Home General Autonomia ta exigi Orden di Ley y no fantasia

Autonomia ta exigi Orden di Ley y no fantasia

57
0
SHARE
- Advertisement -

Mester splica reis di tur gasto cu a causa crash di Status Aparte 

*Ley ta exigi pa awe duna pueblo detaye di costo di Gobierno

*Parlamento tin derecho di presupuesto na nomber di pueblo

ORANJESTAD (AAN) — “Tabata decision di gobierno anterior pa awe Aruba paga pa e gastonan enorme cu el a haci durante  dos termino di gobernacion. E maneho cu gobierno anterior a hiba, ta haci cu awe mester duna pueblo tur splicacion di loke e mester paga awe pa e pais por a funciona ayera y awe.”

Restauracion di autonomia ta e encargo nobo di gobierno pero tambe di tur cu ta hunga un papel den e sistema democratico di Aruba.

DIARIO ta analisa hunto cu expertonan den asuntonan di gobernacion, kico a pasa cu Aruba cu e pais a perde su autonomia cu awe e mester restaura como un lucha sagrado cu e pueblo a hiba.

Manera a wordo splica na DIARIO, durante dos decada di gobernacion Aruba a wordo pusha den un mundo di fantasia cu a cuminsa cu e forma cu e baha BBO na mita.

Esaki a haci pues cu Aruba mes a entrega su placa na momento cu e mester a despedi di Valero na momento cu tambe pa Valero decisionnan financiero a wordo tuma na inicio di e periodo di gobernacion 2009-2013.

Aruba a perde entrada pero Aruba cuminsa haci gastonan grandi. Un maneho politicamente popular pero iresponsabel a wordo hiba den cual popularidad politico a hunga e papel mas importante.

Den e scenario aki e pueblo no a ricibi informacion cu e tabata tin mester pa e por husga y scenarionan pa kita atencion di pueblo pa realidad, manera e estadia den Fort Zoutman, a stroba pueblo di comprende pakico Hulanda mester a actua.

E actuacion Hulandes a duna resultado pero mester a tuma medidanan na 2014 ora tur gremio di e pais a presenta un plan total pa reduci gastonan di e pais.

Gastonan no a baha pero a uza placa na un forma cu na e momento e peso di e problema no por a bira comprendibel pa pueblo.

Resultado tabata cu Aruba tabata cay den un abismo financiero cu no por a stop for di 2014 a menos cu lo a tuma medidanan impopular, loke no a sosode pues.

A bay busca Citgo, cu a crash economia pasobra tambe cu Citgo tabata tin mas fantasia cu realidad.

E chens pa e proyecto a fracasa tabata enorme pero a dirigi henter e maneho di gobierno for di 2016 riba un fantasia cu a wordo presenta na pueblo y cu a bira e desaster economico di Aruba cu no a traha riba su economia manera e situacion tabata exigi.

“Ora papia di autonomia ta papia di un pueblo cu ta duna Parlamento e encargo pa eherce e derecho di presupuesto pa pueblo haya tur informacion cu e mester pa opina si gobernacion ta segun ley y na bienestar di pueblo,” a wordo indica.

Esaki no a pasa, pero mas bien a laga gobierno anterior haci loke e kier y tur debe a wordo pusha pa futuro, cu awe ta resulta den miseria na Aruba hasta sin e coronavirus nobo,” informantenan a splica.

E prome fase pa restaura economia manera nan a mustra, mester consisti di presenta na pueblo tur informacion pakico awe Aruba mester paga pa loke ayera gobierno a gasta.

“No por bay bari loke gobierno anterior a haci for di mesa pasobra ayera gobierno anterior a dicidi cu awe pueblo ta paga y segun ley pueblo mester tin tur informacion di loke e ta paga,” a wordo mustra.

Tur pero tur splicacion mester wordo duna na pueblo, cu ta carga e gasto final di gobernacion di ayera y awe, segun informantenan experto.

- Advertisement -

DUNA COMENTARIO

Please enter your comment!
Please enter your name here