Home Hudicial Fiscal a exigi 6 aña di prison pa homber cu a abusa...

Fiscal a exigi 6 aña di prison pa homber cu a abusa tres mucha muher di su famia

3245
1
SHARE
- Advertisement -

ORANJESTAD (AAN): Diabierna mainta e homber di inicialT., a scucha Fiscal exigi 6 aña di prison p’e.

   Fiscal ta hay’e culpable di a abusa di tres mucha muher famia menor di edad durante un periodo largo. Tratamento di e caso aki a dura basta. DIARIO den e articulo aki ta publica e tratamento di e caso y exigencia di Fiscal. Den un otro articulo ta publica e defensa di abogado.

   HUES DI CURACAO:

   Ta asina cu un Hues di Curacao a bin Aruba special pa trata e caso aki. Esaki debi na e hecho cu T. ta famia di un miembro di Corte di Husticia. Ora tin situacionnan asina, ta laga un Hues di Curacao bin atende e caso pa mustra e imparcialidad di Corte di Husticia.

   Por a ripara cu e Hues a keda sorprendi con bon e medidanan di prevencion pa cu Corona Virus ta den sala di Corte di Husticia.

   ABUSO DI MUCHANAN:

   Hues a puntra T. di e acusacionnan y el a bisa cu e ta inocente. Hues a bisa cu tin algun persona ta bisa cu si T. a abusa. Hues a mustra cu e dos muchanan a conta e mesun cos, esta cu durante un periodo largo den camber di T., unda nan tabata haci huiswerk, nan tabata worde molestia. T. a bisa cu nan tabata usa su camber pa haci huiswerk y e tabata repasa e lesnan cu nan. Segun T. tin diferente muchanan tabata haci huiswerk.

   E acusado T. a desmenti categoricamente cu el a mishi cu e muchanan na nan partinan intimo. Hues a mustra cu un di e muchanan tin 8 y e otro 11 aña. Tin un otro mucha cu a bisa kico e sa y durante interogacion di Hues Comisario el a bisa cu e tambe a worde abusa door di T.

   T. ta keda para riba cu e no a haci nada. El a splica Hues cu e tin bon relacion cu tur e muchanan y nan famianan. Nunca el a pensa cu nan ta acus’e di algo asina. El a remarca, con por ta cu nan ta acus’e di algo asina y nan ta asina sera cun’e.

   Hues a bisa cu e muchanan a conta cu nan tabata bay tur dia na e cas di nan oma y tabata haci huiswerk den e camber. E muchanan tabata bisa cu T. tabata mishi cu nan parti intimo y hasta cu T. a kita su paña y a penetra nan. T. a desmenti esaki categoricamente.

   Hues a bisa cu e muchanan tabata bisa cu nan a mira con T. tabata haci cu otro. Tambe Hues a mustra cu e muchanan a bisa cu T. tabata sera e porta di camber na yabi ora e tabata mishi cu nan. Segun T. no ta tur ora e porta tabata sera na yabi. El a bisa cu sa sera e porta na yabi pa otro muchanan mas chikito no bay molestia e muchanan ora nan haci huiswerk.

    POTRETNAN PORNO:

E muchanan a bisa cu riba cellular di T. a mira potretnan porno. T. a splica cu amigonan ta manda potret p’e y e muchanan ta mishi cu su cel. El a desmenti cu e tabata mira e potretnan hunto cu e muchanan.

   Hues a remarca cu e ta haya straño cu T. ta laga e muchanan mira den su cel sabiendo cu e tin potretnan porno. T. a bisa Hues cu e tabata confia cu e muchanan no ta bay wak e potretnan sino ta wak weganan riba cel.

   Hues a remarca cu aki no ta cuestion di confia sino cu mester evita di haci esaki. Hues a bisa cu e muchanan a bisa cu mientras cu tabata mira e potretnan porno, T. tabata mishi cu nan.

    SOSPECHOSO DESMENTI:

   Hues a bisa cu a yega di acusa T. den pasado cu a abusa di mucha familiar pero e no a worde persigui pasobra a resulta cu e tabata storia di mucha. Segun T., awor despues di 16 aña e ta compronde pakico a gaña riba dje. El a bisa cu su ex amiga a haci esaki door di rabia contra dje.

   Hues a mustra cu e mama di e dos muchanan a bisa cu T. a abusa di e confia cu nan tabatin den dje y nan ta hayando tratamento di psycologo. Tin un di e muchanan a keda sinta door di esaki. Mama di dos di e muchanan a demanda 5 mil Florin pasobra e no por a traha.

   E mama di e otro mucha a mustra cu e caso aki a afecta nan tambe y nan tambe ta siguiendo tratamento di psycologo. Tambe e mama ta demanda 5 mil Florin.

   EXIGENCIA DI FISCAL:

   Fiscal a bisa cu e muchanan tabata bay na nan oma, señora di T. pa asina haci huiswerk mientras cu nan mayornan tabata traha. Den camber di T. nan tabata haci huiswerk. T. ta worde acusa di a abusa di e muchanan pa periodo largo, mas o menos 2 aña. Fiscal a mustra cu T. tabata sera e porta di e camber na yabi. E muchanan no tabata kier a bisa nada door di miedo.

   Despues di hopi insistencia, nan a cuminsa papia. Ambos mucha a mira con T. tabata mishi cu nan y a penetra nan.

   Fiscal a bisa Hues cu e no ta haya legalmente proba e penetracion sexual y ta pidi Hues pa declara T. liber di esaki. Fiscal a mustra cu tin un di tercer mucha famia, cu tambe tabata victima y a mira con T. tabata mishi cu e otro dos.

   Fiscal ta haya cu ademas di e pruebanan aki, tin prueba di sosten. El a remarca cu e hecho cu den pasado a gaña riba T. y tabata denuncia falso, e biaha aki no ta asina. Fiscal ta haya cu T. ta culpable. Pa loke ta e demandanan, e mamanan ta mustra cu e muchanan a keda traumatisa.

   Fiscal a pidi Hues pa aproba e demandanan di daño y aplica e medida di pago. Pa cu e castigo, Fiscal a tene cuenta cu e muchanan a keda afecta. E ta haya cu T. a abusa di e confianza cu e muchanan tin den nan opa. El a tuma T. na malo pa esaki y a exigi 6 aña di prison.    Hues a sera tratamento di e caso y a bisa cu dia 3 Juli 2020 pa 8:15 am lo tin sentencia.

- Advertisement -

1 COMMENT

  1. Hopi bon SI Ta 6 aña pa cada un. Banda di mi cas ta biba un di e pedifielnan cu a abusa di su mesun jiu. Wel mi nietonan Sa bon bon p keda leuw di e cas y tambe e motibo.

DUNA COMENTARIO

Please enter your comment!
Please enter your name here