Home General Economia di Siglo 20 ta basha abou

Economia di Siglo 20 ta basha abou

114
0
SHARE
- Advertisement -

E parti mas pisa di e normal nobo ta na caminda

*Aruba mester ta prepara pa situacion serio na caminda

*Virus y situacion politico mundial ta destrui Era di Jet 

ORANJESTAD (AAN) — Siglo 20 a entrega mundo un economia nobo. Inventonan nobo a subi mercado cu gran velocidad. Petroleo a cuminsa reemplasa carbon. Transportacion a conoce cambionan grandi. Industrialisacion, turismo y tecnologia a habri caminda pa e Era di Jet, cu awe un virus ta basha abou.

Advertencianan serio expertonan internacional cu ta guia DIARIO, a lansa pa loke ta trata e segundo parti di 2020, cu lo bira e parti mas pisa di e normal nobo.

E informantenan a indica, cu te na e momentonan aki ainda hopi hende no por realisa, kico ta na caminda na nivel internacional y asina pa Aruba tambe.

Mundo mester pone pasonan grandi atras y na Aruba tambe e realidad aki ta bay presenta su mes.

“Tur planificacion mundial a cay. Organisacionnan mundial no por duna ningun indicacion concreto kico mester spera den e futuro mas cercano y sigur no riba termino largo,” a wordo indica na DIARIO.

Na e momentonan aki e advertencia mas grandi cu por wordo lansa ta, pa economisa riba tur tereno.

Manera a wordo splica, comunidad mester wordo prepara pa un epoca nobo den cual tur gremio mester prepara nan miembronan pa e shock grandi cu ta na caminda.

Na e momentonan aki, un pais tras di otro ta declara cu nan ta den e recesion mas grandi cu nan a conoce durante un siglo y hasta ta papia di un catastrofe financiero mundial cu ta surpasa e Depresion Grandi na inicio di Siglo 20.

Na Siglo 20 hende a cuminsa desaroya un economia nobo, cu a culmina sigur cu e Era di Jet, cu a haci mundo mas chikito pero tambe a produci halanan nobo di economia, cu sigur tabata di importancia grandi pa Aruba pa loke ta trata turismo.

Na e momentonan aki, e malesa Covid-19 a destrui produccion mundial loke ta bay afecta trabou y comercio mundial.

Mester tene na consideracion cu mester bay cambia custumbernan cu tabata exigi entrada familiar, cu sigur lo baha mescos cu entrada nacional di Aruba cu lo no recupera cu e facilidad cu hopi hende ta pensa.

“Gobierno di Aruba ta haci un esfuerso grandi pa reactiva economia, cu ya tabata den problema serio. Sinembargo, no mester perde for di bista cu Aruba ta parti di mundo cu ta den un situacion di incertidumbre total cu e coronavirus nobo pero tambe cu cantidad di conflicto mundial cu ta escala,” informantenan a indica.

Pronosticonan cu nan a traha ta indica cu e forsa di compra mundialmente ta bay cay mientras hopi hende ta bay perde nan propiedadnan.

Den e situacion nobo aki tin hende cu ta gana pasobra nan ta gasta nan placa pa cumpra negoshinan cu por cera y propiedadnan cu lo mester wordo bendi door di doñonan cu ta cay den situacion financiero dificil.

E gran mayoria di comunidad lo conoce problema serio, cu ta mucho mas pisa cu mayoria di hende ta pensa.

“E era di bonansa ta tras di lomba. Tur hende mester ta prepara pa e shock cu ya a produci su mes pero ainda mester culmina,” tabata e advertencia cu expertonan a lansa.

DIARIO a prepara su mes pa duna guia na Aruba den un situacion sumamente pisa cu ta dilanti di porta y cu sigur ta bay supera e crisis di Lago, ya cu awor a trata di un crisis mundial cu ta afecta tur pais den un situacion internacional turbulento y sin certidumbre.

“Cupo di trabou lo baha hunto cu actividad comercial, economico, mientras e situacion financiero sigur di Aruba cu ya tabata den crisis grandi, lo bira un reto enorme,” informantenan a trece dilanti.

 

- Advertisement -

DUNA COMENTARIO

Please enter your comment!
Please enter your name here