DNA, F. a coopera pa laga tuma muestra y no a haya nada. E abogado a remarca cu si enberdad ta manera e dama ta bisa cu tabatin penetracion, lo mester a haya DNA di F., cual no tabata asina.

   E investigacion di DNA ta mustra cu dos homber lo tabatin relacion cu e dama pero no F. No a haya ningun fingerprint ni DNA di F. na auto di e dama. No tin santo di laman den e auto. No tin nada cu ta mustra cu F. tabata den auto di e dama. Abogado a mustra cu e dama no tabata duna declaracion consistente. E no a bisa su mama cu e tabatin relacion cu otro homber promer. Tambe el a bisa cu a filma na beach y otro biaha ta bisa cu lo a filma den baño.

    E abogado no ta haya cu tin suficiente prueba. El a remarca cu tur e pruebanan ta basa riba loke e dama a bisa y no tin prueba di sosten. E abogado a bisa cu Hues mester mira declaracion confiabel di e victima y pruebanan di sosten. E no ta haya cu tin esakinan. E abogado ta haya cu mester declara F. liber di violacion y rechaza e demanda di daño.

   Hues a sera tratamento di e caso y a bisa cu e ta bay studia e caso y dia 25 Juni 2020 pa 8.15 lo tin sentencia.

 

- Advertisement -

DUNA COMENTARIO

Please enter your comment!
Please enter your name here