Shock mundial dilanti porta di Aruba

    2275
    0
    SHARE
    - Advertisement -

    Covid-19 a bira confrontacion mundial peligroso ayera

    *Sindicatonan di Gobierno no por pone Aruba contra muraya

    *Siman a habri mundo cu recesion, scarsedad y desaster social

    ORANJESTAD(AAN)–“Na e momentonan aki Gobierno mester baha tur gasto pa gobernacion.  E momento a yega pa instancianan oficial emiti un rapport den cual nan ta confirma cu medidanan mester wordo tuma dor di gobierno pa baha tur gasto di Aruba.  Durante e proximo añanan, Aruba no tin espacio pa paga un gobernacion carisimo, cu a wordo crea hunto cu debenan enorme pa e pais.”

    DIARIO durante fin di siman y ayera a sigui tur informacionnan cu tabata nace na nivel local y internacional.

    Na nivel local na Aruba por a tuma nota di e forma cu sindicatonan di gobierno tabata bini dilanti cu exigencianan riba nan pago.

    Informantenan a indica na DIARIO cu e loke sindicatonan ta exigi na e momentonan aki no por wordo acorda dor di gobierno di Aruba.

    Aruba mas cu nunca mester tene cuenta cu desaroyonan internacional cu sigur ta bay afecta Aruba, manera e hecho cu paisnan manera Hapon y Alemania a uni nan mes na e lista di paisnan cu oficialmente a anuncia cu nan ta den recesion, loke ta nifica caida financiero y economico di nan pais.

    Na e momentonan aki Aruba no por bay di acuerdo y honra menasa di ningun grupo manera e sindicatonan di gobierno, ya cu ta problema serio tin mundialmente.

    E coronavirus nobo ya no ta solamente un menasa pa salud pero cualkier momento por bira confrontacion serio entre paisnan cu ta reuni den seno di e Organisacion Mundial di Salud, caminda Merca ta entre e paisnan cu a cuminsa actua manera nan a priminti contra e Organisacion Mundial di Salud y contra China, cu nan a acusa di ta e pais cu a permiti e pandemia di bira realidad.

    E problema a bay asina leu, cu e continuacion di cooperacion mundial riba tereno financiero y economico entre un grupo di nacion cu ta sinti nan mes perhudica y China a bini dilanti hunto cu e acusacionnan di paisnan cu por a evita e pandemia di e coronavirus nobo si e paisnan tabata prepara.

    Mientras paisnan tabata oficialmente anuncia cu nan ta den recesion y cu nan economia ta den problema serio, e produccion di cuminda a sigui wordo afecta.

    Tanto na Merca como na Europa e produccion di por ehempel hariña a tranca. Rusia a anuncia cu e no ta exporta trigo mas.

    Produccion di carni na Merca y Europa a bira problema serio debi na e hecho cu hopi trahado den e ramo di cria, a bira malo y a tranca e produccion di e tipo di alimento aki.

    Den e tempo cu cosecha mester a sostene e industria di produccion di cuminda, e realidad di e coronavirus nobo, a tranca produccion.

    Na mes momento pa tur producto por bay tene na consideracion aumentonan importante di prijs produci dor di e gastonan cu tin pa transportacion di parti di companianan di aviacion y barco cu a sufri perdidanan enorme.

    Prestamonan a wordo haci dor di companianan di cual un parti ta bati bankroet mientras otro parti mester aumenta prijs pa enfrente e debenan tambe.

    Informantenan a mustra DIARIO cu sindicatonan, cu for di 2014 tabata na haltura cu gobierno mester a baha nan gastonan, no por pone presion awor riba Aruba, caminda gobierno mester prepara pa un situacion sumamente serio cu ta menasa e pais.

    E confrontacionnan cu a cuminsa ayera den e seno di e Organisacion Mundial pa Salud tambe ta menasa comercio internacional y cooperacionnan economico ta wordo hasta revisa manera informacionnan tabata indica ayera.

    “Un shock mundial ta dilanti porta di Aruba,” a wordo anuncia.

     

     

    - Advertisement -

    DUNA COMENTARIO

    Please enter your comment!
    Please enter your name here