Home Editorial Dia di Tata den tempo di reforma mundial

Dia di Tata den tempo di reforma mundial

59
0
SHARE
- Advertisement -

Diadomingo ta celebra Dia di Tata na varios pais. Ariba e dia aki ta pone e tata central. Ta para keto na e papel cu e tata tin den e comunidad mas chikito di nos sociedad, cu ta famia.

Den civilisacionnan cu Aruba a conoce, e tata ta hunga un papel central como manager principal di un famia. E ta wordo considera cabes di un famia, e persona responsabel pa e famia funciona. E ta protector di su famia, cu e ta defende contra cualkier peliger.

E importancia di tata den un famia a sufri cierto cambionan durante ultimo siglo. Hasta por yega na e conclusion, cu e papel di tata a wordo hala atras cu resultado cu esaki tin pa muchanan.

Mas y mas caso di hende cu conscientemente ta investiga kende ta nan tata desconoci, ta mustra riba e necesidad di un yiu pa conoce e persona cu ta su origen tambe. Hopi mucha cu no conoce nan tata of no tin contacto cu nan tata, ta den problema.

Nos mundo a yega na un punto cu asuntonan humano mester por wordo discuti pa asina hende bolbe na un balansa sano cu ta base di e comunidad como union humano.

Atencion mester bay wordo dedica na e papel di tata den famia, e nucleo basico humano den nos comunidad.

Un mama ta trece un yiu na mundo. Pa e por bira mama, mester di un tata. Un hende ta consisti pues di e parti cu e ta ricibi di su mama y di su tata. Su identidad ta basa riba su mama y su tata. Hasta den medicina ta busca informacion medico y biologico di e tata cu ta importante pa asistencia medico adecua.

Un mucha tin derecho di conoce su tata, a menos cu e tata (mescos cu por pasa cu un mama) duna prueba cu e no ta interesa den su yiu of por ta peligroso pa si yiu.

Un tata, mescos cu un mama, ta responsabel pa un yiu cu tambe ta responsabel pa bienestar di su mama y su tata y tin obligacionnan moral enfrente tanto su mama como su tata.

Den pasado hopi bes tabata presenta mama como fuente sentimental y tata como autoridad.  E realidad aki a haci cu hopi mucha no a lanta cu nan tata como amigo pero como un hues cu ta castiga.

E formula cu tabata pasa di un generacion pa otro, tabata crea cerca hopi mucha miedo pa e tata loke tabata tin impacto riba comportacion di e mucha como adulto.

Den hopi caso, hobennan masculino tabata asumi cu esaki tabata e relacion cu tabata necesario entre tata y yiu.

Awe ciencia ta exigi un actitud diferente den famia pa garantisa stabilidad di e mucha cu mester por mira den tanto su mama como su tata, su neishi, su sosten, su amigo mas grandi, su defensor.

Comportacion, luga di un tata den famia, e experencia cu muchanan tin cu nan tata, ta dicidi pa e calidad di hende cu nos pais, nos mundo lo conoce den futuro.

Kico ta spera mundo?  E orden mundial bieu cu nos a conoce, a basha abou riba tur tereno.

E momento a yega pues pa mama y tata ta uno den e lucha pa famia sobrevivi pa asina e pais sobrevivi. Un mundo nobo ta wordo crea y den e mundo aki e famia tambe mester conoce reforma.

Den e realidad aki, DIARIO ta mira e celebracion di Dia di Tata 2020, cu retonan grandi pa un comunidad nobo.

 

 

- Advertisement -

DUNA COMENTARIO

Please enter your comment!
Please enter your name here