Home Hudicial 30 luna di prison exigi pa homber cu a abusa di su...

30 luna di prison exigi pa homber cu a abusa di su dos sobrina menor di edad

259
0
SHARE
- Advertisement -

ORANJESTAD (AAN): E homber W., acusa di a abusa di su dos sobrina menor di edad, tabata casi henter e tratamento di e caso penal cabez abao y practicamente no kier a bisa nada.

Hues a purba hopi biaha pa haya contesta pero casi nada. Fiscal a haya W. culpable di a abusa di su dos sobrina y a exigi 30 luna di prison di cual 10 luna ta condicional.

ABUSA DI MUCHANAN

Hues a mustra cu e mama di e muchanan a haci denuncia. E acusacionnan ta cu entre Januari 2018 y Mei 2019, W. a mishi y abusa di e muchanan y hasta lo a maltrata e muchanan. Hues a mustra cu un di e muchanan na school a bisa su juffrouw cu W. a mishi cu su parti intimo. E mucha ta sobrina di W. E tempo ey e mucha tabatin 8 aña. E mucha a conta cu W. a mishi cu su parti intimo y despues W. a penetr’e. W. tabata sinta cabez abou y no tabata contesta Hues ora Hues haci preguntanan. Na dado momento W. a bisa cu e no ta bay contesta nada. Hues a splica con e mucha na Polis a splica con tur cos a sosode. E mucha a bisa cu apesar cu e tabata bisa W. no, W. tabata sigui tog. Diferente biaha esaki a sosode. E mucha a bisa cu W. tabata haci esaki cu su ruman muher mas grandi y cu el a mira W. haci actonan inmoral cu su ruman. E ruman muher grandi tambe a bisa cu W. a mishi cun’e y a penetr’e. Hues a bisa cu W. a bisa na Polis cu esaki no ta berdad. Den Corte W. a keda cabez abao y no a contesta Hues. Tambe tin e acusacion cu W. lo a kinipi y dal e muchanan. Na Polis, W. a bisa cu el a klap su sobrinanan ora nan no ta para keto.

   Ta asina cu e muchanan tabata keda serca mama di W., mientras cu e mayornan ta traha.

CORTA CURPA DEN CEL

   Hues a puntra W. con ta bayendo den KIA. El a bisa cu el a corta su mes den man den cel. E ta sera su so den cel na KIA.  Psycologo ta mustra cu si W. a haci e cosnan, e ta responsabel pa su actonan pasobra e sa bon kico por y no por. Psycologo ta bisa tambe cu e chens tey cu e lo por bolbe haci’e. Psycologo a recomenda pa W. haya un tratamento y tambe pa su adiccion. Hues tabata haci serie di preguntanan na W. pa asina por haya un bista riba W. pero W. no kier papia.

EXIGENCIA DI FISCAL

Fiscal a bisa cu e ta haya legalmente proba cu W. a dal e muchanan. El a mustra cu e sospechoso mes a admiti di a klap y no kinipi. Pa cu abuso y actonan inmoral, Fiscal a bisa cu mester tin pruebanan di sosten. W. ta desmenti di a haci esakinan. E mucha a conta na school con W. tabata mishi cun’e y a penetr’e. E juffrouw di school a conta kico e mucha a conta y a ripara cu e mucha ta comporta otro na school. E otro mucha tambe ta bisa cu W. a mishi y penetr’e. Tambe un di e muchanan a mira con W. tabata haci cosnan cu su ruman. Fiscal ta haya tur esaki, suficiente prueba cu W. a abusa di e dos muchanan menor di edad. Fiscal a sigui bisa cu e no por papia di penetracion sexual pasobra e raport medico no ta mustra esaki. For di investigacion di psycologo ta mustra cu W. mester di guia di Reclasering y curso di control di agresion. Fiscal a expresa cu e ta preocupa cu W., kende no kier bisa nada y ta haya cu W. tin problema cu su mes. Fiscal a bisa cu e tabata desea cu W. a expresa su mes pa asina tene cuenta cu esaki. Fiscal a bisa cu e muchanan a keda afecta. Fiscal a bisa cu e ta kere cu e unico forma cu por evita cu esaki ta ripiti ta pa exigi castigo combina. El a exigi 30 luna di prison, di cual 10 luna ta condicional y 3 aña di prueba bou guia di Reclasering y cu W. mester sigui e curso di regula agresion.

DEFENSA

Abogado mr. Griffith a bisa Hues cu W. ta desmenti categoricamente cu el a mishi y abusa e muchanan. E abogado ta haya cu no por confia declaracion di un di e muchanan. Na opinion di abogado, e maestronan di school tabata sugestivo. El a mustra cu Polis a mustra cu juffrouw lo a puntra e mucha si su omo a mishi cun’e of no. Na school e mucha a bisa cu e no kier keda cas mientras cu na cas e ta bisa di no kier bay school. E mucha ta bisa cu W. lo a penetr’e pero investigacion medico no ta mustra esey. E abogado tambe a bisa cu tur e otro declaracionnan cu tin, ta basa for di loke e muchanan mes a conta nan. E abogado ta haya cu no tin suficiente prueba. Tambe el a mustra cu e declaracion di e muchanan no ta consistente. Na opinion di mr. Griffith, mester declara W. liber pasobra no tin prueba cu el a mishi cu e muchanan y tampoco penetracion.

Hues a bisa cu e ta sera tatamento di e caso y dia 19 Juni 2020 lo tin sentencia.

 

- Advertisement -

DUNA COMENTARIO

Please enter your comment!
Please enter your name here