Home Editorial Un mundo den angustia ta reconoce e balor di hende y trabou

Un mundo den angustia ta reconoce e balor di hende y trabou

87
0
SHARE
- Advertisement -

Editorial

2020 lo drenta historia mundial como un aña cu a paralisa mundo y a crea e angustia mas grandi di ultimo siglo den tempo di paz mundial.

E observacion di Dia di Trabou cu na hopi pais ta wordo celebra dia Prome di Mei, awe ta topa cu un Aruba seriamente afecta pa e coronavirus nobo, cu a destrui e base esencial di bienestar di hende. Felicidad di hende ta mara na un condicion di salud cu ta permiti hende hiba un bida aceptabel y e posibilidad pa un hende por desaroya su mes y percura pa mantencion di su bida diario.

Den un solo golpi, COVID-19 a deshaci di e base mundial economico y tur planificacion humano pa awe y pa futuro.

Mundo a cuminsa drenta e etapa cu tabata prepara pa un epoca, cu hende lo a wordo reemplasa pa robot.

Na final di 2019, DIARIO a publica rapportnan cu tabata mustra e perspectivanan den cual hende lo a perde e prome luga den produccion economico y futuro di hende como lider real di sucesonan mundial y e balor di trabou humano, tabata wordo cuestiona.

Awe un mundo paralisa pa un malesa cu a surpasa efectonan di terorismo, den su angustia y dolor mester bolbe acepta e balor y dignidad di hende y trabou.

Ta keda demostra cu sin hende no tin trabou pero tambe cu sin trabou no tin hende cu ta disfruta di bienestar.

Produccion di cuminda cu hende mester pa alimenta su mes ta den problema serio pasobra no tin hende pa tene e proceso bibo. Sector di turismo a wordo destrui pasobra no tin hende pa brinda servicio na hende, cu ta origen di un parti importante di nos economia.

E poder di petroleo a cay. E producto cu a provoca guera, cu a wordo yama oro preto, ta den crisis. Hende no ta cumpra petroleo cerca e productornan cu ta hende cu ta traha den nan negoshi cu ta parti di economia.

Mundo ta den un crisis pasobra companianan importante cu ta produci cupo di trabou, a bira un problema financiero pa nan doñonan cu como hende mester di nan entrada como trahado pa por pone e negoshinan funciona.

E agricultor independiente, e bankero, e gobernante, e maestro, e piloto di avion, e dokter, e pashent, e turista y e trahado den sector turistico tur ta topa otro como hende den e pregunta serio con nan mester enfrenta un futuro cu e coronavirus nobo a saca for di man di hende.

Den e situacion aki, ningun ekipo electronico tin e contesta. Sistemanan di computer ta produci cifra y informacion. E hende creativo mester dicidi kico e ta haci cu tur e informacionnan cu manera un puzzel ta wordo entrega diariamente.

Dia Prome di Mei 2020 ta bira un dia importante. Un dia pa nos profundisa nos mes den e balor di hende y balor di trabou, cu ta e motibo cu nos mundo ta funciona.

Laga nos tur mira otro como trahado, cada uno cu su tarea pa pone un comunidad funciona na bienestar di hende.

Un mundo nobo, un Aruba nobo ta spera nos. Hende y trabou lo determina con e futuro aki lo ta.

- Advertisement -

DUNA COMENTARIO

Please enter your comment!
Please enter your name here