Home Turismo Oficina di Turismo a tene webinar hunto cu AAA relaciona cu desaroyonan...

Oficina di Turismo a tene webinar hunto cu AAA relaciona cu desaroyonan referente aerolineanan

64
0
SHARE
- Advertisement -

ORANJESTAD(AAN) – Oficina di Turismo (A.T.A.) durante e simannan tras di lomba,  a presenta un serie di webinar cu ta inclui contenido informativo relaciona cu diferente topico pa socionan y comunidad completo.

Pa medio di e webinar nan a duna ‘updates’ riba varios topico y desaroyonan relevante, manera entre otro e presentacion di un plan di recuperacion titula ‘Tourism Recovery Marketing Plan’ (TRMP) cu A.T.A. ta desaroyando den colaboracion cu socionan clave, manera AAA, AHATA y ATSA.

Aunke no por predica e futuro y e efectonan cu e pandemia aki lo tin riba nos isla y tampoco mundo completo, ta crucial pa reconstrui e marca Aruba y sigura pa stimula demanda pa un biaha mas por atrae bishitantenan di balor halto.

Como tal, e plan ta representa un vision optimista di locual por logra cu reapertura di e fronteranan, pero tambe otro posibel scenario.

Den otro webinarnan A.T.A. a enfoca riba e mercadonan di Norte America, Latino America y Europa. Diabierna ultimo a presenta un webinar den colaboracion cu AAA relaciona cu e desaroyonan tumando luga referente aerolineanan y nos aeropuerto.

Ta importante pa remarca cu A.T.A. su oficinanan den exterior tambe ta presentando diferente webinar informativo na, entre otro, agencianan di viahe como tambe tour operadornan pa asina informa nan di tur e desaroyonan tumando luga riba nos isla.

E webinarnan aki A.T.A. ta mira como oportunidad tambe pa keda conecta cu socionan na nivel internacional. 

Tur e webinarnan presenta a wordo bon ricibi na unda cu a conta cu un participacion di entre 125 te cu 300 participante. A.T.A. kier a haci uzo di e oportunidad aki pa gradici cada un di e participantenan cu a sigui e diferente webinarnan y ta extende un palabra di danki pa tur e bon comentarionan. 

A.T.A. tambe a presenta algun webinar educativo caminda e enfoke ta mas ainda riba guia y instrui empresarionan local pa asina nan por haci bon uzo di e tempo aki pa mehora e calidad di servicio y productonan cu nan ta ofrece.

E webinarnan educativo aki ta inclui, entre otro, un serie di videonan educativo cu a wordo presenta cu ta splica empresarionan local con pa haci nan compania mas visibel door di verifica nan compania riba Google Search y Google Maps. 

Den transcurso di e simannan nos dilanti, A.T.A. lo presenta mas di e videonan educativo aki como tambe cursonan educativo.

Pa medio di e webinarnan informativo aki, A.T.A. ta trata na informa y alabes stimula empresarionan local y e comunidad di Aruba henter pa haci bon uzo di e tempo aki pa mehora e calidad di producto y servicionan cu ta wordo brinda na nos bishitantenan. Alavez e ta permiti Aruba keda conecta cu su socionan internacional.

 

- Advertisement -

DUNA COMENTARIO

Please enter your comment!
Please enter your name here