Home Gobierno Aruba mester acepta ley di Reino pa por haya mas placa

Aruba mester acepta ley di Reino pa por haya mas placa

1683
0
SHARE
- Advertisement -

Diadomingo Hulanda a bin cu un di dos condicion

*Segun Knops, si Aruba no cumpli no lo haya e di tres fiansa

ORANJESTAD (AAN):   Prome Minister Evelyn Wever-Croes a señala dialuna mainta den e conferencia di prensa di gobierno cu den e di dos fiansa cu Aruba a haya di Hulanda, confirma dia 18 di Mei pa medio di un carta, ya caba Hulanda a anticipa riba un condicion cu ta bay ta aplicabel pa e di tres fiansa.

E di tres fiansa ta planifica pa wordo trata den Conseho di Minister di Reino dia 3 di Juli proximo, kiermen, diabierna awor.

E mandatario a señala cu Aruba ta cumpli cu tur condicion, manera cu CAft a raporta den nan conseho na Rijksministerraad siman pasa. CAft a yega na e conclusion pa Hulanda duna Aruba e di tres fiansa.

E di tres fiansa aki ta cubri tres luna, Juli, Augustus y September. Nan a aproba un suma di 204 miyon florin. E suma aki ta cubri e necesidad financiero di gobierno di Aruba pa e lunanan menciona pa loke ta paga gastonan di gobierno, paga salarionan y fondonan di AOV, APFA, AZV, FASE y subsidio di salario.

Locual CAft no a aproba ta AZV, cu ta 5 miyon pa luna. Pero esey ta basa riba e condicion anterior caba cu tin cu corta 5 miyon pa luna.

E di dos cos cu no a wordo aproba awor ta e pot di inversion di 40 miyon florin pa haci e mantencionnan necesario di varios ekipo di gobierno cu ta importante. CAft a propone Rijksministerraad pa no tuma e 40 miyon aki pa por mira miho con e 40 miyon aki lo sirbi den reactivacion di e economia, Prome Minister a splica.

El a remarca cu eynan tin un diferencia di opinion cu tin cu sigui papia di dje te ora haya un aprobacion. E 40 miyon aki no ta solamente pa reactiva economia. Tin mantencion y ekiponan manera e RWZI cu ta e planta di reciclahe di awa di riool cu mester di mantencion hopi urgente.

Si ta kita afo e dos puntonan aki cu no a wordo aproba door di CAft, CAft a aproba 202 miyon florin y tur cos tabata mustra cu ta bayendo bon pa diabierna awor Rijksministerraad, cu CAft su conseho positivo pa haya 203 miyon florin, Wever-Croes a indica.

CONDICION Y EXTRA CONDICION 

Sinembargo, e condicion cu Hulanda a anuncia dia 18 di Mei, ta cu ta bin un entidad nobo cu tin cu haya e placa, no gobierno y te dia di awe Aruba no a haya sa kico e entidad nobo aki ta.

Dia 18 di Mei Hulanda a anuncia cu esaki ta un condicion pa dia 3 di Juli. Premier Wever-Croes a señala cu e varios biaha cu e tabata tin reunion cu Secretario di Estado Knops, su su y otro cu e tabata tin hunto cu Premier di Sint Maarten y Corsow, den ‘vierlanden overleg’, a puntra kico e entidad ta bay ta, con e ta bay ta y pa no bin cu ne ultimo momento.

El a bisa cu diahuebs siman pasa tabata tin e ultimo ‘vierlanden overleg’ y Secretario di Estado Knops a priminti cu dialuna ta bay haya e documentonan aki.

Te cu prome cu e mandatario a cuminsa cu e conferencia di prensa, no a haya nada y durante e conferencia el a bolbe check y no a haya nada ainda, a bisa.

E problema lo sinta ora cu haya e informacion aki y cu tin cu bay apresura e proceso.

Pero esey no ta e unico problema, Wever-Croes a splica. Diadomingo, Secretario di Estado Knops a yam’e pa anuncia cu nan a dicidi di ultimo momento pa impone un di dos condicion pa Aruba.

E di dos condicion pa Aruba ta un ley di Reino (Rijkswet Financieel Toezicht) cu ta conta pa Sint Maarten y Corsow cu ta dirigi e regimen cu ta regla loke na Aruba CAft ta haci basa riba un ley di Aruba (Landsverordening).

E mandatario a laga sa cu na Corsow y Sint Maarten e ta den un ley di Reino, un Rft y eynan nan tin un Cft cu ta e comision similar na e CAft di Aruba cu ta haci e trabao. A remarca cu no tin tanto diferencia den e Rft y e LAft di Aruba, pero tin algun diferencia crucial.

Asina a bay den dialogo cu Secretario di Estado Knops pa basta ora, diadomingo ultimo, y e no por a duna mucho splicacion dicon.

Segun Premier Wever-Croes, tur esaki e ta haya straño pasobra segun Knops, Aruba ta e unico cu ta cumpli y Aruba por haya e placa pa tres luna. Corsow cu Sint Maarten no a cumpli y nan ta haya e placa pa un luna so.

Aruba cu ta e unico cu si ta cumpli, e regimen cu ta conta pa Aruba no ta conta mas y ta bay hinca Aruba den e regimen di Rft cu Cft, cu a demostra cu no ta funciona y pa esey el a referi na e raportnan di IMF.

Pa loke ta e  cambio aki Knops a keda di manda e hustificacion por escrito.

- Advertisement -

DUNA COMENTARIO

Please enter your comment!
Please enter your name here