Home Hudicial Diez aña di prison exigi pa grupo Colombiano cu a trafica 1.500...

Diez aña di prison exigi pa grupo Colombiano cu a trafica 1.500 kilo di cocaina den boto

558
0
SHARE
- Advertisement -

Guardacosta a intercepta e boto cu tabatin 54 bulto

ORANJESTAD (AAN): Diabierna mainta Corte den Promer Instancia a trata e caso penal contra e grupo di Colombia cu trafica 1.500 kilo di cocaina.

Ta trata aki di 4 homber di Colombia, kendenan riba 29 di November 2019 den oranan marduga a worde intercepta door di e speedboat Metal Shark di Guardacosta.

A haya 54 bulto di cocaina cu a pisa 1.500 kilo. Fiscal a baha pisa riba e grupo aki exigiendo 10 aña di prison pa cada un.

   BOTO CU 1500 KILO DI COCAINA:

   E homber V.A.M. y ruman J.A.M., Venezolano A.G. biba na Colombia y C.C. a presenta ayera den sala di Corte.

   Esaki tabata e promer biaha despues di basta siman di prevencion di Coronavirus, cu a dicidi di trata caso penal den Corte mes.

   Por a mira varios medidanan di prevencion den sala di Corte.

Fiscal a acusa nan cu hunto nan a importa, posecion di 1500 kilo di cocaina.

   MENAZA OF NO:

   Hues a mustra cu for di procesverbaal por compronde cu Guarda Costa a intercepta un boto riba 29 November 2019 cu 4 persona abordo y 54 bulto cu algo mas di 1.500 kilo di cocaina. V.A.M. a bisa Hues cu e tabata trahando riba un boto na Barranquilla y un pick up a yega cu dos persona arma a baha y bis’e pa subi.

   Nan a bis’e cu e tin cu haci loke nan bise pasobra nan tin su famia y si e no haci loke nan bise nan lo mata su famia y e. Su wowonan a worde tapa y te den oranan di anochi a hink’e den un cuarto. El a keda algun dia eynan.

   Despues nan a trece su ruman J.A.M. y A.G. Segun V.A.M., tabata un grupo di 30 pa 40 persona arma na e lugar. Despues nan a worde hiba den pick up na un costa na un boto. Un tal Victor Daniel a duna V.A.M., e capitan, un mapa con mester navega y na unda mester yega.

   Segun V.A.M. el a haya un cellular pa yama un persona y nan lo bise kico e lo mester haci. V.A.M. a enfatisa na Hues cu na Colombia si nan menaza, nan ta mata. Hues a bisa pero den e boto no tabatin hende arma. V.A.M. a mustra cu su famia tabata secuestra pa nan. Segun V.A.M. nan no a ofrece placa.

   A.G. a declara na Polis cu V.A.M. tabata e capitan y e tambe el a worde forza. El a bisa cu e tambe a worde hiba den cuarto unda V.A.M. tabata. El a worde forza pa bay den e boto como mecanico ya cu e ta un mecanico di auto.

   C.C. a declara cu el a worde acerca door di un amigo y ofrece 30 mil Dollar pero ora el a nenga, el a worde forza y su trabao tabata pa vigila e transporte di e lote di droga bay bon. Segun C.C. el a worde forza pa bay riba e boto y vigila pa e bultonan worde entrega na un otro boto y bolbe back Colombia.

   J.A.M. a bisa cu el a worde obliga pa subi pick up y hiba unda su ruman tabata. Hues a remarca con por ta posibel cu promer ta bisa detaya 1 miyon peso e ta hasta ta menciona cosnan. J.A.M. a bisa Hues esey tabata gañamento pero e berdad ta loke el a bisa cu el a worde forza.

   EXIGENCIA DI FISCAL:

   Fiscal a bisa cu e ta haya legalmente proba cu e grupo aki a importa 1.500 kilo di cocaina. Fiscal a bisa 29 November 2019 Guardacosta a intercepta e boto cu 4 persona abordo y 54 bulto di cocaina. Fiscal a remarca cu tur e sospechosonan ta blo cambia nan declaracion. E ta haya cu tur ta bisa cu nan a worde menaza pa transporta e droga sino lo mata nan.

   Fiscal ta haya cu nan no ta argumenta e menaza. E 1.500 kilo di cocaina ta hopi droga. Fiscal a remarca cu nan a palabra pa bin cu e storia cu nan a worde menaza y forza pa bin cu e droga. Hecho ta cu nan cuater a bin cu e droga.

    Na opinion di Fiscal, nan tabata sa kico nan tabata haci. El a mustra cu 1 kilo di cocaina ta costa 25 mil Euro na Hulanda. Esaki ta un lote miyonario a keda intercepta cu ta pone salud di hende na peliger y ta fomenta criminalidad.

    Fiscal a exigi 10 aña di prison y e boto ta keda confisca. Ta asina cu A.C. a reacciona fuerte ora a scucha exigencia y guardia di CEA a hala su atencion pa keda keto.

   ABOGADO:

   mr. Griffith ta haya cu no por papia aki cu conhuntamente nan a haci e delito di importacion di cocaina. Bao menaza pisa nan mester a transporta e droga. V.A.M., A.C. y J.A.M. a worde hiba na un cuarto. J.A.M. kier a core bay pero a los tiro di aviso.

   Nan no tabata sa mes cu lo transporta e droga. C.C. a worde ofreci pa transporta droga pero ora el a nenga, el a worde menaza. Nan ta papia di un tal Victor Daniel cu a acerca nan.

   Na opinion di e abogado, e hecho cu a menaza nan cu lo mata nan famia si no haci e trabao, nan no por a haci nada otro cu haci loke cu nan a worde bisa pa haci. E abogado a bisa cu e no ta comparti opinion di Fiscal cu nan a planea pa bisa cu nan a worde menaza.

   Hues a sera tratamento di e caso y a bisa cu lo bay studia e caso. Hues a bisa cu dia 19 Juni 2020 lo tin sentencia pa 8.15 di mainta.

 

- Advertisement -

DUNA COMENTARIO

Please enter your comment!
Please enter your name here