Home Coronavirus E dos casonan nobo di Covid-19 no ta cambia e plan strategico...

E dos casonan nobo di Covid-19 no ta cambia e plan strategico cu Gobierno tin pa reapertura di frontera

1763
0
SHARE
- Advertisement -

ORANJESTAD (AAN):  E noticia aki tabata uno cu por spera un dia pa otro. Sinembargo, e dia a yega y dialuna mainta, durante e rueda di prensa di Gobierno, Prome Minister Evelyn Wever-Croes a confirma dos caso nobo di Covid-19 na Aruba.

El a duna di conoce cu ta trata di dos persona cu a yega for di Colombia dos siman pasa. Nan tabata na Colombia pa cuido medico. Nan a presenta sintomanan den fin di siman. E personanan aki tabata den cuarentena y e ‘contact tracing’ por tuma lugar facil pa asina isola esaki.

E mandatario a confirma cu un di e personanan ta den bon estado di salud y e otro mester di cuido medico. E personanan y e famianan ta wordo atendi y e ‘contact tracing’ a cuminsa mesora.

El a bisa cu mester ta cauteloso y ta mustra locual e ta bisando pa hopi dia, cu ta importante pa mantene e distancia fisico, mantene e higiena pasobra no por duna garantia cu e virus no ta na Aruba.

E dos casonan nobo aki no ta cambia e plan strategico cu Gobierno tin pa reapertura di frontera. A tene cuenta caba cu e echo cu na momento cu habri frontera ta bay tin algun caso. “Dos no ta e drempel cu ta bisa cu nos tin cu bolter, tur e decisionnan of e plannan cu nos tabata tin”, Evelyn Wever-Croes a duna di conoce.

E cifranan di Departamento di Salud ta mustra cu tin 2 caso di Covid-19 nobo pa un total di 103.   

Ecantidad di esnan den cuarentena a baha for di 290 te na 178 persona y esnan cu a haci test ta un total di 2407, 5 extra, di cual 2 a resulta positivo pa Covid-19.

- Advertisement -

DUNA COMENTARIO

Please enter your comment!
Please enter your name here