Home Policial Clarisca Velasquez a entrega keho penal na Landsrecherche contra 3 agente superior

Clarisca Velasquez a entrega keho penal na Landsrecherche contra 3 agente superior

656
0
SHARE
- Advertisement -

*”Polisnan a drenta tereno ilegalmente”

ORANJESTAD(AAN): Diabierna agente policial y ex Parlamentario Clarisca Velasquez hunto cu su abogado Desiree de Sousa Croes a bay Landsrecherche pa entrega un keho contra e tres polisnan di funcion halto cu a drenta e villa unda cu e tabata kedando, den marduga di 29 di April pa 30 di April.

Velasquez despues di e incidente a wordo suspendi.

Durante un conferencia di prensa Velasquez a splica cu el a bay entrega un keho penal contra tres di su superiornan den Cuerpo Policial.

El a splica cu despues di 23 aña den KPA na dado momento el a bira Parlamentario y awor e tin 3 aña bek den Cuerpo Policial.

Velasquez a bira hefe na warda den distrito di Oranjestad, despues cu el a solicita pa e puesto.

“Mi ta hopi tristo y ta lamenta hopi e trato cu ami y mi otro coleganan ta hayando”.

“Bo a suspende, bo a kita arma y legitimatie bewijs di 9 di e mihor trahadornan di Oranjestad, incluyendo e mihor hefe na warda”.

“Ami ta ‘the last of the Mohicans’, ami ta e polis na Oranjestad cu te cu April ultimo nunca a meld ziek”, segun Velasquez.

El a sigui bisa cu e trata cu e y su coleganan a haya ta uno desproporcional y inhusto.

“Mi no sa kico ta e motibo, pasobra tur hende por bira malo”.

“Nos ta bay haci uso di tur e instrumentonan di husticia pa busca husticia bek”.

“Un hefe di Oranjestad cu a haya un hopi bon beoordeling y a gana 4 premio bo ta trata asina pa e hecho cu el a meld ziek?”, segun e agente policial.

El a splica cu algun aña pasa full un ploeg di San Nicolas a meld ziek anto nan hefe a duna nan rapport si, pero nan por a sigui traha.

Velasquez a bisa tambe cu riba 27 di April tambe tin 5 persona di e warda di 12 pa 8 na Oranjestad a meld ziek y no a bin ningun investigacion disciplinario.

“Pesey mi ta puntra mi mes cu cua midi ta midi”.

“Ami a traha 3 aña duro den e departamento ey y mi kier sigui traha”.

“Mi a haci bon trabao y a guia a muchanan hoben cu curazon, pasobra mi stima mi trabao”.

“Anto awor hendenan ta bin purba lastra mi y pone cosnan negativo dimi riba Facebook”.

“Quizas hende ta link esaki cu politica, pero MEP no mester tin miedo, pasobra tin 3 aña caba cu mi a retira di politica, pa haci e trabao cu mi ta stima”, segun Velasquez.

El a splica cu 34 aña pasa el a drenta Cuerpo Policial y cu e ta un di e dos hendenan muher mas bieu den Cuerpo Policial.

Velasquez a splica cu ni e ni su coleganan a organiza ningun fiesta, nan no a bebe bira burachi, ni uza droga, ni viola ningun ley, pasobra samenscholing no ta conta den un cas priva of cura etc.

“Nos no a haci desordo. Nos a djis dispidi di otro y awor nan ta lastrami manera cu ami ta droga of bebe burachi. Esnan cu conoce Clarisca Velasquez sa cu esaki hamas por ta berdad”.

DIARIO a puntra e polis kico por ta e motibo cu nan a actua asina contra dje y el a bisa cu e no por pensa otro motibo cu politica, pasobra e ta un bon trahador.

El a splica cu e no sa ken a yama e polisnan cu a bay na e villa cu el a huur y a drenta ilegalmente riba e tereno priva.

Ora cu e tres polisnan a drenta e villa Velasquez tabata tey cu 4 otro polis.

Den su declaracion cu el a entrega na Landsrecherche el a splica cu e tabata for di trempan cu su coleganan y na dado momento despues cu nan a come algo nan a sinti malo.

Nan sinta pafo y papia y nan a perde nocion di tempo.

Door di esaki e coleganan no por a bay mas for di e lugar, pasobra ya caba e ora di Toque de Queda a yega.

Como cu e villa tin 5 camber, e coleganan a dicidi di keda.

Rond di mey anochi Velasquez a sinti su curpa asina malo cu el a dicidi di yama pa meld ziek.

Menos di 2 ora despues e 3 polisnan a yega y drenta e tereno y e pusha e porta fuertemente pa drenta paden.

Segun Velasquez, e polisnan den tono menazante a cuminza acuse entre otro di meld ziek intencionalmente.

Banda di esaki a polisnan a listra den e cas.

Pa drenta e tereno mester hinca un code pa e heki por habri, pues Velasquez no sa con nan a drenta asina.

El a splica cu na dado momento el a sinti su curpa asina malo, cu el a bay Poly.

El a meld na SVB mainta y na DVG, pasobra e tabata sinti sintomanan di COVID-19.

E ex parlamentario a indica cu segun ley, polis por drenta cas di hende pa tuma cos den beslag of pa detene un persona.

Den e caso aki esaki no tabata e caso.

Pues nan a drenta den un forma ilegal, segun Velasquez.

 

- Advertisement -

DUNA COMENTARIO

Please enter your comment!
Please enter your name here