Home General Gritamento y zundramento por tin efectonan hopi serio riba desaroyo di un...

Gritamento y zundramento por tin efectonan hopi serio riba desaroyo di un mucha

35
0
SHARE
- Advertisement -

ORANJESTAD (AAN)-  Stress, ansiedad, miedo, preocupacion y panico ta emocionnan cu ta biba ainda den hopi hende relaciona cu e crisis di Covid-19. E acumulacion di e emocionnan aki por resulta den problemanan mental serio y hasta explosion di rabia cu por transforma den abuso emocional of verbal.

   Sociaal Crisis Plan a indica den un encuesta cu worde ehecuta riba social media, cu e resultadonan ta mustra cu 52% a indica di haya tendencia pa zundra, grita, papia palabra cu famia, yiunan of colega, esaki ta algo cu ta sosode hopi of tur dia den cierto caso. E tendencianan verbal aki ta un forma di abuso emocional of verbal y cu tin su efectonan hopi serio riba e desaroyo di un mucha.

   Loke ta Abuso emocional of verbal:

   Abuso emocional ta encera abuso verbal, caminda e mucha ta worde grita, zundra, humilia y insulta constantemente. Abuso emocional tambe ta ora un adulto den cuido di un mucha ta keda sin duna e mucha cariño, amor, calor of atencion cu e tin mester pa su desaroyo social-emocional. Abuso emocional por laga un mucha sinti cu e no tin balor y cu niun hende no ta stime y e impacto negativo aki tin su efecto riba e bida completo di un mucha.

Kico abo por haci pa yuda un mucha?

   Silencio ta permiti cu violencia ta sigui sosode. Si bo ta sinti of tin sospecho cu algo no ta corecto of bo ta mira of scucha algo sospechoso, por fabor no keda den silencio y acudi na un instancia pa ayudo.

   Yama Bureau Sostenemi na 588-1010 si bo mester di conseho, tin sospecho y of kier raporta un caso di abuso di mucha.

   Yama Fundacion Respeta Mi na 582-4433 pa informacion, conseho y guia tocante caso di abuso di menor.

   Yama Tienda di Educacion na 161 pa guia tocante lantamento di muchan y hoben.

   Yama seccion Bida y Famia di Departamento di Asunto Social na 528-1150 pa guia y conseho pa famia.

   E ta hopi importante pa nos como comunidad ta consciente y bon informa di e señalnan di abuso di mucha pa asina nos por actua debidamente. Bishita nos website www.scparuba.com y click ariba nos pagina “Reconoce abuso di mucha” y keda bon informa. Bo iniciativa por salba un bida di un mucha, pasobra e bienestar y siguridad di nos muchanan ta e responsabilidad di nos tur.

- Advertisement -

DUNA COMENTARIO

Please enter your comment!
Please enter your name here