Home Economia Banco Central a nota cu durante Maart e cantidad di placa den...

Banco Central a nota cu durante Maart e cantidad di placa den circulacion a expande

125
0
SHARE
- Advertisement -

ORANJESTAD (AAN): Diabierna atardi, Banco Central a emiti un boletin pa comenta riba e desaroyo monetario.

   Nan a splica cu compara cu februari 2020, e cantidad di placa den circulacion a crece cu Afl. 11.0 miyon te na Afl. 4.700,6 miyon den e luna di maart 2020.

  Esaki a resulta for di un subida den tanto e reserva di divisa netto (+Afl. 8,1 miyon) y den e activo domestico netto (+Afl. 2,9 miyon).

   E reserva di divisa di e sector bancario a subi causa pa e compra netto di divisa for di publico (+Afl. 198,7 miyon),  principalmente relaciona cu entrada genera for di turismo.

   Esaki a worde grandemente neutralisa pa benta netto di divisa na publico (-Afl. 190,6 miyon), mas tanto relaciona cu pago pa importacion di mercancía y otro servicionan.

   Segun Banco Central, e expansion den e componente domestico pa cu e cantidad di placa den circulacion ta relata na aumento den tanto credito domestico (+Afl. 2,7 miyon) y den transaccionan no relata na credito (+Afl. 0,2 miyon).

   Esaki a worde causa door di aumento den credito bancario netto na e sector publico (+Afl. 16,2 miyon) y un bahada den credito bancario na e sector priva (-Afl. 13,5 miyon).

   Credito na empresa (-Afl. 15,7 miyon) y credit na consumidor (-Afl. 0,8 miyon), mientras cu hipoteca pa vivienda a subi (+Afl. 2,8 miyon).

    Papiando di Inflacion:

    E nivel general di prijs, cu ta worde midi door di e indice di prijs di consumo, a registra un subida di 3,5 porciento den e luna di maart 2020, compara cu maart 2019.

   E contribuyente principal na e aumento aki tabata e componentenan “Recreaccion y Cultura” y “Cuminda y Bebida No-Alcoholico”. Pa loke ta trata e promedio anual di e tasa di inflacion, esaki a registra 4,6 porciento na maart 2020, mescos cu na februari 2020.

   Entrada di Gobierno:

   Entrada total di gobierno a suma Afl. 76,2 miyon na maart 2020, cual ta Afl. 8,5 miyon menos cu e mesun luna di e aña anterior. Esaki a resulta for di bahada den entrada di impuesto (-Afl. 8,4 miyon) y den entrada no relata na impuesto (-Afl. 0,1 miyon).

   E caida den entrada di impuesto a worde causa principalmente pa menos entrada for di  impuesto riba entrada (-Afl. 2,5 miyon), impuesto riba importacion (-Afl. 2,1 miyon), impuesto riba salario (-Afl. 1,6 miyon), accijns riba cerbes (-Afl. 1,4 miyon) y accijns riba likeur (-Afl. 1,3 miyon).

   Di otro banda, entrada for di impuesto riba ganashi (+Afl. 1,7 miyon) y accijns riba tabaco (+Afl. 1,1 miyon) a nota un subida.

    Turismo:

   Tuma nota cu e cifranan di turismo di estadia no tabata disponibel na momento di publicacion di e relato aki.

 

 

- Advertisement -

DUNA COMENTARIO

Please enter your comment!
Please enter your name here