Home Policial Solamente 8 persona a keda deteni durante Toque de Queda #10

Solamente 8 persona a keda deteni durante Toque de Queda #10

355
0
SHARE
- Advertisement -

ORANJESTAD (AAN): Ta parce cu despues di 10 dia, porfin publico a cuminza realiza cu e asunto di Toque de Queda ta serio, necesario, y no ta cos di haci wega cune!

Un ciudadano a splica na DIARIO, cu e ta kere cu desde cu a start cu e Shelter-in-Place na Aruba, e ora mas hende a bin realiza cu pa bo mesun salud, y pa salud di bo sernan keri, bo tin di keda na bo cas.

Y e realizacion aki a desemboca tanto Diadomingo anochi y tambe Dialuna anochi den menos hende cu a tribi di subi caya sin cu nan tin autorizacion of un motibo valido pa esey.

Diadomingo anochi e cantidad di persona cu a subi caya toch y keda deteni pa Polis tabata 16 persona.  Riba Dialuna anochi, el a bira menos!  Solamente 8 persona a keda deteni ora cu nan a wordo haya riba caya sin ningun motibo valido.

A dura como 10 dia, y ta mustra cu porfin tur hende a cuminza compronde e esencia di e plan aki pa mitiga e brote di Coronavirus Covid-19.  Ban sigui asina!  Solamente esnan cu ta bayendo Hospital, Botica, of ta sali/regresa di nan trabao di warda (cu permiso), por ta riba caya.  E resto mester ta paden di cas cera.

Vocero Policial Lacle, a presenta tambe na e Conferencia di Prensa di Gobierno, unda el a purba splica e regla di mas importante di e Ministeriele Regeling number 43.

E vocero a bisa, cu e regla di mas importante ta cu ta prohibi pa un persona ta entre 9:00 pm pa 6:00 am di ta pafo di vivienda of cas of unda bo ta hospeda.  Esaki ta e parti mas duidelijk di e reglamento.

E anochi anterior, Vanessa Tjon-Kock a elabora tambe riba e reclamo di social media unda cu Polis a aresta un anciano na un forma brutal y hasta potret di e cabez herida na sanger a circula.

Tjon-Kock un biaha mas a recorda tur hende cu e Toque de Queda ta un medida severo, y cada ciudadano tin di cumpli cu e reglanan.  Durante un Toque de Queda NO ta existi ‘advertencia’.  Den Toque de Queda NO ta existi actuacion suave di Polis.  No ta intencion pa ningun Polis bay abusa di pueblo tampoco.

E ta duna elogio na tur esnan di KPA cu ta riesgando nan bida, di nan famia, cu chens di wordo infecta cu e virus.  Hopi first responders tin tarea dificil pa cumpli cu e leynan durante Toque de Queda.

Den e caso specifico di e anciano, segun Tjon-Kock autoridad pa dos biaha bisiñanan a yama kehando cu na e cas di e anciano aki di 70 aña tabatin musica duro tocando, y e volumen tabata molestia e bario.  E ora Polis a haya nan ta actua manera cu mester ta na e 1er biaha cu a bay na e cas.  Esaki casi semper ta finaliza cu e orden pa baha volumen di musica pa trankilidad keda restableci.

Pero e hecho cu Polis mester a regresa pa di 2ndo biaha na e mesun adres di molester di musica duro, ta comprendible cu nan lo actua contra e anciano.  Aki a dicidi cu ta bay aresta e anciano, pero e persona aki envez di a cumpli cu e orden, a dicidi na resisti pa cu su detencion.

Pues ta e mes a toca musica duro, y e mes no a cumpli cu orden y a hasta resisti pa su detencion.  Tjon-Kock a mustra cu na momento cu bo resisti pa detencion, Polis tin su procedimento y regla pa haci e momento ey.

Hefe Interino Tjon-Kock di Polis a confirma cu e Polisnan tabata autoriza pa detene e anciano e momento ey, y nan no a drenta cas pa aresta e persona.

- Advertisement -

DUNA COMENTARIO

Please enter your comment!
Please enter your name here