Home Gobierno Reunion extraordinario di Conseho di Ministro di Reino lo tin di continua...

Reunion extraordinario di Conseho di Ministro di Reino lo tin di continua pa trata asunto di ayudo financiero pa Aruba

56
0
SHARE
- Advertisement -

ORANJESTAD (AAN): Conseho di Ministro di Reino (RMR) den nan reunion di Diabierna 3 di april a papia riba diferente temanan cu ta regarda e crisis di e corona virus. Asina Minister Plenipotenciario sr. Guillfred Besaril a bisa despues di a sali for di e reunion.

Un di e temanan cu a keda trata ta esun cu ta toca salubridad publico. Segun e mandatario e situacion ta diferente pa cada isla y cu por ehempel na St. Maarten e nesesidad ta hopi mas grandi cu e otro islanan, pasobra St. Maarten ainda ta recuperando di e golpi basta grandi cu e isla a haya di dos horcan tres aña pasa.

Tambe den e reunion di RMR a papia riba ayudo militar y con esaki lo por bira efectivo na momento cu esaki bira necesario.

‘Papiando di actividad militar na nomber di pais Aruba mi a trece padilanti na minister di Defensa señora Ank Bijleveld e paso tuma pa Merca pa pone movecion militar den Caribe y kico esaki ta trece cune pa cu Caribe. Minister Bijleveld a keda di comunica cu e embahador di Merca na Hulanda pa asina nos tin un mihor bista kico e accion militar aki di parti di Merca ta nifica pa e resto di e region Caribense,’ asina minister Besaril a bisa.

Sr. Besaril a sigui bisa cu pa loke ta e region Caribense, Nacionnan Uni dos dia pasa a trece dilanti nan preocupacion pa loke ta e limitacionnan natural di e region cu tin un frontera di awa y cu nan ta mira tambe riba e poco recursonan di e islanan.

Na final minister Besaril a bisa cu a toca e tema cu ta esun importante pa loke ta pais Aruba. Minister Besaril: ‘No menos y mas importante cu e otro problemanan cu a keda trata, pero tambe un preocupacion enorme pa nos isla cual ta e aspecto financiero.

Riba esaki nos a palabra cu otro cu nos lo sigui e dianan aki den combersacion estrecho entre e diferente ministerionan di Finanzas pa asina aki otro siman nos cuminsa yega na decisionnan concreto kico ta bay ta e ayudo; con e ayudo aki ta bay tuma lugar y ki tur e ayudo financiero ta bay encera,’ segun declaracion di minister Besaril.

E mandatario a finalisa na bisa cu e corona virus aki ta toca tur sector den nos comunidad y cu e ta un guera contra un virus cu a pone mundo henter na rudia y awe mundo lo mester mira con ta lanta cabes y para riba nos pia back.

E potret ta cortesia di Cas di Aruba.

- Advertisement -

DUNA COMENTARIO

Please enter your comment!
Please enter your name here