Home General E fase nobo di Covid-19 ta un reto pa tur ciudadano

E fase nobo di Covid-19 ta un reto pa tur ciudadano

78
0
SHARE
- Advertisement -

Un responsabilidad nobo ta wordo presenta na pueblo

*Sobrevivencia di Aruba ta depende di economia cu mester habri

*Tur ciudadano mester tuma medidanan personal pa scapa Aruba

ORANJESTAD(AAN)–Den nos curason, tur Arubiano tabata tin e temor kico lo pasa ora Aruba habri su portanan pa e coronavirus nobo.

Pa Aruba como un isla tabata mucho mas facil cu pa un pais cu diferente conexion cu mundo, pa cera porta pa e malesa cu avansa na un forma rapido sin un vacuna of remedi pa stroba su paso.

Aruba a cera su frontera y a isola su mes di resto di mundo. A logra baha e cantidad di casonan te cero pero cu na bista e realidad, cu na momento cu Aruba habri su portanan e peliger ta presenta.

Loke tur hende a spera, a pasa.

E situacion sumamente tenso na Aruba debi na problemanan social cu tin nan base den e forma cu e bida a cay hunto cu economia y entrada di e pais, ta haci cu Aruba mester habri su portanan si Aruba no kier pa su hendenan wordo destrui dor di hamber, miseria y tension inhumano cu finalmente lo a causa problema social enorme.

DIARIO semper a mustra Aruba cu un dia e decision pa habri frontera mester a cay mas ainda debi na e situacion mundial sumamente malo.

DIARIO no a permiti Aruba biba den e speransa cu Aruba por a keda cera den cas y isola for di resto di mundo te na momento cu tin un remedi of vacuna pa e coronavirus nobo.

E prome casonan despues cu a habri frontera a presenta nan mes. Awor kico mester pasa?

E contesta tambe semper a wordo presenta door di DIARIO. Un reto nobo ta wordo presenta na tur ciudadano di Aruba cu tin den nan man pa dicidi kico ta bay pasa.

Ciudadanonan mester bolbe na e prome momentonan di suspenso basa riba e coronavirus y tuma tur e medidanan pa mantene distancia di otro y pa evita cu nan ta wordo contagia cu e coronavirus nobo.

Un deber nobo ta wordo entrega na tur lider di comunidad y no solamente e lidernan politico den gobierno. Lidernan den comercio y sindicalismo mester yuda pueblo sigui mas cu nunca preveni e malesa di haci su entrada den nan bida.

Si mira kico a pasa durante e ultimo simannan despues cu a deshaci di toque de queda, por tuma nota di e realidad cu segun un grupo grandi, no tin peliger mas di e coronavirus nobo.

DIARIO semper a splica pueblo cu awor e peliger mas grandi ta bati na porta y ta exigi un actitud responsabel di tur hende.

Tur hende ta conoci cu e realidad di mantene distancia. Tur hende ta conoci cu e realidad cu e tempo di brasa y sunchi sin reserva, a pasa pa historia.

Tur negoshi ta conoci cu e reglanan pa yuda preveni e coronavirus nobo. Tur trahado ta conoci cu e reglanan di proteha nan mes.

Aruba no por cera su portanan atrobe. Aruba mester habri porta pa trabou drenta pa medio di actividad internacional. Aruba mester di placa pa paga su gastonan personal, empresarial, gubernamental.

Awor tur ciudadano tin un responsabilidad nobo pa duna prioridad na nan defensa contra e enfermedad y pa preveni e malesa di plama.

Aruba ta ekipa pa atende cu e casonan cu por presenta, pero Aruba mester di yudansa di tur hende pa asina enfrenta un futuro den cual e coronavirus nobo ta un realidad nobo di bida!

- Advertisement -

DUNA COMENTARIO

Please enter your comment!
Please enter your name here