Cifranan exacto mester dirigi eleccion 2021

    589
    0
    SHARE
    - Advertisement -

    Actuacion Hulandes ta exigi bon splicacion di rapportnan financiero

    *DIARIO ta sigui presenta prueba di abuso di placa di pueblo

    *Autonomia ta exigi pa pueblo conoce di berdad di gobernacion

    ORANJESTAD(AAN)–“E forma cu Hulanda a actua, na prome luga ta duna prueba di e mal maneho cu a wordo hiba cu placa di pueblo di Aruba. Pa na 2021 Aruba por tuma e decision corecto na urna electoral, awe informacion cu a keda scondi of no a haya chens di awor atende manera ley ta exigi, mester wordo presenta na pueblo den programanan special informativo.”

    Expertonan financiero, economico y constitucional ta teme cu aunke Hulanda a papia un palabra bon cla ora e mester a asisti Aruba den e situacion actual di Covid-19, ainda pueblo di Aruba no por realisa e forma cu e pais a wordo perhudica durante mal maneho, cu a culmina na 2017 ora Aruba realmente a yega na e punto cu e por a sink den lama financiero si Hulanda no a preveni esaki.

    “Ta evidente cu ya campaña electoral pa 2021 a habri mientras pueblo di Aruba no ta prepara pa na un forma democratico dicidi riba futuro di Aruba, cu mester haya un bon splicacion di loke a pasa cu su placa realmente,” informantenan sumamente preocupa ta indica.

    E preocupacion no ta relaciona cu politica partidista pero cu e forma cu manipulacion politico a demostra di a haci pueblo incapaz pa realisa kico a pasa realmente cu su placa.

    Uzo di placa di pueblo ta mara na ley, cu a wordo kibra den e maneho di gobierno anterior, manera informantenan ta insisti. Esaki ta e problema grandi di Hulanda, cu hasta a deshaci di e autonomia financiero di Aruba, cu segun Ministro Knops no ta capaz pa carga nan propio autonomia.

    Na e momentonan aki, pueblo di Aruba no por comporta su mes segun reglanan di autonomia pa e simpel motibo cu berdad ainda ta scondi pa cantidad di informacion esencial cu a keda scondi pa pueblo di Aruba.

    Den edicion di awe, DIARIO ta presenta pruebanan cu ta mustra kico a pasa cu placa di Pueblo segun expertonan di e pais y pakico te awe Aruba mester paga y sigui paga por lo menos dos decada di gastonan cu a wordo haci pa gobierno anterior contra bienestar di Aruba.

    “Tur proyecto di gobierno anterior por a wordo realisa cu menos placa y segun exigencianan di ley, cu no ta permiti e riesgonan grandi cu a tuma cu placa di Aruba, cu si no tabata pa Hulanda, awe lo tabata bancarota,” informantenan a indica.

    Nan ta di opinion cu prome cu pueblo bay urna electoral, tur berdad mester wordo treci dilanti dor di instancianan oficial. Rapportnan sumamente importante cu segun ley nan a hinca den otro, no a wordo comprende segun expertonan cu ta indica cu den e eleccion 2021, ta cifranan concreto mester dirigi pueblo, cu un futuro afecta pa Covid-19, pero tambe pa pago di maniobranan puramente politico y a base di abuso di pueblo a wordo haci.

    “Autonomia ta exigi pa tur instancia oficial directamente y eventualmente den foronan dirigi cu preguntanan haci dor di expertonan cu sa di kico nan ta papia y cu representacion di tur partido, subi mesa,” a wordo treci dilanti.

    Nan ta di opinion cu e unico forma pa pone fin na manipulacion politico cu a sink Aruba cu ta completamente dependiente di Hulanda actualmente, ta pa berdad wordo presenta na pueblo prome cu eleccion 2021.

    DIARIO lo sigui presenta berdad, cu tempo a confirma manera a pasa cu e casonan di Citgo y e problemanan financiero cu a surgi y den cual Hulanda a confirma con gobierno anterior a kibra autonomia di Aruba!

     

    - Advertisement -

    DUNA COMENTARIO

    Please enter your comment!
    Please enter your name here