Corte di Husticia Aruba mester conclui era di Citgo

    486
    0
    SHARE
    - Advertisement -

    Awe Autoridad Mericano ta actua contra neishi di criminalidad

    *Mester investiga placa cu a bini y regalonan cu a wordo haci

    *For di Mei 2019 DIARIO a presenta prueba pa corupcion Citgo 

    ORANJESTAD(AAN)–Cu kende y den ki ambiente e acuerdo di Citgo a wordo firma? Esaki ta e pregunta cu den Corte di Husticia na Aruba mester wordo contesta.

    Di acuerdo cu democracia y nos base constitucional, Corte di Husticia na Aruba tin e deber sagrado di entrega na pueblo di Aruba e veredicto di un epoca cu a zink economia di Aruba pero segun tur informacion cu ta sigui drenta, a introduci pa Aruba peligernan mucho mas grandi cu solamente e resultadonan financiero y economico desastroso.

    Ta den Corte di Husticia na Aruba, despues di un investigacion profundo di Ministerio Publico, cu ya a ricibi e peticion pa investiga kico a pasa den seno di Refineria di Aruba, mester duna pueblo di Aruba e contestanan pa Aruba por conclui realmente e temporada destructivo di Citgo.

    Na un forma exclusivo na 2018, DIARIO a duna inicio na publicacionnan a base di investigacionnan pisa na nivel local y internacional riba Citgo y e proyecto cu gobierno anterior a trece pa Aruba.

    Na midi cu mas informacion tabata drenta a bira evidente cu no solamente tabata trata di un proyecto cu no por a wordo realisa, pero tambe di un centro di criminalidad cu acusacionnan serio di criminalidad contra tur exponentenan di Citgo cu Gobierno anterior a presenta na Aruba.

    Nelson Martinez, e socio di gobierno anterior, ta parti di casonan hudicial na Merca, caminda Hues mester dicidi kico e difunto a haci den Citgo a base di un demanda di un miembro bieu di Gerencia di Citgo, cu a wordo kita for di trabou pasobra e no kier a participa na e actonan criminal den cual e tabata wordo forsa dor di Nelson Martinez y otro miembronan di gerencia di Citgo, cu a negocia cu Aruba.

    Mester bay mas leu ainda, debi na e hecho cu hasta Nicolas Maduro ta wordo persigui pa husticia na Merca hunto cu otro miembronan di PDVSA y Citgo, en todo caso e circulo directo cu a negoshi e acuerdo di Citgo cu Aruba.

    Ora Guaidó mester a enfrenta Aruba pa hunto a pone un fin na e acuerdo tristo di e proyecto Citgo, el a bisa Gobierno di Aruba cu placa a bay Aruba pero kico a pasa cu e placa no ta conoci.

    Na e momentonan aki e grupo di Juan Guaidó, cu tin mando di Citgo a hiba otro grupo Hues. Ta trata di un Compania na Miami, cu a duna ehecutivonan di Citgo tur tipo di regalo pa wordo beneficia den pasado.

    Citgo kier recupera Miyones di Dollar den e caso cu ta mustra con regalo manera placa, joya tabata circula den corupcion nunca bisto.

    A cambio di tur e regalonan aki, Citgo a paga e compania 20 Miyon pa supuesto servicio presta. Esaki ta coresponde exactamente cu e caso cu Marisol Gomes a presenta na Mei 2019 contra difunto Nelson Martinez, socio intimo di gobernantenan anterior di Aruba.

    Manera DIARIO semper a adverti durante su investigacion mas cu riesgo financiero y economico tabata bini dilanti un cantidad di mas cu 20 caso criminal den cual mayoria di personanan persigui pa husticia Mericano a acepta nan culpabilidad.

    Na e momento aki, oficialmente na Aruba tambe por a scucha di regalonan oficial manera holoshi cu Citgo lo a entrega na personanan na Aruba, mientras cu tin informacion tambe cu tin partido politico cu a ricibi placa den e asunto di Citgo.

    Democracia ta exigi un investigacion di parti di Ministerio Publico pa e acuerdo di Citgo y tur loke ta relaciona cu e proyecto Citgo, wordo trata dor di autoridad y termina dilanti di mesa berde si por conclui cu tabata tin violacion di leynan di Aruba den e acuerdo di Citgo.

     

     

     

     

     

     

     

     

    - Advertisement -

    DUNA COMENTARIO

    Please enter your comment!
    Please enter your name here