Home Religion y Espiritualidad Yaxury Solórzano Ortega: E milager cu a atribui na dr. Jose Gregorio...

Yaxury Solórzano Ortega: E milager cu a atribui na dr. Jose Gregorio Hernandez

192
0
SHARE
- Advertisement -

Fundacion Venerable Jose Gregorio Hernandez ta informa tocante

Durante mas di un aña autoridadnan eclesiastico a studia e milager atribui na intercesion di dr. Jose Gregorio Hernandez den recuperacion di Yaxury di 13 aña, kende ta biba na Manga Coveras, municipio di Guayabal, estado Guárico. Dia 10 di maart 2017 Yaxury, kende e tempo ey tabatin 10 aña, a ricibi un disparo den su cabes den zona tempoparetal banda drechi, door di delincuentenan cerca di su cas, cu kier a horta su tata.

Yaxury a kita cay. Di leu e mama a scucha e tiro y a core bay n’e luga y a hay’e cu e escena lamentabel. Cu grito el a pidi su otro yiu muhe pa hiba e hobencita den un pickup te na Guayabal, estado Guárico, y na nan turno nan a pidi un ambulans pa hib’e hospital di San Fernando cu ta keda na Apure.

Despues di un aña, e mama a comenta na e dokter cu a trata su yiu, esta e neurociruhano Alexander Krinitzky, cu ora nan tabata opera e yiu, el a pidi dr. Jose Gregorio Hernandez cu hopi fe pa intercede dilanti di Dios pa salud di su yiu. E ta sigura cu di un manera inmediato el a sinti presencia di Venerable. E ta sigui conta cu el a sinti un man riba su schouder y un bos a bis’e: ‘Keda trankil, tur cos ta bay sali bon!’

A pesar di tur dificultad, famia di e victima a logra hib’e te na ciudad di San Fernando de Apure, caminda e dokternan di emergencia pediatrico y di intensive care di hospital Pablo Acosta Ortiz (Hpao) a atend’e. Despues a traslad’e pa un centro priva di salud, caminda dr. Alexander Krinitzky y su ekipo a oper’e. Despues a manda Yaxury bek intensive care di Hpao pa e por recupera completamente.

”E tata di Yaxury a trata di huy door di bira su scooter, pero e delincuentenan a tira y Yaxury a ricibi e bala. Nan a opera Yaxury un dia despues di e incidente. Nos a ricibie den sala di operacion, e tabata tur na tubo y fo’i tino (bou sedante). Nos a practica cirugia di control di daño y bay bek Hpao. A cuminsa haya evidencia di e milager, ora dianan despues mama y yiu a presenta na mi consultorio. Yaxury tabata cana y sonrei, sin complicacion”, dr. Krinitzky a relata.

Den un clinica priva a haci un operacion hopi delicado cu Yaxury, cu segun expertonan den area medico, cu tabata imposibel pa a salba su bida, pasobra e bala cu el a ricibi a hacie perde e masa encefálica y varios weso.

A pesar cu e dokternan cu a trata Yaxury, a dun’e poco probabilidad pa biba, e recuperacion di e hoben tabata exitoso y despues di algun dia di e operacion, el a mehora satisfactoriamente sin complicacionnan medico.

E pronostico di e dokternan pa Yaxury no tabata faborabel, ya cu e lo a keda cu problema pa move y ceguera. Sin embargo despues di solamente 20 dia el a sali di hospital canando y sin ningun daño corporal cu ta keda como consecuencia di e tiro cu el a ricibi. E no tin daño neurologico, e ta papia y ta relaciona su mes cu fluidez.

Tur specialista cu a atende Yaxury ta na bida, a entrevista nan pa reconstruccion di e hechonan y a recoge nan testimonio y prueba valioso pa demostra cu un milager a tuma luga.

E siete dokternan di Vaticano a ratifica esaki y a comproba e milager cu ta hiba  dr. Jose Gregorio Hernandez na caminda pa Beatificacion. E famia di Yaxury ta sigura cu e fe den dr. Jose Gregorio Hernandez a logra converti un tragedia den un milager!

- Advertisement -

DUNA COMENTARIO

Please enter your comment!
Please enter your name here