Home Gobierno Toque de Queda a cambia di 10 pm pa 11 pm for...

Toque de Queda a cambia di 10 pm pa 11 pm for 21 di Mei

184
0
SHARE
- Advertisement -

Limitacion ta bay keda solamente riba caminda publico

ORANJESTAD (AAN):  Desde diahuebs 21 di Mei, e orario di Toque de Queda a cambia. Minister Presidente Evelyn Wever-Croes a duna di conoce cu e orario di Toque de Queda ta pasa di 10 pm pa 11 pm y lo finalisa mesun ora, esta 5 am. Kiermen, e ta cuminsa un ora mas laat.

E mandatario a haci un apelacion na comunidad ya cu a ripara cu ora cu a haya e orario di 9 pm pa 10 pm tabata tin hopi caso di accidente y trauma. E casonan aki, algun, tabata tin di haber cu uzo di alcohol, otronan door di coremento iresponsabel y coremento duro y e hendenan ta finalisa na hospital.

Wever-Croes a remarca cu ta den crisis ainda y no kier pa hospital ta yen. Kier pidi cooperacion di henter comunidad pa ora cu a hala e orario pa 11 pm pa bay trankilo y pa evita accidente pa por sigui atende cu e crisis.

Banda di esaki, Alto Comisario Vanessa Tjon-Kock a agrega cu Toque de Queda ta bay keda vigente. Locual ta cambia ta e orario.

A bisa cu despues di basta deliberacion a tuma e decision aki mirando cu tin un proceso di desaroyo di post-corona. Pa loke ta trata orden publico ta di sumo importancia pa tur hende tene cuenta cu esaki.

Mas y mas ta bay haya hende ariba caya, pero esey no ta bay nifica cu no ta bay tin control. E tarea di polis ta bay keda mescos cu tur otro biaha di Toque de queda, pero mester bay tene cuenta cu ta bay tin un cambio, a remarca.

 

LIMITACION RIBA CAMINDA PUBLICO

 

E cambio ta bay ta for di 21 di Mei, e limitacion ta bay ta solamente riba camindanan publico. Esaki ta nifica cu e limitacion pa ta den cura no ta bay ta e caso mas. Bo por ta den bo cura, pero no riba camindanan publico, Alto Comisario a reitera.

Na momento cu polis haya un persona ariba caminda publico, automaticamente e ta haya boet. E proceso ta keda exactamente mescos, simplemente cu e limitacion ta bay ta diferente.

 

CONTROL MARITIMO

 

Un otro excepcion cu ta bay tin ta conta pa trafico maritimo. E biaha aki si ta bay duna oportunidad  na e piscadornan cu ta registra of cu ta considera piscamento como un ofishi pa ta durante e orario di toque de queda riba lama.

Tjon-Kock a remarca cu esaki no ta nifica cu no ta bay tin control. Pa esaki tin Kustwacht of Polis Maritimo cu por controla y puntra kico tumando lugar y pakico ta riba lama.

“Un suplica ta bay na nos cada un, un biaha mas”, a expresa.

Cuerpo di Polis lo sigui haci su trabao na diferente forma y no ta asina cu pasobra orario a cambia cu un hende no por haya su mes envolvi cu otro tipo di delitonan of cu polis no lo bay tin control riba esaki, a agrega.   

- Advertisement -

DUNA COMENTARIO

Please enter your comment!
Please enter your name here