Home Cultura Heintje Ras lo bay tene hazaña di biba 1 luna den Mina...

Heintje Ras lo bay tene hazaña di biba 1 luna den Mina di Fosfaat

491
0
SHARE
- Advertisement -

Entrevista Exclusivo

ORANJESTAD (AAN): Manera publica den otro articulo awe den DIARIO, fundador di Heintje Ras di Museo di Antiguedad na Tanki Leendert, a bishita un museo na Merca, y di eynan su interes pa traha un “MegaMuseo” pa Aruba a bira mas grandi.

   Actualmente Museo di Antiguedad ta situa na su cas, pero e ta pensando awor pa construi un MegaMuseo di 2 piso, unda na e piso mas abao e lo por dedica completamente na e autonan antiek di Aruba, pues classic cars.  Na di dos piso lo por inclui tur e 6.200 pico obheto antiek cu ta relata storia di Aruba.

   Ya caba e ta den deliberacion cu Gobierno pa por haya un tereno pa construi un MegaMuseo pa Aruba.  El a nota cu Ministronan tambe ta exita cu e plan aki.

   Pero e sa cu e proyecto ta uno costoso, pues lo ta miyones.  Pero unavez cu e finaliza, e lo por bira uno di esnan mas grandi y bunita di Caribe.

   Heintje Ras a mustra cu e mes ta bay yuda haya finanzas pa e Museo aki.  Desde Mei 2019 caba e Museo ta resorta bao di un Fundacion, pues e caminda pa cuminza recauda fondo ta awor habri y transparente.

    RECAUDA PLACA:

   Heintje Ras ta un persona hopi hyper, y e sigur lo bay traha fuerte pa purba pone esaki bira realidad.  Y asina ta preserva parti di historia di e isla.  Pero pa e construccion bira realidad, e lo tin di bay haya sosten financiero for di tur skina di mundo!  Un edificio asina lo costa miyones, pero e tin un plan caba pa cuminza recauda placa.

   Den un entrevista EXCLUSIVO cu DIARIO, el a revela cu e tin un hazaña prepara pa haci dia 1 di October 2020.

   E ta haci esaki, mirando con algun gran hazaña den pasado a duna un man grandi na comunidad, e.o. e landamento di Roly Bislik for di Venezuela pa Aruba cu a yuda Savaneta haya su Piscina Olympico.

   Heintje Ras tin un hazaña den mente, y e ta trahando riba dje caba, poniendo e plan hunto den otro y pa mas di 1 luna y mey ta consultando cu expertonan, y preparando su mes sicologicamente.  E ta bay haci un hazaña cu ningun hende a yega di haci riba e isla.

   Manera ta conoci, ademas di tin Museo di Antiguedad, Sr. Ras ta conoci tambe como un persona cu ta duna Tour na sea individuo of grupo cu ta bay cana den Minanan Subteraneo di Fosfaat na Sero Colorado.  E tin como 7 aña ta haciendo esey, hibando hopi hende eybao, y el a hasta ofrece varios charla na scolnan encuanto e Minanan aki.

   Su hazaña ta cu e lo bay baha den e Mina mas grandi di Fosfaat na Aruba, esta 35 pia bao tera.  Eybao e lo cana hopi leu kizas 1 km te cu 1,5 km leu te na final di e Mina.

   Pero lo principal, ta cu e lo bay keda den e Mina pa 1 luna largo.  E luna cu e lo keda eybao lo ta dedica na e futuro proyecto di Museo di Antiguedad.

   Heintje Ras lo keda eybao, lo bay sobrevivi eybao, kizas riba awa cu fruta, y e lo keda 1 luna sin internet, 1 luna sin mira solo of luna, 1 luna sin sinti e brisa fresco di biento, cu intencion di ricibi donacion di Aruba y di rond mundo, pa asina yuda cu e bunita proyecto di MegaMuseo.

   E ta duna di su parti pa haci un hazaña nacional pa recauda fondo cu por start-up e construccion di e proyecto.  Claro cu e ta habri pa haya sosten di demas asociacionnan na Aruba, esnan envolvi den mundo di turismo, kizas sosten financiero di Fondonan di Hulanda, y hasta lo check cu demas Museonan existente na e.o. Merca cu por duna un man.

   Algun ehecutivo halto di Museonan na New York ta hopi interesa den e plannan pa un MegaMuseo na Aruba, y nan sa tambe cu Heintje Ras lo prepara un hazaña pa jump-start e campa؜ña pa recauda fondo.   Nan a hasta priminti di lo haci un donacion si berdad Ras bay haci e hazaña ey.

   Na comienzo el a haya recomendacion pa haci e hazaña aki pa dura 3 siman (21 dia), pero Heintje Ras ta pensando cu e lo por sigui facilmente 1 siman mas.  E plan ta cu lo bay tin un Docter pa controle eybao regularmente.  Tambe lo haya sosten di como 20 militar di Marinierskazerne Savaneta, y varios personal mas, y esey ya caba a wordo palabra.  Nan lo tey pa cuida e area durante e luna ey, y vigila su salud.

   Tambe lo bay tin voluntarionan cu lo bay ta atende un Hotline di Telefon pa asina ricibi yamada di esnan cu kier haci donacion, y chens pa publico deposita placa na e Bank Account di e fundacion.  Pa tres luna lo bay tin chens pa haci donacion relaciona cu e hazaña.

  Mas informacion lo presenta den siguiente lunanan den DIARIO.

  

 

  

- Advertisement -

DUNA COMENTARIO

Please enter your comment!
Please enter your name here