Home General Un fayo den comunicacion a pone e pashent Martijn keda sin transporte

Un fayo den comunicacion a pone e pashent Martijn keda sin transporte

213
0
SHARE
- Advertisement -

ORANJESTAD (AAN): Tabata Diadomingo atardi laat cu pueblo a keda disgusta pa mira con un pashent di Coronavirus cu a bay Hospital pa un check-up, na final no a haya ningun instancia pa yude bay bek cas.

Para pafo di tereno di Hospital, el a splica cu tur su famia ta den cuarentena, y pa tal motibo ningun di nan por buske.  Lo mas tristo ta cu no por haya ni Ambulance tampoco pa yude bay cas.

Un forma of otro, e protocol existente a pega na un forma mahos, y e ciudadano aki di Rooi Koochi a keda atras.  Te na final, ta un Docter local y un amigo mas a bin dune yudanza, y cu nan vehiculo personal mes a hibe pa su cas.

Tur e bunita imagen cu DVG tabatin ultimo simannan, a haya un cara diferente den bista di pueblo.  Ciudadanonan no ta compronde con DVG por laga un pashent asina na caya.  Esey kiermeen cu futuro pashentnan tambe lo ta core riesgo di keda asina benta un banda.

Segun Dr. Deepu Daryanani di Servicio di Emergencia na Hospital, tur loke a pasa ta un ‘falta di comunicacin’.  DVG tambe ta comparti e pensamento ey, y ta garantiza cu algo asina lo no bolbe ripiti na Aruba.

Durante conferencia di prensa di Gobierno, Dr. Daryanani a bisa cu na Hospital nan ta haciendo lo maximo pa e pashentnan di Covid-19, y pesey tin protocol poni.  El a bisa cu ora un pashent di Covid-19 yega Hospital via Ambulans of cu transporte personal, nan ta wordo mira den un di e 13 cambernan di isolacion, pues nan ta wordo mira, trata, y ta haya indicacion si nan ta keda of no.  Si acaso nan wordo interna, ta logico cu lo no tin problema.

Diadomingo merdia, e pashent cu ta biba na Rooi Koochi a wordo mira den camber di isolacion door di e Docter na Warda.  E pashent tabatin keho di halamento di rosea.  Despues di esey, Docter di Servicio di Emergencia a comunica cu e Specialista na Warda pa delibera, y na final a dicidi cu e pashent no tin indicacion pa e wordo hospitaliza.

Pues nan a bisa e Pashent cu e por bay cas, y ta haya un receta pa busca remedi, y ta haya conseho kico e por haci na cas.

Asina e pashent ta haya un escogencia, esta cu e por keda den e camber ey wardando te ora cu un hende bin buske, of si e kier e por bay sinta pafo (no den Wachtkamer), y e ta haya un mascara pa sinta pafo.  Segun Dr. Daryanani, e pashent di Rooi Koochi a escoge pa bay sinta pafo.  Esnan di Eerste  Hulp a  haci tur cos pa e bay sinta pafo.

Di e forma ey, personal di Servicio di Emergencia a deduci cu e mes ta bay cas, y e pashent a insisti cu e mes ta regla transporte.

Despues diripiente Eerste Hulp a cuminza ricibi yamada di famianan, cu ta cuestiona con ta posible cu nan ta laga e pashent bay sinta pafo.  E ora personal di Emergencia a bay pafo y nan a keda sorprendi cu e ta eynan ainda.  A bolbe check su signonan vital y e ta bon.  El a bolbe bisa cu e ta reglando algo pero dado momento e no por a regla nada mas.

Esaki ta unda cu e concernacion a lanta.  Esnan di Eerste Hulp a ofrece pa yuda, y nan a yama Rode Kruis Aruba, a yama Lite Life Medicab, y tambe Servicio di Ambulance, pero no a haya ningun pa bin busca e pashent.

Na final a yama DVG, y e Departamento aki a bisa cu nan si lo tuma over.

Pero pa e ora ey, ya caba e pashent a papia cu prensa te cu el a ricibi yudanza pa haya transporte pa su cas.

Na opinion di Dr. Daryanani, un fayo den comunicacion entre e pashent, su famia, y Servicio di Emergencia, a pone cu e sucedido di Diadomingo atardi a sali for di man.

Pero toch e protocol valido ta hopi claro: Si un pashent ta cla pa bay cas, e por keda paden warda famia pa bin buske, of si acaso e no tin hende debi cu famia ta den cuarentena, e ora tin di yama DVG, y nan tin forma corecto pa bin buske na Hospital y hibe cas.

 

 

- Advertisement -

DUNA COMENTARIO

Please enter your comment!
Please enter your name here