Home Labor “Un hefe no por impone unilateralmente cambionan negativo pa loke ta condicionnan...

“Un hefe no por impone unilateralmente cambionan negativo pa loke ta condicionnan di trabao di e trahador”

4865
0
SHARE
- Advertisement -

Director di Departamento di Labor:

ORANJESTAD (AAN): Director di Departamento di Labor  Franklin Kock recientemente a papia cu DIARIO riba e fondo di ayudo cu Minister di Labor Glenbert Croes a introduci.

El a splica cu tin hopi inkietud bao di trahadornan tambe.

“Mi ta haya hopi bon cu Gobierno tur dia 2’or y 7’or ta duna un conferencia di prensa pa tene pueblo na altura di e situacion rond di Coronavirus”.

“Eynan mi ta wak diferente pregunta riba e parti laboral, mirando sigur cu el a paraliza nos economia”.

“Negoshinan a cera of ta cerando, pues e trahador tambe ta wordo afecta”.

“Pesey Minister Croes a instala e fondo FASE, pa yuda trahadornan cu bin den problemanan financiero door di e situacion actual”, segun Kock.

El a sigui bisa cu pa bo bin na remarke pa FASE bo mester  bay atras den bo situacion financiero y cu esaki mester tin di haber cu e situacion di Coronavirus.

Segun Kock, banda di esaki bo salario mester a cay bao di 950 florin pa luna.

“Gobierno ta suplementa e diferencia te cu 950 florin”.

“E mandatario a calcula cu mitad di nos forza laboral ta wordo afecta pa e situacion, esta 25.000”.

“Ya caba nos tin 5mil peticion pa e fondo aki y por lo pronto e plan ta pa Gobierno yuda pa e lunanan di April, Mei y Juni, despues di cual lo evalua con ta bay sigui”, segun Kock, kende ta parti di e comision di evaluacion tambe.

El a sigui bisa cu por lo pronto e ayudo ta pa 3 luna so y e speranza ta cu e crisis lo dura 3 luna so.

“Despues mester evalua con ta sigui yuda”, segun Kock.

El a indica cu e ayudo ta tambe pa e dunador di trabao, via un plan separa.

Esey ta bay ta via Minister di Asuntonan Economico.

“Naturalmente e pensamento di Gobierno ta pa e trahadornan keda mas tanto possible na trabao y no wordo retira”.

“E kier tambe pa e trahadornan keda cu tur nan beneficionan, pero nos tur sa cu na e momentonan aki e situacion ta hopi dificil”, segun Kock, kende a sigui bisa cu bo por verwacht cu companianan ta bay corta den ora y sueldo di trahadornan.

Tin cu ta obliga nan empleadonan pa bay cu vakantie y porta na cierto momento ta bisa nan pa keda cas sin wordo paga. Wardando asina pa wak si e situacion ta bay drecha.

“Gobierno kier yuda suaviza e dolor financiero tanten cu por. Tin hopi peticion mes di parti di tanto trahador, pero tambe di dunadornan di trabao”.

“Pa bo haci bo peticion ta hopi simple, esta bo tin cu entrega bo ID, bo payslip, carta di notificacion di bo hefe”, segun Kock, kende a sigui bisa cu commission FASE ta duna conseho si mester paga of no paga e persona e 950 florin pa luna.

E placa mes ta den man di Departamento di Asuntonan Social.

Kock a sigui bisa cu ta importante pa companianan di utilidad, banco etc. tambe tene cuenta cu nan tambe tin cu coopera.

“Pesey Gobierno a pidi tur hende pa yuda, pasobra tur hende mester yuda tur, pa nos individualmente sobrevivi e periodo aki”.

“Gobierno a yuda cu placa y awor ta spera pa e dunadornan di trabao trata nan trahadornan nechi y ta evita retiro mas hopi possible”, segun Kock.

Un parti importante cu Kock a menciona tambe ta cu un hefe no por impone unilateralmente cambionan negativo pa loke ta condicionnan di trabao di e trahador.

“Ni den e temporada di crisis bo por haci esaki, pues si bo kier yega na acuerdonan pa afecta negativamente e condicionnan di trabao di e trahador, bo mester hacie den consulta cune”, segun Kock.

- Advertisement -

DUNA COMENTARIO

Please enter your comment!
Please enter your name here