Home Gobierno 1.647 compania na Aruba a ricibi un maximo di 60% di gasto...

1.647 compania na Aruba a ricibi un maximo di 60% di gasto di salario pa paga 27.180 trahador

19
0
SHARE
- Advertisement -

Fondo FASE te ainda a yuda 8.782 persona

ORANJESTAD (AAN): Diahuebs mainta, Ministro di Finanzas mr. Xiomara Maduro via di un conferencia di prensa, a ofrece un splicacion directo na pueblo, pa mira den cifra, con grandi e efectonan financiero lo bay ta riba comunidad den e lunanan na caminda.

   Ta importante pa indica tur loke a wordo haci caba.

   Bo tin e “Alivio Fiscal” cu a wordo duna, como tambe e “FASE”, e “Sosten Financiero pa Cuartal”, “Subsidio di Salario”, y “Qredits”.

  Ya 507 compania a haci uso di e facilidad pa paga impuestonan di tur luna di April, Mei, y Juni 2020.  Esaki pa yuda e cash-flow di e compania.

   Tambe 325 compania a haci uso di e descuento di pago di AOV/AWW den luna di April, Mei, y Juni 2020.

   Fondo FASE te ainda a yuda 8.782 persona pa nan a haya un yudanza di 950 Florin pa luna.  E companianan cu ta eenmanszaak tambe ta wordo paga via sistema di FASE.

   Como 3.084 compania chikito y mediano a ricibi e sosten financiero di 4.000 Florin pa e prome cuartal.

   Encuanto subsidio di salario, exactamente 1.647 compania na Aruba a ricibi un maximo di 60% di gasto di salario pa paga 27.180 trahador y nan por keda cu nan empleo.

   Pa e facilidad di Qredits, aki 175 compania a haci uso di e facilidad di microcredito, unda cu Gobierno a yuda cu un aporte di 250 mil Florin pa asina por a match-up y brinda e bridge-loans aki na e companianan pa sobrepasa e crisis na Aruba.

   Esaki ta loke Gobierno a bin ta haci te cu awor, pa brinda un sosten durante e parti dificil.  E ta un situacion cu no ta facil, pasobra e fondonan aki cu ta bin di Reino Hulandes y cu tin condicion estricto mara na nan.   Uno di nan ta e parti di reduccion di gasto di AZV, y ta trahando riba esaki awor.    Tambe tin di corta den gasto di operacion di gobernacion.

   “Den situacion cu nos ta, ni cu nos manda tur Ambtenaar cas, ni cu si stop mes cu tur gobernacion, Gobierno di Aruba lo no tin tur e placa pa yuda tur esnan cu tin meser di yudanza na e momento aki. 

    Pesey mester recuri na Reino pa haya e fondonan necesario, y cu e fondonan aki ta bin ‘condiciona’, nos tur sa, pero esey ta un otro discusion riba su mes, pero realidad na Aruba ta cu tin di realiza loke tur tin den wega aki, y no ta facil,” Ministro Maduro a bisa.

- Advertisement -

DUNA COMENTARIO

Please enter your comment!
Please enter your name here