Home Hudicial Caso penal contra homber cu a secuestra dama posponi

Caso penal contra homber cu a secuestra dama posponi

145
0
SHARE
- Advertisement -

Riba peticion di Fiscal

ORANJESTAD (AAN): E caso penal cu Ministerio Publico a cuminsa contra e homber Venezolano J.G.M. biba na Aruba, a keda posponi.

   Esaki riba peticion di Fiscal, kende ta haya cu mester laga haci mas investigacion di psychiater riba e condicion mental di J.G.M.

   SECUESTRA DAMA:

   E sospechoso J.G.M. a presenta den sala di Corte y a worde representa pa abogado mr. Paesch. Fiscal ta acusa J.G.M. cu riba 3 y 4 November 2019, el a secuestra un dama y tambe cu J.G.M. tabatin un arma di candela cun’e.

   E secuestro a sosode den un apartamento na Jaburibari.

Den sala di Corte tambe tabata presente un dama kende a representa e victima. El a presenta cu documentonan pa demanda di daño.

   FISCAL KIER POSPONE CASO:

   Fiscal a pidi Hues pa pospone e caso pasobra ainda no tin raport di psychiater. Fiscal a splica cu tin raport di psycologo pero Fiscal tin pregunta riba esaki. Fiscal ta cu psycologo a papia un biaha so cu J.G.M. y esey no ta suficiente. Fiscal no ta haya cu a haci suficiente investigacion y pesey kier pa psychiater haci investigacion.

   Na opinion di Fiscal, normalmente psycologo y psychiater ta papia varios biaha cu un persona pa asina tin un bista cla pa traha un raport.

   Segun Fiscal, tin indicacion cu J.G.M. tin problema mental y lo no ta responsabel pa su actonan. Pesey Fiscal kier claridad di psychiater pa determina si realmente J.G.M. tin problema mental y si e ta responsabel pa su actonan of no. Tambe Fiscal kier sa si lo mester tratamento y con esaki lo mester sosode.

   Hues a puntra Fiscal cuanto tempo lo bay dura promer cu e raport di psychiater lo ta cla. Fiscal a propone pa tratamento di e caso lo ta 28 Augustus 2020.

   REACCION DI ABOGADO:

   Abogado mr. Paesch a reclama cu Fiscal kier pospone e caso. E abogado a mustra cu su cliente tin 7 luna sera y nada a worde haci. Mr. Paesch ta haya cu Fiscal a tarda mucho pa bin cu e peticion.

   El a mustra cu psychiater a bishita J.G.M. y cu e ta hayando pilder pero esey no ta suficiente. E ta haya cu e tempo pa pospone ta mucho largo.

   HUES A POSPONE E CASO:

   Hues a puntra J.G.M. kico e ta pensa riba peticion di Fiscal. Segun J.G.M. e no tin nada contra pa ayudo pero a tarda asina hopi y ainda nada. Hues a puntra si e ta dispuesto pa papia cu psychiater. El a bisa cu e ta dispuesto pa coopera cu investigacion di psychiater.

   Fiscal a splica cu door di mal comunicacion no a haci nada. A haci peticion pero no a ehecuta esaki.

   Hues a bisa cu e ta haya e peticion di Fiscal na su lugar. Hues ta haya cu falta di mas investigacion pa determina kico mester sosode cu J.G.M. Hues a pospone e caso pa 28 Augustus 2020 pa 8.30 di mainta.

 

- Advertisement -

DUNA COMENTARIO

Please enter your comment!
Please enter your name here