Home Politica “Unda nos ta bay y con ta crea perspectiva sembrando fe y...

“Unda nos ta bay y con ta crea perspectiva sembrando fe y speransa”

371
0
SHARE
- Advertisement -

Ex-Prome Minister Nelson Oduber:

ORANJESTAD (AAN): Ex-Prome Ministro Nelson Oduber, a bin ta analizando tur locual ta ser treci dilanti tocante Coronavirus, y esaki ta creando miedo, preocupacion, inseguridad y panico bao di nos pueblo.

Demasiado noticia negativo ta creando un situacion di impotencia como sifuera despues di e virus aki lo no tin economia, lo no tin trabao, ni entrada pa nos ningun. Cu e situacion ta dificil y cu salubridad publico, nos salud y proteccion mester tin tur prioridad ta un realidad cu mester atencion special, pero banda di yuda otro, cuida otro y salba bida nos mester percura con ta sigui despues.

“Mi ta realisa cu bringa un enemigo invisible ta hopi duro mes, unda cu placa no por cumpra nos salud, pero nos no por biba mañan sin dje.”

    Un economia dependiente di turismo:

E miedo di nos tur pa ser afecta cu e Corona Virus y e miedo pa muri tin nos tur practicamente paralisa. Economianan rond mundo lo conoce caidanan dramatico y te awe ningun experto por yuda pronostica con largo e pandemia aki lo por dura. Hecho ta cu ningun pais tabata prepara ni ekipa pa e enemigo aki. Cuanto tempo esaki lo por dura pa nos cu tin un economia asina dependiente di turismo? Ya caba ta sintiendo e efectonan dramatico di no ta drenta divisas ni pa gobierno ni entrada pa e comerciantenan y ni pa e trahadornan. Nos pais ta paralisa.

Como cu nos ta un isla, nos desaroyo ta depende 100% di nos Aeropuerto y nos haf pa trece entradanan pa nos economia. Nos bisiña mas cerca ta lama. Pa nos por importa mester ta hopi cauteloso cu locual nos tin actualmente na divisas cu mi ta kere cu sigur por wanta 3 of hasta 6 luna, pero un periodo mas largo lo ta devastador. Si mi mira con ainda ta gasta placa, segun mi nan no ta consciente kico ta warda nos.

   Gobierno ta trend setter den desaroyo:

Den tempo dificil gobierno ta trend setter pa tur caminda den nos desaroyo di infrastructura y nos desaroyo turistico. Alabes cu nos lo mester tin placa pa proyectonan, pa cuminsa haci e proceso mas cortico y ehecuta nan mesora. Hasta si mester duna incentivo esaki mester ta posibel pa pone nos economia cuminsa lora atrobe. Locual cu nos tur mester crea ta cu nos lo por sali afo, si nos ta mas solidario pa cuida nos mes y otronan.

Mientras Corona Virus tin nos tur yena cu preocupacion con nos tin cu sigui, ainda tin politiconan ta perdiendo tempo cu un contrato moribundo firma cu un compania spirito sin placa y cu nan a biba riba nos custia pa ni a ‘idle’ e refineria. Cera e capitulo mahos aki y ban busca otro cos, manera uso di e terminal, reef berth, tankinan na un momento cu si tin negoshi pa almacena petroleo.

Mester cuminsa biba cu e realidad:

E riesgo di por ser contamina cu e virus mester ser kita. Ban yuda baha e cantidad di hendenan afecta y keda cuida nos mes mas tanto posibel. E noticianan rond mundo ta creando mucho miedo cerca esunnan cu tin trabao riba kico lo tin mañan pa nan, cu no lo tin trabao of si por tin un carera profesional ainda pa nan.

E comerciante, si e ta sobrevivi e periodo aki? Nos hobennan cu tin casi 2 luna sin bay scol, con nos ta motiva nan cu nan mester sigui studia y con ta kita e preocupacion cu mañan lo no tin casi nada mas pa nan. Mester keda motiva nan cu sigui studia ta un medio casi imperativo pa subi e trapi den bida.

    Conocemento tambe tin su balor economico:

Nos ta yegando un momento cu mester cuminsa biba cu e realidad cu nos tin un pandemia cu lo por afecta nos pais mas ainda, pero fuera di protega, cuida nos pueblo, mester cuminsa motiva nos hendenan pa ban bati cabes hunto con lo por sali afo.

Si no tin sentido comun di responsabildad y solidarismo nos lo por pasa den hopi dificultad.

Ta den nos tur nos man con ta sali afo y crea perspectiva cu despues di e virus aki lo tin e mañan pa nos tur.

- Advertisement -

DUNA COMENTARIO

Please enter your comment!
Please enter your name here