Entrega hospital dor di Soga ta exigi investigacion

    695
    0
    SHARE
    - Advertisement -

    Mester conclui investigacion criminal den laboratorio tambe 

    *Parlamento mester splica debe di mas cu 700 Biyon pa 29 aña

    *Duda grandi ta exigi un rapport financiero prome cu entrega

    ORANJESTAD (AAN) — Siman pasa a wordo anuncia cu Soga ta cla pa entrega hospital na Gobierno.  E coronavirus nobo, a kita atencion for di e batatanan cayente cu mester a wordo atendi den seno di hospital.

    Uno di e casonan cu mester wordo atendi ainda y pa cual pueblo mester haya un contesta sigur ta e acto criminal cu a tuma luga den laboratorio di Hospital, caminda dos miembro di personal cu a wordo geschors y awor lo ta retira, lo a haci nan mes culpabel di estafa cu paptest.

    Informacionnan cu DIARIO tabata presenta, tabata mustra cu alrededor di 4000 persona cu a bay check si nan por tin cancer, a wordo perhudica dor cu a comete estafa cu e testnan cu nunca a bay un laboratorio.

    Aki ta trata di un crimen contra bida di hende. Lo tabata tin un rapport pa wordo publica y cu DIARIO a anuncia cu tabata na caminda, momento cu otro situacionnan a rementa den hospital manera e cyber attack y despues Covid-19.

    Hopi asunto importante den henter e construccion di hospital a tranca y sigur na momento cu Covid-19 a presenta y hospital a haya hasta ayudo di Hulanda.

    E ayudo aki no por wordo uza como parti di e proyecto Hospital, cu tabata uno di e proyectonan dudoso di e proyecto total di Bo Aruba, cu e parlamento anterior cu a sostene e gobierno di AVP den Parlamento, a entrega gobierno Mike Eman sin vigila y controla loke tabata pasa cu e pot di Un Biyon.
    E rapport di Algemene Rekenkamer Aruba di Maart 2018 si ta papia di un situacion, cu hunto cu preocupacionnan di personal di hospital, awor sigur ta motibo pa Parlamento splica Pueblo kico ta bay pasa.

    Segun informantenan, prome cu Soga entrega e proyecto na gobierno, mester tin claridad di kico ta papia ya cu ta di sumanan enorme di placa ta papia.

    Segun e rapport di Algemene Rekenkamer Aruba, e suma cu originalmente lo a wordo hinca den hospital lo tabata 283 Miyon, cu realmente tabata un inversion di 287 Miyon.

    Den e suma aki no tabata tin trabounan cu despues a bira necesario manera construccion di salanan di operacion, di cual awor Soga ta papia. Mester bay determina cuanto nan a costa.

    Mester tene cuenta cu cambionan cu a introduci y gastonan nobo cu a bini mientras trahadonan a spierta y DIARIO a confirma e peligro di Diesel paden di e edificio.

    E construccion di e hospital, cu un formula sumamente dificil, no a wordo  bon discuti den Parlamento, cu awor si tin deber pa mira kico ta bay pasa den futuro.

    Segun e plan di gobierno anterior, Soga a construi e hospital, cu ta bay huur na Gobierno, cu na su turno ta huur e hospital atrobe na Stichting Ziekenhuis Aruba.

    Originalmente tabata papia di un suma di casi 700 Miyon, cu segun e rapport di Algemene Rekenkamer Aruba lo a sigui subi.

    Preparacion di proyectonan di Bo Aruba, cu a nifica debe pa Aruba den futuro, tabata malisimo y esaki ta haci cu awor mester yega na cifranan corecto, segun informantenan.

    Duda grandi ta existi cerca informantenan di DIARIO riba e hospital cu ta wordo entrega y sigur e situacion financiero. Na opinion di informantenan Algemene Rekenkamer Aruba mester traha un rapport nobo riba e proyecto y con el a wordo finalisa.

    Segun informantenan e loke a wordo publica siman pasa, no ta duna un bista corecto di e situacion financiero real cu construccion y desaroyonan a crea.

    Pues prome cu entrega, Parlamento di Aruba mester haya sosten di Algemene Rekenkamer Aruba pa por yega na conclusionnan y decisionnan di e proyecto, cu den Parlamento no a haya e atencion debido ora a entrega e “proyecto di cinco strea” como parti di e fondo di 1.6 Biyon sin control debido na gobierno anterior.                                               

    - Advertisement -

    DUNA COMENTARIO

    Please enter your comment!
    Please enter your name here