Home General *SADA no por acepta ‘Tot Nadere Orde’

*SADA no por acepta ‘Tot Nadere Orde’

242
0
SHARE
- Advertisement -

“Nos a custumbra cu a hecho cu e Gobierno aki no ta respeta sindicatonan ni nan miembronan

ORANJESTAD(AAN): Dialuna mainta Sindicato Aduanero Di Aruba (SADA) a tene un conferencia di prensa y prome cu nan a cuminza, presidente di e sindicato Eduard Maduro den nomber di SADA a manda palabranan di profundo condolencia pa Cuerpo Policial y pa famia di e agente policial Leo Boekhoudt, kende tragicamente a perde su bida den un accidente di auto.

Maduro a indica cu un di e metanan di e conferencia di prensa ta pa aclarea varios punto, despues di ricibi varios pregunta y comentario pa loke ta trata e punto di bista di SADA, relaciona por ehempel cu e manifestacion di Diaranzon siman pasa.

Segun e presidente di e sindicato, SADA desde 2015 ta un di e sindicatonan mas activo na Aruba, no ta importa kende ta den Gobierno.

“Semper nos a mustra profesionalismo pa yega na solucionnan na mesa sinta, pero logicamente ora cu bo yega na un punto unda cu bo no ta haya un solucion na mesa, bo ta yega na pasonan cu miembronan a aproba”.

“Nos tin un statuut den cual tin poni kico e bestuur of sindicato tin cu haci”.

“Semper prome cu tuma un decision, nos ta yama nos miembronan pa hunto den un reunion tuma un decision”, segun Maduro.

El a sigui bisa cu siman pasa ora cu SADA a tende e palabranan popular: “Tot Nadere Orde”, e posicion di SADA y su miembronan a cambia.

Pesey e sindicato a yama un reunion pa papia cu su miembronan tocante esaki.

Tot nadere orde a wordo uza pa Gobierno indica cu e medida entre otro di kita 5% for di salario di ambtenaar ta conta pa un tempo indefini.

“Esey ta diferente na locual Ministerraad a presenta riba 17 y 20 di April”.

“Nos miembronan a desaproba tambe e hecho cu Gobierno a informa prensa di esaki sin sinta prome cu nos y informa nos cu Hulanda lo a bisa Tot Nadere Orde”.

“Mester bisa cu nos di SADA a bin ta custumbra caba desde 2018 cu a maneho aki di Gobierno, cu ta mustra di ta un maneho unilateral”, segun Maduro.

El a splica cu e miembronan di SADA a dicidi cu pa aworaki nan no ta bay den ningun tipo di manifestacion, pero si a dicidi di tene e rueda di prensa pa trece dilanti su punto di bista.

Segun Maduro, mirando e situacion di crisis y mirando e hecho cu SADA ta solidario cu tur esnan cu por of lo a perde trabao, nan no a bay den un discusion riba e 5% y e 50% cu a wordo presenta door di Ministerraad.

“Nos miembronan a bay di acuerdo cu e 5% te cu 31 di December for di e bezoldiging manera a wordo presenta na nos, pero a bin algun condicion”.

“Entre otro, e pensionadonan cu ta yudando Gobierno mester wordo laga bay of mester traha pro deo, pasobra nos ta den un crisis”.

“Nos a bin tambe cu algun pregunta, riba cual lamentablemente te dia di awe nos no a ricibi ningun contesta di Gobierno”.

“Nos a custumbra cu a hecho cu e Gobierno aki no ta respeta sindicatonan ni nan miembronan”, segun Maduro.

El a splica cu ora cu Gobierno a menciona ‘Tot Nadere Orde, e miembronan di SADA a bisa cu nan no ta bay di acuerdo mas cu kitamento di e 5% for di e vaste bezoldiging.

Esaki debi na e hecho cu en bez di ta sigur cu esaki lo dura te cu 31 di December, Tot Nadere Orde kiermen cu e posibilidad por tey cu lo sigui kita 5% di e salario for di e miembronan di SADA despues di 31di December ainda.

“Nos tabata sa adelanta cu ora cu kita e 5% for di e bezoldiging, bo pensioen ta bay sufri un tiki”.

“Sinembargo, door cu Gobierno a bisa cu tabata te cu 31 di December, nos a bay di acuerdo”.

“Miembronan a bay di acuerdo cu nos lo no mind cu durante 8 luna e ‘opbouw’ di nos pensioen lo sufri un poco”.

“Pero ora cu a uza e palabranan Tot Nadere Orde cu por nifica cu e lo dura pa 10, 20 of 30 aña, nos no ta acepta esaki”, segun presidente di e sindicato.

 

 

 

- Advertisement -

DUNA COMENTARIO

Please enter your comment!
Please enter your name here