Home General Bosman ta plamando informacion cu e mes no sa si ta cuadra...

Bosman ta plamando informacion cu e mes no sa si ta cuadra cu realidad

596
0
SHARE
- Advertisement -

ORANJESTAD (AAN): Diamars mainta durante conferencia di prensa di Otmar Oduber, el a reacciona tambe riba loke e miembro Andre Bosman di Tweede Kamer na Hulanda a declara recientemente, apuntando dede riba Aruba y encuanto loke a socede den Serlimar na Aruba.

   Otmar Oduber ta ex-Ministro cu a atende asunto di Serlimar.

   Bosman a lanza hopi acusacion riba mesa, y den mesun rosea a declara “ik ga ervan uit dat de info klopt”.  Pues aki Bosman mes ta plamando informacion cu e no sa mes si e ta cuadra cu realidad.

   Ademas, por a lesa un declaracion cu Bosman a pone, y si bo mira e texto na Hulandes, bo ta realiza cu e ta un Nederlands masha mal skirbi mes, pues ta duda cu Bosman mes a skirbi esey.  El a copy/paste esaki di un texto cu un hende di Aruba a manda pe, y pa colmo masha mal skirbi mes.

   Oduber a bisa cu el a tuma nota di Bosman unda el a ripiti y bisa cu e tin informacion di cosnan menos bon tumando lugar na Aruba, y a hasta a papia di corupcion cu ta tuma lugar na Aruba.  Segun Oduber, den su 22 aña den politica, nunca el a conoce Bosman, pues e no sa ken e ta.

   Di otro banda, Oduber ta lamenta profundamente cu ora bo tin politiconan manera Bosman den Tweede Kamer (cu ta un Instituto hopi respeta), awor ta usa expresionnan caminda e mes no ta sigur di e informacion, y toch ta use.  Esta “Ik ga ervan uit dat de info klopt.”

   Esey ta bisa hopi di e integridad cu e kier presta for di su posicion den Tweede Kamer.

   Reino Hulandes ta ‘uno’, y nos tur ta Hulandes, y como ciudadano nos kier wak pa nos wordo respeta.  Ora Politiconan ta haci uso di nan funcion, nunca a yega di tende e Hulandesnan aki expresa algo bon over di Aruba.

   Cada biaha e gobernantenan Hulandes ta papia di Caribe Hulandes, ta comosifuera aki banda tin set di ladron of esclavo tin ta biba aki banda, y cu ta cos malo so ta tuma lugar den Caribe.

   E mensahe ta hopi claro!  Arubianonan tin hopi hende bon.  Aunke na e isla por tin hendenan ta haci kizas cosnan robez, na Den Haag tambe tin, na Hulanda tambe tin, y den e Gobierno cu Bosman ta sostene, tambe tin redonan ta wordo saca den prensa, unda ta lesa storia di Ministro y Staatssecretaris ta envolvi den caso di tereno, toch na Aruba bo no ta haya hendenan ta bay cuestiona esey.  Ni den Tweede Kamer ta cuestiona esey, pasobra si acaso bo no ta sigur di bo fuente, bo no ta bay use tampoco.

   Pero toch ata Bosman ta bisa cu e no ta sigur di su fuente, pero toch ta usa nan y ta cuminza saca cantidad di documento pone riba Facebook, comosifuera cu ta un gran investigacion el a haci.

   “Ora boso lesa loke e miembro di Tweede Kamer aki a pone, mi ta spera cu esey no ta su Hulandes cu el a skirbi, pasobra e ta un hulandes hopi ziek, y en todo caso mi ta convenci cu e Hulandes ey mes e no a skirbi, y a scoge pa pone algo cu hende a manda pe, y ta defende su mes cu e no ta sigur ta berdad, pero e ta publike,” Oduber a bisa.

   Segun Oduber, si acaso Bosman tabata kier a haya informacion, e mes como Ministro e tempo ey a laga otronan bay coba den documentonan ter-inzage, y despues a hasta duna copia.  Eseynan tabata pa e Incinerator chikito cu DOW a cumpra, y no tabata di e plan di Incinerator grandi pa Serlimar.

   Manera ta conoci, e Incinerator grandi pa Serlimar nunca a wordo cumpra!

   Pues tur documento cu Bosman a pretende di a saca di su fuentenan, na fin di dia ta for di Ministerio di Otmar Oduber mes el a haya nan, ora cu a traha copia di e documentonan ey.

   E ta lamenta cu miembronan di Tweede Kamer, unico biaha cu e expresa di Aruba, ta papia cu tur hende aki ta corupto y cu mester laat los di aruba.   Ta claro cu Bosman no sa di e historia di Aruba y Hulanda, y e lucha di antepasadonan.  Kizas e no ta corda cu Aruba nunca a mendiga na Hulanda, pues no manera otro islanan cu a bay pidi.  Aruba nunca a haya nada di Hulanda, y semper a para riba su propio pia.  Pues momento a yega pa esnan di Tweede Kamer cuminza respeta Aruba.

- Advertisement -

DUNA COMENTARIO

Please enter your comment!
Please enter your name here