Union Aids y Covid-19 ta menasa dramatico

    775
    0
    SHARE
    - Advertisement -

    Malesanan cu mundo kier lubida ta uni na peliger virus nobo 

    *Casonan di coronavirus nobo a subi den un dia cu 80 Mil

    *Aruba den situacion alarmante ta amplia acomodacion 

    ORANJESTAD (AAN) — E hecho cu diariamente e cantidad di caso di Covid-19 ta sigui subi na Aruba, ta sumamente alarmante. Ayera e pais a acerca e total di 62 cu den comparacionnan mundial ta haya atencion pa e hecho cu e cifra mester wordo mira como 581 caso pa un populacion di Un Miyon di hende.

    Informacionnan di DIARIO ta confirma cu Gobierno di Aruba a percura pa ampliacion di e ekipo pa duna asistencia na pashentnan. Na un forma special mester papia di e ekipo pa yuda pashent hala rosea, cu ta sumamente importante den e caso di Covid-19 pero tambe hopi otro caso medico cu ta stroba e funcionamento normal di hala rosea.

    Mundialmente tambe tin preocupacion sumamente serio mientras gruponan cu ta wordo perhudica directamente dor di e coronavirus nobo, ta tene na consideracion cu nan por confronta un crisis grandi.

    Durante  ultimo añanan, mundo a baha e vigilancia cu e tabata tin riba entre otro e enfermedadnan di AIDS y di enfermedadnan sumamente contagioso manera malaria y tuberculosis.

    Pa basta dia pashentnan di AIDS rond mundo ta den panico pa e forma cu atencion ta pa e coronavirus nobo y no pa pashentnan di AIDS, cu por wordo perhudica ora e cantidad di remedinan cu nan mester pa mantene nan salud, wordo neglisha y servicionan y guia medico cu nan haya, baha.

    Ademas di esaki mester tene cuenta cu e pashent di AIDS ta sufri di trastorno fisico cu ta presente den e coronavirus nobo tambe of ta bira mas peligroso si nan haya Coronavirus nobo.

    Manera informacionnan ta indica no por baha e cantidad di testnan cu ta haci pa determina posibel victimanan di AIDS. Ainda tin basta persona cu no ta na haltura cu nan tin e enfermedad cu tambe ta plama si no cuida y ta causa morto.

    Segun e organisacion di Nacionnan Uni pa AIDS, na 2018 tabata tin 37.9 Miyon caso di Aids y na 2019 un total di 62 porciento di pashentnan tabata haya cuido.

    E temor ta grandi pa e desastre cu Malaria por causa si e topa cu Covid-19. Na 2018 tabata tin 228 caso di malaria na mundo y un parti grandi tabata na Africa, caminda awor e coronavirus a yega.

    Ta wordo pensa cu otro siman, e culminacion di e Coronavirus lo continua sigur na momento cu paisnan Africano tambe cuminsa experencia e malesa diariamente.

    Aruba mester keda cauteloso pasobra ta cu medidanan sumamente pisa ta trata di contene e paso di Covid-19 cu manera DIARIO a splica for di inicio di e siman cu ta termina, ta destrui e sistema mundial di Salud Publico y Cuido Medico.

    - Advertisement -

    DUNA COMENTARIO

    Please enter your comment!
    Please enter your name here