Home Tempo Sistemanan tropical e aña aki por pasa mas cerca di Aruba

Sistemanan tropical e aña aki por pasa mas cerca di Aruba

261
0
SHARE
- Advertisement -

Rino Hermans:

ORANJESTAD(AAN): Mirando cu tin indicacion cu e temporada di horcan ta bay ta mas trempan cu normal y DIARIO relaciona cu esaki a haci un entrevista cu Hefe di Bureau Rampenbestrijding Aruba (BRA) Rino Hermans.

Hermans a splica cu universidadnan e aña aki a saca e conclusion cu 2020 ta bay ta un aña pisa pa laman di Caribe.

“Esey ta basa riba e hecho cu awanan den Caribe ta mas cayente cu e añanan anterior y esey ta duna mas posibilidad pa sistemanan tropical drenta region di Caribe”.

“Normal nan ta keda net pariba di region di Caribe, unda cu algun sistema tropical ta drenta region di Caribe y otronan ta pasa den e parti Oost cu ta St. Maarten, Puerto Rico y Cuba”.

“Sinembargo, e aña aki tin indicacion cu e sistemanan ta bay pasa mas den parti Zuid di Caribe, esta Aruba, Bonaire y Corsow, bay pa golfo di Mexico”, segun Hermans .

El a splica cu ta wordo premira cu dos di e sistemanan aki ta bay pasa cerca di Aruba.

Esaki ta pone cu ta bay tin hopi awacero cu por causa inundacion y esey por causa tambe un epidemia di dengue, mirando e cantidad di sangura cu e ora ey ta bay tin.

Hermans a sigui bisa cu pueblo mester bay cuida su mes.

DIARIO a puntra e hefe di BRA con prepara Aruba ta bay ta.

El a splica cu DOW ta trahando nan planning pa e rooinan caba, mientras cu 9 pa 11 di Juni BRA ta bay entrena e ‘diensten’ responsabel den e tres regionnan di Aruba.

Tambe tur esnan cu ta tuma decision ta bay train hunto cu Mariniers Kazerne, pa haya un indicacion con bon Aruba ta prepara pa e temporada di horcan.

“Tin hende ta calcula cu e periodo ta bay ta den September, pero e ultimo tres añanan a mustra cu por tin un horcan prome cu 1 di Juli”.

“Pesey esaki ta un indicacion cu e comportacion di naturaleza a cambia”.

“Unda cu antes nos tabata prepara pa Augustus, September y October, awor nos a hale pa cuminza na Juli”, segun Hermans.

El a sigui bisa cu pesey 9 di Juni lo sinta cu tur esnan cu durante di e periodo di horcan lo bay tuma decision y ta bay train nan.

Hermans a sigui bisa cu pa banda di Gobierno e no tin mucho preocupacion pasobra lo traha practicamente cu e mesun teamnan, pasobra no a haci mucho cambio den e hendenan cu pa e ultimo 5 pa 6 aña a maneha crisis na Aruba.

“Mi preocupacion ta pa nos pueblo, pasobra ya caba nos ta bibando cu tanto presion di e crisis di Coronavirus”.

“E ta pone un presion extra riba concientiza pueblo di su responsabilidad”.

“Nos tin cu cuida nos hospital pa un pandemia y nos tin cu cuida nos hospital pa un sistema tropical”.

“Pesey pueblo mester haci si mes sigur di tur e elementonan cu ta bay afecta su bida y por tin riesgo riba su bisa”, segun Hermans.

 

 

- Advertisement -

DUNA COMENTARIO

Please enter your comment!
Please enter your name here