Home Hudicial Diez aña di prison pa homber cu a tira otro den lomba...

Diez aña di prison pa homber cu a tira otro den lomba y lag’e sin por cana

236
0
SHARE
- Advertisement -

E acusado a baha cabez ora el a scucha su sentencia

ORANJESTAD (AAN): Manera DIARIO a publica, Diabierna mainta sentencia a cay pa e homber C.K., kende ta worde sospecha di intento di mata. Via video conference Hues a duna sentencia. Hues tabata den sala di Corte, mientras cu e acusado tabata na KIA y su abogado mr. Illes na su oficina.

   SENTENCIA:

   Hues a bisa cu e acusacion contra C.K. ta cu riba 29 Juli 2019 el a purba mata e hombernan W. y M. door di tira riba nan. Tambe ta acusa C.K. di posecion di arma di candela.

   Hues a bisa cu e ta haya legalmente proba cu C.K. a purba mata W. y M. y tambe cu C.K. tabatin un arma di candela. Hues a mustra cu e pruebanan cu e ta haya ta e declaracion di W. y M., e declaracion medico cu ta mustra cu W. a keda paralito pa resto di su bida. Tambe Hues a mustra cu W. y M. a reconoce C.K. riba confrontacion di potretnan.

   HUES NO TA KERE ACUSADO:

   Hues a bisa cu C.K. ta para riba cu no ta berdad cu el a tira y cu nan ta gaña riba dje. El a bisa cu e anochi ey e tabata drumi y no tabata na San Nicolas.

   Hues a mustra cu tin declaracion di A.G., cu ta e amigo di C.K., cu ta bisa cu C.K. tabata tey na San Nicolas. Hues no ta kere e declaracion di C.K. cu e no tabata na San Nicolas.

   CASTIGO:

   Pa cu e castigo, Hues a bisa cu e ta tene na cuenta cu C.K. a tira riba un distancia cortico na un lugar publico riba W. y M. y W. a worde herida den lomba cu a afecta su columna vertebral.

   For di e raport medico ta mustra cu door di esaki W. a keda lam na su dos pianan y no por cana mas. Hues a bisa cu C.K. tin suerte cu W. no a resulta fatal herida.

   Hues a sigui bisa cu comunidad a keda sacidi door di e tiramento aki. Hues a bisa tambe cu W. nunca mas lo ta mescos manera e tabata promer cu e tiramento.

   Hues a tene na cuenta tambe cu den pasado caba C.K. a keda condena pa un delito di violencia. Hues ta haya e castigo di 10 aña di prison exigi pa Fiscal na su lugar y ta confirma esaki.

   Por a mira cu C.K. a baha cabez y a keda manera den shock cu e sentencia aki.

 

- Advertisement -

DUNA COMENTARIO

Please enter your comment!
Please enter your name here