Arubianonan mester tin preferencia den turismo

    1063
    0
    SHARE
    - Advertisement -

    Crisis ta afecta hobennan mientras educadornan ta lucha pa placa

    *Epoca nobo di sector hotelero mester tin prioridad laboral Arubano

    *Uzo di leynan di permiso pa trabou mester bolbe na base original

    ORANJESTAD(AAN)–Durante e siman cu a termina na Aruba, tabata tin hopi tension relaciona cu e demanda di sindicatonan di gobierno entre cual educador, cu kier a regla nan placa.

    Den e situacion aki, e realidad di hobennan cu a termina nan school a bay perdi mescos cu di hopi trahado Arubano cu a perde nan entrada.

    Na e momentonan aki e pais ta traha riba plannan pa duna inicio na un normal nobo pa Aruba, cu ya mester tabata prepara pa e futuro cu lo bini cu exigencianan nobo pa tur cu ta envolvi den e diferente sectornan di e pais.

    DIARIO for di algun siman pasa a trece dilanti cu na e momentonan aki e trahado Arubano tin tur preferencia y cu leynan di permiso pa trabou mester bolbe na nan base original.

    Ora tene cuenta cu cifranan di DIARIO pa turismo internacional, cu ta wordo confirma den informacionnan cu ta bini dilanti di e desaroyo local, mester conclui cu e proceso laboral na Aruba lo bay ta uno cu no ta facil.

    Informacionnan cu DIARIO a sigui compila ta mustra riba e problemanan serio cu trahadonan Arubano ta confronta pero tambe e problemanan serio di hobennan cu a termina nan school den e crisis enorme di  Covid-19 y awor pa un gran parti meste bay incorpora den e sector laboral.

    Informantenan ta indica cu mester bay aplica leynan cu ta regla permiso di trabou, segun e areglo basico cu tabata sigura cu ta den caso cu no por haya trahado na Aruba, ta bay haci uzo di trahado importa.

    Un aspecto sumamente inconfortabel a desaroya na Aruba cu conoce exigencianan sumamente halto pa enseñansa. E diploma cu educacion na Aruba ta entrega, ta reconoci internacionalmente pa e nivel halto di enseñansa, basa entre otro riba e hecho cu e Arubiano ta domina hopi idioma pero tambe capacidad grandi pa atende den tur materia.

    Pues e base di e trahado Arubano ta haltisimo y mester haya reconocimento den sector di turismo y di companianan internacional, cu manera ta conoci hopi bes ta parti di cadenanan cu ta manda trahado na e destinacionnan caminda nan ta opera.

    Sector turistico di Aruba y sigur e mundo hotelero awor ta drenta un epoca importante cu entre otro menasa di Republica Dominicano, pais grandi cu hopi atraccion cu Aruba no conoce.

    Na mes momento tanto na Europa como na Merca, ta wordo trata pa uza e situacion di e coronavirus pa e masa grandi di turista pasa vacacion na cas y asina yuda trahadonan na e pais mes.

    Cu fin di un aña escolar nobo,  e sector laboral di Aruba a crece y cantidad di hoben cu tremendo preparacion pa necesidadnan actual y futuro di e pais, ta uni na e grupo di trahado cu a perde nan trabou.

    Esaki ta implica cu e demanda pa trabou ta halto na Aruba, cu mester bay paga fiansa den futuro pa a tene su cabes riba awa den e situacion di crisis.

    Awe, e problema no ta placa cu educadornan ta ricibi na prome luga, pero e crisis di hobennan cu a keda scondi durante e coronavirus nobo y cu ta exigi pa admision di trahadonan stranhero wordo restringi y pa trabou wordo duna na prome luga na e Arubiano, cu mester di nan patria pa por desaroya nan mes a base di nan sacrificionan pa prepara nan mes pa sirbi nan pais.

    E sector di turismo lo conoce cambionan grandi manera informantenan clave a mustra. Exigencianan nobo cu tabata planea pa futuro lo uni cu e situacion nobo di e coronavirus y den proximo edicionnan DIARIO lo sigui guia Aruba, mientras e pais den tur sector, ta drenta e normal nobo.

    - Advertisement -

    DUNA COMENTARIO

    Please enter your comment!
    Please enter your name here