Home Editorial Awe Aruba ta yora!

Awe Aruba ta yora!

495
1
SHARE
- Advertisement -

Ta exactamente cuarenta aña pasa, cu e pasonan necesario tabata wordo tuma pa DIARIO mira luz como e matutino di Aruba. Na e momento e Teritorio Insular di Antia, tabata prepara su mes pa e ultimo parti di e lucha cu el a hiba pa alcansa su autonomia, cu Status Aparte.

Na 1983 Aruba a logra a base di sacrificio grandi haya reconocemento di Reino pa su derecho di autonomia, cu Aruba a duna contenido cu entrega di alma y curpa. Na 1985, ora Aruba a despedi di Antia pa bira pais autonomo den Reino, pueblo di Aruba tabata den un crisis enorme, pasobra Lago a cera su portanan. Medidanan mester a wordo tuma pa Aruba tabata tin e forsa financiero pa enfrenta e futuro pa cual tanto el a lucha.

Ta e Status Aparte di Aruba a haci posibel pa Aruba por a recupera su economia. E hecho cu Aruba no tabata depende mas di gobierno di Antia, a haci cu Aruba por a tuma su propio decisionnan. E prome gobierno di Aruba por a duna garantianan na companianan hotelero, loke tabata un forma di hipoteca cu nan a haya cu Aruba como borg, pa nan bini cu proyectonan.

Ta den dolor Aruba autonomo a nace dia Prome di Januari 1986.

Na 2020, mundo ta den un crisis cu a destrui economia mundial. Paisnan grandi ta den caos financiero y economico.

Hulanda cu ta duna asistencia semper na Aruba, hasta ta teme pa e Euro cu a bira su moneda como parti di Europa Uni.  

Ta spera cu na 2020, economia mundial lo sufri un caida severo, loke mundialmente ta conduci na kiebra di negoshinan y perdida di trabou.

Turismo mundial ta den agonia, manera Aruba tambe ta experencia.

Aruba ya tabata den problema financiero serio cu debenan cu e mester paga como debe nacional pero tambe debenan cu a wordo haci pa paga riba termino largo sin tene na consideracion cu futuro lo tabata diferente.

For di 2014, gobierno di Aruba tabata sa cu e mester economisa manera un rapport di un di e organonan halto di gobierno, cu ta Conseho Social Economico, a trece dilanti y cu DIARIO a presenta debidamente.

Despues di 2014, ora Hulanda ya a exigi cambio den gobernacion financiero, a sigui e proyecto Citgo cu a fracasa.

Awe Aruba ta confronta un crisis mundial, cu ta empeora, sin reserva y sin placa. Rapportnan oficial ta duna tur splicacion pakico Aruba no tin placa y tur cos ta mustra riba e gastonan enorme cu Aruba tabata tin den e temporada cu e por a crea fondonan pa temponan dificil.

Ningun gobierno ta tuma medida impopular. Gobierno di Aruba tin e deber di tuma medidanan cu e mester tuma si e no tin placa. Gobierno di Aruba no por paga nada si caha di pueblo ta bashi.

Na e momentonan aki Aruba ta yora. Con sindicatonan di gobierno por exigi Aruba paga debenan pa cual no tin fondo?

Di unda e placa mester bini? Aruba mester exigi trahadonan den sector priva, cu ta kibra, pa paga mas belasting si trahadonan di sector priva no tin entrada of a entrega un parti importante di nan entrada?

Con ta produci placa cu hotelnan bashi, cu negoshinan cera, den un situacion cu lo bira pio a base di e situacion mundial?

Kico a pasa cu e sentido di realidad? Lubida amor pa patria, amor pa un Aruba cu a sufri tanto cambio.

Si tin un mashin pa produci placa ta bon pa pone sector priva na haltura. Asina tur cu a keda sin trabou, tambe por bay busca placa pa nan por pone pan riba nan mesa bashi!

 

 

- Advertisement -

1 COMMENT

  1. Gran intento di analyse. Aruba como isla inutil, saquea, deforesta,refugio, petrolero,prototypo,moderno,carnavalero,cafetero,comercial,hotelero i global a conoce su desaroyo atravez di pirateria,desaloho,ocupacion, contrabando,aristocracia,civilisacion,kolonizacion,usurpacion, dekolonizacion,Antillianisacion,decentralizacion/autonomia, segregacion, nacionalisacion,desaroyo economico,industrialisacion turismo,status aparte na caminda pa independencia.
    E realizacion cu e ilusion empresarial priva ta e mantencion di un comunidad a keda evidencia a pone Aruba den e encrucijada ki rumbo tuma. Kennedy i su equipo na 1960 a determina cu si un desaroyo no tuma lugar e comunidad ta keda presa di comunismo sin splica esey. Awe ta claro cu comunismo ta bin despues di saque i revoltamento di e orden previo. Awor, e desaroyo di Aruba tabata un hecho. Solamente un hotel ta bata sosten di e comunidad i e desaroyo respalda pa educacion a alcanza crea henter un industria cu 11 hotel,aeropuerto,planta di awa i electricidad,modernismo, waf pa container, comunicacion global,etc.etc.
    E intelecto sinembargo a keda tranca entre ideologianan kapitalista o comunista i no a conoce un propio recognosimento pa garantisa un economia inclusivo i gobierno a hanje ta absorba e exclusion di ciudadanonan cu no tabata hanja conection cu e mercado pa por gana nan propio sustento, igual claro cu tabata pasa na otro comunidadnan na mundo, estadonan innacionnan. E sciencia social i economico a dividi e factornan di produccion entre trahadornan i doñonan.
    Cu e irumpimento di Covid19 riba nos territorio a bira obvio cu bida humano ta mas importante cu placa, es decir kapital. Si ningun hende traha ningun hende por gana placa. Si hende muri bida mes ta caba.
    Mirando cu a tuma e decisionnan correcto pa trata di salba humanidad e realidad paralisante di un pandemia a evidencia descomposicion economico na tur nivel i e division entre trahadornan i empresanan no ta justifica e abrupto kiebra di economia. Pa drecha esey mester hasi distinccionnan mas preciso pa bolbe coi e rumbo economico. Esta reconoce cu entre trahadornan i emrpesanan tin empleadonan i logronan cu no ta participa na e decisionnan necesario pa crea e kapital di e enconomia di e pais. Gobierno a hanja f.1000.000.000 di prestamo i kier duna unicamente na empresarionan pa recupera nan manera di biba back.Ami lo sugeri inventarisa nos bida i cambia e manera cu ta reparti e entradanan. E systema di cobra impuestonan no ta sirbi bao di e circumstancia cu empresanan ta wordu yuda i ta sconde esey pa nan empleadonan. Ami lo sugeri pesey, elimina impuesto riba entradanan i hisa impuuesto riba consumo.

DUNA COMENTARIO

Please enter your comment!
Please enter your name here