Home General Wever-Croes a saca Aruba for di confrontacion mundial

Wever-Croes a saca Aruba for di confrontacion mundial

2455
0
SHARE
- Advertisement -

Citgo a bira e carta decisivo di Presidente Trump contra Maduro

*Silencio barconan Irani ta rementa den conflicto internacional

*Expertonan di DIARIO ta bati alarma pa siguridad nacional

ORANJESTAD (AAN) — “Durante fin di siman por a papia di un silencio prome cu tormenta mientras e barconan di Iran tabata yega Venezuela.

Awe tempo ta duna rason na Ministro Presidente Evelyn Wever-Croes cu a saca Aruba for di un situacion sumamente peligroso, den cual e pais a wordo pusha for di momento cu a firma e acuerdo cu Citgo na 2016″.

Na 2018, Aruba a haya e prome señalnan cu e acuerdo cu a wordo firma entre Gabinete Mike Eman y Regimen Nicolas Maduro, no tabata coresponde cu e promesa cu pueblo di Aruba a ricibi ora gobierno anterior na 2016 a cera un acuerdo cu Nicolas Maduro.

Aparte di e hecho cu Nicolas Maduro no por a cumpli cu e acuerdo, cu tabata sumamente beneficioso pa su regimen, tabata tin e peliger grandi a base di e realidad di politica internacional y e debenan enorme cu tabata mara na un Citgo hipoteca na Rusia y companianan Mericano/Britanico y debenan di regimen di Nicolas Maduro.

Na 2016 tabata bisto cu Nicolas Maduro tabata encamina un proceso dictatorial, u a rementa na 2018 ora el a cuminsa habri porta pa Rusia habri un base den region di Caribe na momento cu el a haci bofon di e sistema di eleccion na Venezuela pa mantene poder contra constitucion na Venezuela.

Un riesgo grandi a wordo tuma dor di gobierno anterior cu a yega na e acuerdo pa Citgo, cu a haci Aruba parti di un situacion mundial peligroso, cu awe ta rementa.

E relacion entre Venezuela Chavista y Iran tabata uno di e puntonan cu mas Merca a rechasa for di su inicio.

Den fin di siman cu ta tras di lomba, barconan Irani carga cu gasolin cu a caba na Venezuela, a drenta e haf di Puerto Cabello den region di Caribe carga cu gasolin pa regimen Maduro.

Manera DIARIO corectamente a publica, autoridad di Aruba y di Reino mescos cu di tur otro pais den region di Caribe ta pendiente pa loke por bira un conflicto internacional y cu ayera a duna prueba di tabata desaroya den silencio.

Na e momentonan aki e peliger grandi cu Aruba tabata conoce como cas di e proyecto Citgo, ta bolbe bini dilanti y por realisa pakico regimen Nicolas Maduro tabata tin necesidad di e refineria di Aruba pa un fortalesa petrolero pafo di Venezuela.

Informantenan di DIARIO a mustra cu Merca no a reacciona ainda riba loke a pasa na Venezuela pero cu Presidente Mericano Donald Trump tin futuro di Citgo den su man. Citgo ta e posesion mas valioso di Venezuela, cu ta den man di Presidente Juan Guaidó cu pa mundo liber ta e lider politico di Venezuela.

Ayera regimen Nicolas Maduro tabata trata di declara Guaidó oficialmente terorista y a pidi Ministerio Publico di Venezuela pa tuma e pasonan necesario pa deshaci di e partido di Guaidó pa e motibo aki.

Informantenan di DIARIO ta mustra cu e desesperacion di Maduro ta dirigi contra Merca cu e ta acusa di pirateria pasobra Merca ta reconoce Guaidó como e unico Presidente di Venezuela y como tal no ta reconoce Maduro den asuntonan di Citgo.

Ta Presidente Donald Trump a scapa Citgo di wordo bendi for di 2019 pa asina companianan cu Venezuela, PDVSA y Citgo debe, haya nan placa.

Trump a decreta cu no por actua contra Citgo durante periodonan cu na April el a bolbe extende cu tres luna cu ta bay termina.

Den Corte siman pasa porta a habri pa Crystallex continua cu su buskeda pa uza Citgo pa e haya su placa cu e mester ricibi di Venezuela. Un palabra di Presidente Trump y por sigui bende Citgo y Venezuela ta perde tur derecho ya cu tur otro compania lo bay busca nan parti.

Mientras Iran ta manda gasolin pa Venezuela, Maduro no por haci nada cu Citgo, cu awor a bira centro den un confrontacion internacional pa cual DIARIO a adverti tambe for di 2018.

E hecho cu Iran a entrega petroleo na Venezuela, ta wordo considera dor di varios pais como un poder cu Nicolas Maduro a entrega na Iran y cu a haci Venezuela pendiente di Iran, cu tin problema cu Europa tambe.

Cuba a expresa su mes tras di Venezuela mientras Rusia mester tuma un posicion tanto den Citgo den cual e tin accion como den su sosten na Venezuela.

“Gobierno Wever-Croes a scapa Aruba di ta parti importante den un conflicto mundial na momento cu el a deshaci di e contracto,” informantenan a indica.

DIARIO ta sigui vigila e situacion na Venezuela, cu a drenta un fase sumamente peligroso y ta wordo vigila dor di gobiernonan di tur pais na mundo y sigur den region di Caribe.

 

 

- Advertisement -

DUNA COMENTARIO

Please enter your comment!
Please enter your name here