Home Parlamento Dellanire Maduro ta haya cu tin di obliga hobennan na scol siña...

Dellanire Maduro ta haya cu tin di obliga hobennan na scol siña kico nan tin di ‘watchout’ pe

63
0
SHARE
- Advertisement -

Tratamento di Ley di Pedofil

ORANJESTAD (AAN): Diabierna mainta a trata den Parlamento, e concepto di ley pa aumenta castigo pa pedofilnan, y fuera di esey elimina e hecho cu un pedofil cu ta encarcela, por bin na remarke pa sali mas trempan di prison basa riba su bon comportacion.

   Segun Parlamentario Dellanire Maduro di Partido POR, e topico ta sumamente delicado, pero toch e ta importante pa muchanan y comunidad.  E no ta regarda djis e abuso sexual, sino tur tipo di abuso, sea fisico, domestico, etc.

   E ta haya cu ta importante pa na Aruba, bin cu implementacion den curiculo escolar pa educa hobennan riba kico preciso mester haci, y con pa actua.  Asina por siña e muchanan pa nan ‘watchout’ cu señalnan ora cu un hende ta seduci bo.  Tambe mira ora un hende ta trata na manipulabo.  Tambe pa ta alerta ora hende ta pidi bo manda potret of video.  Pues pa siña e muchanan aki ki ora ta bisa ‘no’.

   Tur e topiconan aki tin di wordo brinda na hobennan na manera apropia cu nan edad.  Pues e ta encera tambe kico nifica ora bo ta enamora, y kico ta e ley y e derecho di e persona como mucha, y pa nan sa unda nan por bay y kico por haci.

   Segun Maduro, na momento cu un abuso socede, e persona aki debi na e sentimento, sin cu e sa ta bay elimina evidencia cu por yuda castiga e agresor.  Pero ta mihor pa nan sa di tur esaki di antemano, pa por si acaso un violacion socede, e mucha sa kico pa haci pa evita di perde prueba.

   Segun e Parlamentario, ta dificil pa papia di e topico aki, pero tambe ta bon pa splica nan riba kico ta pasa ora cu un mucha pasa den situacion, y si e sali na luz.  Pues apart di esaki, ta importante pa empodera e mayornan.

   Algo importante ta e proceso legal.  E sa cu ley ta un parti di dje, pero no ta tur cos.  Segun Parlamentario di POR, Aruba mester ta orguyoso cu nos tin un Social Crisis Plan.  Diferente instancia cu tin trabao sumamente importante ta trahando hunto.  Pesey e deseo di e Parlamentario ta pa Aruba pone e “lugar di meld” bira un solo lugar central.

   Na Aruba, casi tur hende ta usa e palabra Pedofil, e ta un desorden clinico cu ta wordo describi extensamente den manualnan medico di ‘mental disorders’.  Ta importante pa nos muchanan haya conocemento, pa nan sa cua ta nan parti intimo, kico mag of no.  Nos ta papia di pedofilia, pero nos a nota cu tin pedosexual tambe.

   Pedofilia ta un persona atrai na un persona pre-pubertad.  E ta un sentimento y atraccion, un fantasia cu e tin.  E ta algo delicado pa e personanan aki tuma nota cu e no ta algo bon, y ta importante pa busca ayudo.

   Pedosexual ta e momento cu e persona a actua riba e atraccion y sentimento aki, y ningun forma esaki ta aceptable.

   Tin algun pedofil kier busca yudanza, y otro paisnan ta brinda yudanza!  Corda tambe cu 1 di cada 4 persona cu a abusa di otro, a yega di wordo abusa.  Pues aparte di bin cu ley mas severo, mester tin full un team di sosten pa yuda tanto e victima como e agresor pa evita di ripiti su fechorianan.

- Advertisement -

DUNA COMENTARIO

Please enter your comment!
Please enter your name here