Home General Barco Hulandes Zeeland a captura como $9.8 miyon na cocaina den Caribe

Barco Hulandes Zeeland a captura como $9.8 miyon na cocaina den Caribe

147
0
SHARE
- Advertisement -

ORANJESTAD (AAN): E barco di Marina Hulandes, esta Zr.Ms. Zeeland cu aworaki ta nabegando den e area aki y haciendo trabao di Guardacosta pa Caribe Hulandes, a logra di intercepta un cargamento di droga.

   Tabata den e anochi di Dialuna 1 di Juni 2020, cu nan a intercepta un transporte di 10 paki di cocaina riba lama grandi.  E droga tabata wordo transporta den un speedboat tipo Go-Fast, cu pa algun rato tabata wordo vigila door di Guardacosta.

   E dos personanan riba e speedboat aki, a wordo deteni tambe.

   E cocaina aki en total tin un peso di 350 kilo.  Na Europa e lo tin un balor di US$ 9,8 miyon riba caya.

   E cargamento di droga hunto cu e dos detenidonan a wordo transporta pa isla di Curacao, unda a entrega nan na autoridadnan.  Ministerio Publico lo bay huzga e personanan y e droga lo wordo destrui.

   Tur cos a cuminza ora cu e Marine-Radar y e avion Dash-8 di Guardacosta di Caribe Hulandes a detecta e speedboat sospechoso for di den dia caba den cercania di Curacao.

   Potretnan di telephoto zoom cu e avion Dash-8 a saca, a mustra cu nan tin hopi tanki di gasolin abordo, y mesora a lanta e sospecho cu e hendenan aki ta ocupa e momento ey cu transporte di contrabando.

   Mesora e barco Zr.Ms. Zeeland a cuminza move den e direccion, y ora cu nan a cuminza yega basta cerca, a pone nan boto rapido FRISC na awa pa asina bay intercepta nan.

    E avion di Guardacosta durante henter anochi a sigui duna guia na Zeeland pa asina duna sosten, pa asina localiza e Go-Fast sospechoso.  E ocupantenan ta homber y nan a stop y entrega nan mes.

   Comandante di Zr.Ms. Zeeland, esta kapitein-luitenant ter zee Paul Bijleveld, ta hopi contento cu e captura y ta orguyoso di e forma con diferente Departamento y Servicio a traha hunto, pa asina yega na un accion exitoso asina.

   E avion Dash-8 durante anochi a demostra con grandi su balor ta, y a haci un bon trabao entre e diferente unidadnan di Guardacosta, cu a yuda haci e accion aki.  Pa tur hende ta claramente visible cu nan ta logra un accion exitoso hasta den e temporada di Covid-19 virus aki, unda nan ta haci e trabao pa nabega rond di e islanan, pa asina stop traficacion di droga y di hende den Caribe.

   Zr.Ms. Zeeland ta un Oceangoing Patrol Vessel di Marina Real.  E barco aki ta nabega desde April 2020 como stationschip den Area Caribense.  E tareanan di stationschip ta riba tereno di operacionnan di Guardacosta, operacionnan anti-droga, y prestacion di yudanza di emergencia den caso di desastrenan.

 

- Advertisement -

DUNA COMENTARIO

Please enter your comment!
Please enter your name here