Home Cultura Fundador di Museo di Antiguedad pensando cu posiblemente Aruba lo bay haya...

Fundador di Museo di Antiguedad pensando cu posiblemente Aruba lo bay haya un mega-museo

285
0
SHARE
- Advertisement -

Entrevista Exclusivo

ORANJESTAD (AAN): Heintje Ras cu ta encarga cu Museo di Antiguedad na Tanki Leendert.  Su interes pa obheto y articulonan di e Aruba di pasado semper ta grandi.

   Despues di mas di diez aña cu e tabata coleccionando articulonan di e Aruba di antes, finalmente el a converti su cas de un Museo di Antiguedad.  Ya caba 3 aña a pasa cu el a “habri su cas pa mundo”, y ta hayando bishita regular.

   Tabata 18 di Maart 2017 cu el a habri e Museo, y a ricibi 5.000 bishitante den tur e tempo ey.  E ta un record admirable, y Sr. Ras ta hopi orguyoso di esey.

   Den su Museo, bo ta mira obhetonan cu no ta wordo fabrica mas, pero cu si tabatin gran nificacion den e Aruba di antes.  Segun Ras, esey hustamente ta e idea cu e por a rescata lo mas articulo posible, pone nan den un showcase pa asina e generacion nobo por bay mira con nos grandinan a biba antes.

   Na October 2019, Heintje Ras a haci un inventario di tur articulo cu e tin, y esey a yega na 6.212 articulo individual na e Museo.

   Riba 18 di Maart 2019, den un solo dia a haya 906 bishitante registra cu a drenta.  Tabatin toch riba 1.060 cu a drenta, pasobra algun no a registra.  E dia ey a haya bishita di Ministro, Parlamentarionan, y hasta Gobernador Boekhoudt.

   E cas di Ras ta uno normal cu e ta biba aden, pero e articulonan a pone cu e cas a bira chikito.  Tur su sala, cushina, y patio ta yena cu articulo.  Antes ta Ras mes ta subi caya busca articulonan di antes.  Pero awor ya caba e Museo ta asina conoci, cu ciudadanonan mes ta treciendo obhetonan balioso pe.  Envez cu e ciudadanonan a benta nan afo, a opta pa trece pa e Museo.   E Museo awor a yena cu asina hopi articulo, y e espacio a bira chikito.

   Den un entrevista exclusivo cu DIARIO, Heintje Ras a splica cu e cas a bira chikito y esey a pone cuminza pensa pa expande, y pa e siguiente nivel.

  El a cuminza acerca Gobierno pa check si acaso por haya yudanza.  Museo mes ta un Fundacion cu a keda estableci di 3 Mei 2019 caba, y a base di esaki e lo por yega na haya cierto subsidio.  Esey a pone cu tin di bay pa e siguiente nivel di berdad.

   Esey ta pa bay muda pa un otro edificio unda por pone articulonan di antiguedad, pero un lugar unda e lo pone algun Classic Car tambe como muestra.  Su deseo ta pa tin un edificio di multiple piso, unda mas abao lo pone e vehiculonan di antes, y na halto lo warda e obhetonan antiek.  E ta un proyecto cu lo ta di un costo di miyones.

   Heintje Ras ta un persona hopi hyper, y e sigur lo bay traha fuerte pa purba pone esaki bira realidad.  Y asina ta preserva parti di historia di e isla.

   “Prome cu mi cera mi wowonan, mi ta bay duna e pais aki un mega-museo,” Heintje Ras a indica na DIARIO.  Kizas aki algun dia lo por tin mas detaye di e plan aki.

   E idea aki a bin di un recien bishita di dje na Merca, y el a gusta e concepto.  El a papia caba cu un Ministro, cu tambe ta pro pa preserva historia di Aruba, y awor ta buscando un lugar unda por bin cu un mega-museo, di 2 piso.  Kizas e por bira esun mas grandi di Caribe mes, y lo pone Aruba riba mapa mundial di Museonan cu ta vale la pena.

  Ras su deseo ta pa e piso abao lo dedica full na vehiculonan clasico, tambe e prome autonan di Drag Race di e isla, Harleynan bieu, etc.

   E finanzas lo ta un factor grandi pa e proyecto aki.  Pa por recauda fondo, Ras tin pensa di haci un hazaña grandi cu lo keda marca den historia, y cu un meta pa e isla aki haya un MegaMuseo.  Su meta pa haci hazaña ta bin e.o. riba loke Roly Bislik a yega di haci antes, pues landa di Venezuela pa Aruba, y danki na esey a yega na e meta pa construi Piscina Olympico na Savaneta, cu sigur a yuda kita muchanan for di riba caya y for di mal vicio di droga.

   Pesey Heintje Ras tin un hazaña den mente, y kier haci esey dia 1 di October 2020.  Den un otro articulo exclusivo di DIARIO por lesa di e hazaña aki cu lo bay ta uno historico.

 

 

- Advertisement -

DUNA COMENTARIO

Please enter your comment!
Please enter your name here