Sindicatonan kier kibra pagado di belasting

    1568
    0
    SHARE
    - Advertisement -

    Expertonan ta denuncia wega politico sin frontera cu pueblo

    *Wega politico kier destrui comercio y trahadonan sin entrada

    *Loke a resta di negoshi y cupo di trabou na peliger directo 

    ORANJESTAD(AAN)–“No ta gobierno a tembla Diaranson. Henter pueblo tabata den suspenso grandi na Aruba cu mester atende cu e resultadonan di un crisis mundial di salud, cu por ocasiona morto di Arubiano. 

    Covid-19 a haci cu Aruba mes no por soluciona su problemanan serio y evita cu Hulanda a cumpli cu su menasa for di 2014, cu e ta deshaci di autonomia financiero di Aruba na forma drastico.”

    Informantenan  experto di DIARIO, cu awe hasta den e expresionnan Hulandes ta haya rason pa loke ta trata e problema financiero y economico serio cu Aruba conoce, ta lansa advertencia serio contra e metanan di sindicatonan di trahadonan di gobierno, cu ta lubida cu e placa cu mester paga pa nan salarionan y beneficionan no ta bini di cartera di ministronan pero for di cartera di un pueblo cu prome cu e coronavirus nobo ya a wordo hinca den destruccion financiero.

    “Kende mester bay paga e sindicatonan mas placa? Con Arubianonan sin trabou, negoshi cu no tin benta, trahadonan di hotelnan bashi, mester sigui paga trahadonan di gobierno?” a wordo puntra.

    Advertencia serio a wordo lansa cu existencia di negoshinan y empresanan ta na peliger si no baha e salarionan. Comercio no tin entrada y mayoria di trahado na Aruba a keda sin entrada of cu parti di nan entrada.

    Si negoshinan wordo obliga di paga loke nan no tin, nan lo mester cera nan porta y empresarionan mester busca onderstand.

    Expertonan ta mustra cu den seno di trahadonan di gobierno mes, trahadonan honesto ta admiti cu pueblo no tin placa pa paga trahadonan.

    Esaki no ta sorpresa. For di 2007 ora e maneho financiero cu a destrui Aruba a inicia, tabata conoci cu Aruba tabata drenta un caminda di problema serio.

    Expertonan cu ta guia DIARIO, a sigui presenta rapportnan cu ta indica cu for di 2009 Aruba a cuminsa cay ora gobierno Mike Eman a gana curason di pueblo cu e propaganda cu e ta baha BBO cu mita mientras mundo tabata den un problema financiero grandi y Valero tabata cera porta di refineria.

    “Gobierno Mike Eman a ignora e advertencia oficial cu e ta destrui fondonan di Aruba, cu mester a bay busca prestamo pa por a sigui cumpli cu su debenan,” a wordo indica.

    Expertonan ta sostene loke DIARIO a presenta den su edicion di Diaranson, cu esaki tabata e paso inicial pa destrui e futuro di Aruba. E racha di destruccion pa haya popularidad politico, cu sosten di un grupo di sindicalista cu laso directo cu mundo politico, a continua.

    Na 2014, sindicatonan tabata parti di consulta pa mira con ta scapa Aruba cu ya no tabata tin placa pa paga su trahadonan ni politiconan. Hulanda for di e tempo a menasa cu e ta tuma medida serio y e base a wordo poni pa introduci CAFT.

    Prome Ministro Mike Eman a bay tene un espectaculo den Fort Zoutman pa kita atencion for di e realidad di Aruba y e mayoria den Parlamento cu a sostene gobierno Mike Eman, tabata consciente cu e ta condena futuro di Aruba.

    A trata di scapa cara di gobierno anterior pa haya un mayoria mas grandi na 2017 cu e proyecto di fantasia di Citgo pa cual a haya ayudo di Nicolas Maduro cu record criminal.

    Sindicatonan ta na haltura cu no tin placa. E exigencianan cu awe nan ta presenta, mientras Covid-19 a demostra e realidad di Aruba, ta un abuso contra e pagado di belasting na Aruba, cu ta e trahadonan cu a keda si entrada pasobra economia di Aruba a cay y contra comercio cu no por bende y hasta mester cera negoshinan den varios caso.

    Expertonan di DIARIO ta di opinion cu mester spierta pueblo pa loke tin tras di e manifestacionnan di sindicatonan cu ta hinca Aruba den un tension grandi. “E sindicalistanan ta bon na haltura cu ta e trahado cu a keda sin trabou, e taxista, e victimanan mas grandi di gobierno Mike Eman y coronavirus, e ta exigi paga pa gastonan di salario cu pueblo di Aruba no por paga.

    Un situacion sumamente peligroso ta wordo crea atrobe pa Aruba, expertonan ta adverti.

     

     

     

     

     

    - Advertisement -

    DUNA COMENTARIO

    Please enter your comment!
    Please enter your name here