Home Editorial 2020 a bira un aña di reflexion pa Mama!

2020 a bira un aña di reflexion pa Mama!

92
0
SHARE
- Advertisement -

Editorial

Durante Siglo 20, cambionan den comunidad mundial a wordo sigui pa cambionan den e bida familiar y sigur e luga cu mamanan ta ocupa den famia.

Emancipacion di e hende muhe, tabata tin resultado directo pa e tarea di mama, cu a conoce un cambio radical ora e generacion di despues di Segunda Guera Mundial, a introduci un orden nobo.

Mama a cuminsa bay traha y a cuminsa ocupa funcionnan pafo di cas. Divorcionan a afecta famia. Mama soltero a haya un definicion diferente. E trabou di mama den su cas, a wordo parcialmente entrega na otro persona y por nota un cambio importante y hasta surgimento di problemanan familiar y den comportacion di mucha.

Pa hopi tempo, mundo tabata den espera di un cambio cu lo mester a bini. Con esaki lo a tuma luga, no por a wordo mira adelanta.

2020 a haci su entrada y sin cu ningun hende por a spera, a bira e aña cu  a basha e comunidad cu a desaroya abou riba tur tereno.

Situacionnan di guera a presenta den tempo di paz ora e coronavirus nobo a afecta y a cera economia, a cera comercio, edificio, trabou pafo di cas.

COVID-19 a exigi famianan topa cu otro den seno di nan cas, cu mester a bira un hogar pa hende isola for di resto di mundo.

Mamanan a haya nan mes confronta cu realidad di nan bida familiar riba tur tereno. No tabata tin luga pa mucha bay y ta mama mester a ocupa su mes cu yiunan for di momento cu nan lanta te na e momento cu nan bay drumi.

Casnan a bira oficina cu mester a tene consideracion cu e muchanan cu tabata exigi atencion cu porfin nan a haya.

Mayornan a haya contacto nobo cu nan yiunan. E funcionamento di famia a haya un contenido, cu a hiba hende atrobe na e base di union familiar.

Trabou di e mama a haya laso sumamente emocional y sentimental den e ramo di cuido, caminda mamanan tabata enfrenta e peliger di infeccion cu Covid-19 directamente. Hopi emocion tabata bini dilanti den e miedo di mamanan pa  bay infecta nan famia ora nan yega cas.

Na casnan di cuido, hende grandi a wordo isola como defensa contra e virus. Grandinan cu den cierto casonan tabata sufri pa falta di atencion di miembronan di famia, awor na forma forsa no tabata tin contacto mas cu nan sernan stima, cu mester a resorta na otro formanan di contacto.

Na hopi ocasion por a nota un relacion nobo entre e mama di edad isola y su yiunan y nietonan haciendo uzo di medionan social.

Na 2020 mamanan no por uni na Misa. E regalonan di Dia di Mama lo ta menos costoso debi na e situacion economico cu COVID-19 a crea.

Dia di Mama 2020 a haya un aspecto masha bunita. E ta entrada pa relacionnan nobo den famia y pa debolbe mama su luga na formanan diferente den cual no ta e regalo ta central pero e emocion, e sentimentonan.

Con importante mama ta? COVID-19 a demostra, cu aunke economia ta basha abou, aunke mundo ta na careda, a pesar di e situacion di crisis, Dia di Mama no ta wordo lubida.

Nos pabien na tur mama y cu Dios bendiciona tur mama cu amor y sabiduria pa duna contenido na e reto di ta mama den un comunidad di cambionan grandi.

- Advertisement -

DUNA COMENTARIO

Please enter your comment!
Please enter your name here