Home Enseñanza Docentenan di Colegio Arubano ta bati alarma cerca Obispo encuanto loke ta...

Docentenan di Colegio Arubano ta bati alarma cerca Obispo encuanto loke ta pasando den SMOA

864
0
SHARE
- Advertisement -

ORANJESTAD (AAN): Despues cu propaganda di solicitud pa busca un Rector nobo pa Colegio Arubano a sali den corant, por a nota cu un organizacion di docentenan na e scol di HAVO y VWO a manda un carta hopi skerpi mes pa Obispo Mgr. Secco, di Obispado di Willemstad.

   Grupo ALV (Algemene Lerarenvergadering) a splica cu nan ta representa e docentenan di Colegio Arubano pa cu nan interes y di educacion, a manda e carta pa bati alarma cerca Obispo pa e haya sa kico ta pasando den e directiva di SMOA na Aruba.

   Pa algun aña e directiva di Fundacion Stichting Middelbaar Onderwijs Aruba (SMOA), esta e Stichting Voortgezet Onderwijs Aruba (SVOA) ta consisti pa un grupo nobo di persona.  For di e momento cu e directiva aki a cuminza traha, nan a bin cu un cantidad significativo di cambio den e situacion na scol.  Sinembargo na opinion di Grupo ALV, e cambionan aki no a wordo haci den un sentido positivo.

   Den varios area e situacion na Colegio Arubano a cambia asina hopi, cu awor SMOA tin poco atencion dedica na e clima profesional y e clima educativo, cu ta e meta principal di e scol. 

   No ta trata aki di cambionan incidental, sino tratamento structural di e directiva cu a cuminza crea insatisfaccion cerca e docentenan y tambe desconfianza den SMOA y SVOA.

   Pa ilustra e situacion y posicion aki, e docentenan a pone un serie di punto pa splica e motibo pakico a traha e carta pa Obispo.

   (*) Docentenan a skirbi e carta aki na Obispo pasobra SMOA ta ignorando structuralmente tur carta y email cu docentenan ta manda.  Tin biaha ta dura hopi tambe prome cu directiva duna un contesta.  Si acaso bo haya un contesta di SMOA, esey ta djis den forma cu nan ta confirma di e haya e mensahe.  Pesey den nan opinion, no ta ni vale la pena manda un carta mas pa directiva.

   (*) Directiva ta dificil pa haya pa tene un reunion cu nan, si acaso e peticion ta bin di e docentenan of e organonan consultivo di scol.

   (*) Si acaso e directiva di SMOA durante un reunion scars, ta haci cierto palabracionnan, hopi biaha e acuerdonan ey cu el a priminti, no ta wordo cumpli cune.  Un ehemplo di esey ta e incapacidad di crea un Conseho di Medezeggenschapsraad (MR) pa Colegio Arubano.  Semper e Conseho MR aki tabata un deseo di Grupo ALV.

   (*) E Rector actual a entrega su retiro y SMOA ya a pone un propaganda di vacatura den corant.  Sinembargo, e text skirbi den e propaganda, e formulacion di e descripcion di e trabao ta habri pa hopi interpretacion.  Colegio Arubano ta core e riesgo cu directiva di SMOA ta tuma un hende den servicio cu no tin experiencia educativo, cu tur consecuencianan.

   (*) Recientemente mes, SMOA mes despues di reunionnan a yega di priminti cu lo envolvi personal di scol den e procedimento di solicitud di e.o. Rector.  Ta parce cu di berdad directiva di SMOA no ta parce di tin intencion di involucra un delegacion di e docentenan y e personal cu ta sostene educacion, den e procedimento di solicitud enbusca di un Rector nobo.

  (*) Tin indicacion cu den SMOA tin mal maneho financiero.  Nan ta conclui esey mirando e poco inversion cu SMOA ta haci riba tereno di educacion, compara cu otro inversionnan cu a haya prioridad den e directiva.  Tambe por a mira cambio den puestonan y tareanan dentro di e lugarnan di e fundacion djis pa crea mas puesto, y cu aparentemente no a wordo aproba pa esun cu ta duna subsidio.  Ademas durante un consulta di e directiva cu docentenan, a laga sa cu e plan escolar di e Rector actual no por wordo ehecuta, pasobra no tin fondo disponible pa ehecuta nan.  Aki tambe Grupo ALV a keda hopi babuca.

   (*) E cambionan di puesto a hasta pone cu awor den SMOA no tin ningun persona di confianza mas pa e personal.

   (*) A bin haya sa cu directiva di SMOA a lanta dos fundacion mas pa satisface e necesidadnandi educacion na Colegio Arubano.  E derecho di existencia of e necesidad pa e fundacionnan nobo aki, ta algo dudoso pa Grupo ALV.  E fundacion actual ya ta representa e interesnan di scol.

   Den otro articulo por lesa con ta parce cu SMOA kier bay sinta riba stul di directiva di scol mes.

 

- Advertisement -

DUNA COMENTARIO

Please enter your comment!
Please enter your name here