Benny a tranca rapport cu lo a cambia resultado eleccion

    1350
    0
    SHARE
    - Advertisement -

    DIARIO ta presenta prueba di manipulacion electoral 2017

    *Ministerio Publico mester investiga pakico a sconde Bo Aruba

    *A pone pueblo baila na brug Balashi durante investigacion

    ORANJESTAD (AAN) — “Mester bini un investigacion hudicial. E rapport di Algemene Rekenkamer Aruba no por keda sin wordo investiga dor di autoridad hudicial. No ta trata solamente di abuso di placa di pueblo pero di e forma cu gobierno Mike Eman, y na forma directo Benny Sevinger, a tranca e rapport cu lo a cambia resultado di eleccion.”

    Na palabra informantenan experto riba tereno legal. Nan ta insisti cu Ministerio Publico mester duna inicio na investigacion di e rapport Bo Aruba di e maximo autoridad administrativo di control di Aruba, cu ta Algemene Rekenkamer Aruba.

    “E rapport aki no a wordo traha dor di cualkier instancia priva of di gobierno. Algemene Rekenkamer Aruba ta encarga cu vigilancia di e bon maneho financiero di Aruba y,” e informantenan a indica.

    Nan ta mustra cu aki ta trata di un fondo di 1.6 Biyon cu sin bon splicacion y hustificacion (pa cual nan a duna prueba na DIARIO), a wordo poni disponibel na gobierno anterior pa metanan cu no tabata bon splica ni argumenta den e rapport.

    E forma cu a atende cu loke lo surpasa tur montante cu a wordo calcula, no ta e unico punto cu mester wordo investiga.

    “Pueblo di Aruba a bay vota na 2017 sin e rapport, cu Benny Sevinger a tranca pa loke ta trata su publicacion. Esaki ta nifica cu tabata tin manipulacion di informacion cu cual pueblo a bay vota na 2017. Si Aruba tabata na haltura di loke tabata tin den e rapport, sin duda e resultado di eleccion 2017, lo tabata completamente distinto,” a wordo remarca.

    E informantenan experto di DIARIO ta indica con gobierno anterior a manipula cu informacion na pueblo y a uza e brug di Spaans Lagoen pa bay celebra e fecha di nacemento di ex Prome Ministro Mike Eman dia Prome di September 2017 cu un invitacion na henter pueblo pa bay celebra djis prome cu eleccion 2017.

    “Pueblo di Aruba a wordo directamente manipula. Si e rapport cu Benny Sevinger oficialmente a ricibi for di dia 21 di februari 2017, tabata conoci, pueblo lo no a vota manera el a vota,” expertonan ta conclui.

    Loke a pasa ta contra di e base democratico di Aruba y hasta e cuadro di ley di e pais,  cu ta exigi pa e votadonan tin tur informacion necesario pa nan por dicidi na urna electoral con nan lo vota.
    “Ta increibel loke a sosode,” informantenan ta mustra. Algemene Rekenkamer Aruba mester a pone Benny Sevinger como ministro na haltura di su conclusion di e forma cu gobierno Mike Eman a atende cu e fondo cu tabata parti di campaña 2009.

    E investigacion di Algemene Rekenkamer Aruba a cubri pues e periodo for di momento cu e gabinete a asumi poder pa haya informacion di loke a pasa cu 1.6 Biyon, cu e miembronan di parlamento di AVP a pone na disposicion di gobierno Mike Eman sin bon forma di controla.

    Dia 21 di februari 2017, Algemene Rekenkamer Aruba a pidi Benny pa duna su comentario riba e rapport cu ta demostra abuso di placa di Aruba. Benny  no a reacciona.

    Dia 28 di maart Algemene Rekenkamer Aruba a bolbe pidi Sevinger reacciona prome cu 4 di april. E rapport a keda den lachi di Benny cu tampoco a reacciona riba e recordatorio di 7 di juni ora Algemene Rekenkamer Aruba a skirbi cu e lo bay publica e rapport na fin di 2017.

    Gobierno anterior no a percura pa tin suficiente personal na Algemene Rekenkamer Aruba cu mester a spera te ora gobierno Wever-Croes a sinta pa e tin suficiente personal pa publica e rapport cu lo a duna sin duda un resultado diferente di eleccion na 2017 ya cu pueblo lo a ricibi informacion cu gobierno anterior a atende cu su placa.

    Informantenan di DIARIO ta di opinion cu tin tur base pa un investigacion hudicial den e fondo di 1.6 Biyon, cu a mara Aruba awe na pago di sumanan enorme den un situacion di crisis total.

     

     

     

     

    - Advertisement -

    DUNA COMENTARIO

    Please enter your comment!
    Please enter your name here