Home Enseñanza Rector: Di hopi tempo Universidad di Aruba tabata preparando pa bay Online...

Rector: Di hopi tempo Universidad di Aruba tabata preparando pa bay Online y esaki a yuda awor bastante

167
0
SHARE
- Advertisement -

ORANJESTAD (AAN): E situacion actual a pone cu Universidad di Aruba a cera su porta, y di tal forma studiantenan no por sigui les durante e Crisis di Coronavirus.

E edificio ta keda cera por lo pronto.  Ta algun biaha pa siman so tin hende ta bay controla e edificio, e infrastructura, y ta check si tur e equipo di IT ta funcionando, y tambe ta check e.o. e clima y humedad den e Biblioteca cu tin hopi buki mes.

Rector Glenn Thodé a splica, cu e momento cu Gobierno a anuncia cu tur scol ta wordo cera, inmediatamente Universidad di Aruba a switch over y a bay pa dunamento di les for di distancia, esta via lesnan Online.

Pa puro suerte, di basta tempo caba Universidad tabata preparando pa esaki.  Varios docente a hasta sigui curso, y a haya sosten di University of South Carolina cu ta duna les online y tin hopi conocemento di e tecnicanan con pa haci e cambio di duna educacion for di den klas, pa un les online.  Pasobra tin tur triki con pa transforma e materia pa asina e bay online.

Bon mes cu mayoria di docente a sigui e curso, y pa tal motibo pa Universidad di Aruba e ‘paso’ pa switch na Online a bay hopi facil y sin problema.  Nan tin basta tempo caba e hermentnan online, pero e plataformanan aworaki ta pasando den un test mucho mas fuerte.

Aki Thodé a splica cu antes e docente ta haci ‘blended-learning’ of ta haci uso di e sistema di educacion online pa cana paralelo cu e lesnan den klas, awor mester a switch pa migra tur e educacion pa Online.

E ta pone un extra peso pa e docente y studiantenan, pero tambe pa e sistemanan.  Tin algun reto, pero toch Universidad ta satisfecho.  E reto di mas grandi ta cu e solucion aki ta uno high-tech, pues bo mester ta na un nivel halto caba cu bo tecnologia, tanto bo computernan mester opera e software bon, e speed tin di ta bon, specialmente si bo usa material audiovisual unda e video ta rekeri pa e computer por procesa esey bon, y tambe e conexion di Internet mester ta stabil y halto.  Y aki si ainda tin reto.

Algun docente debi na nan tecnologia na nan cas, y distancia for di switchstations, nan speed di Internet kizas no ta duna tur loke ta necesario pa e draai bon.  Tambe tin algun studiante cu ta biba den un situacion cu nan no ta yega na e nivel di hightech rekeri pa e bay smooth.  Esey kiermeen e ta tuma mas tempo pa nan.

Hecho ta cu Universidad di Aruba ta trata di reduci e impacto cu e crisis aki a trece, lo por stroba nan aña escolar.  E timing cu e studiantenan ta pasando aden pa haya les, Universidad tin esey programa ya full aña, y Rector Thodé ta djis spera cu e docente y studiantenan por sigui haya otro pa djis cana door di e programa.

E programanan cu tin stage, esey si ta un reto.  Si acaso un studiante ta core stage den accounting, etc., esey a bira un reto. Pasobra Hotelnan a shutdown.  Pues ainda tin di evalua con ta haci esey pa futuro.  Pues no ta tur cos Universidad di Aruba por bay online cune, pues algun cos toch tin di wordo posponi te ora cu cosnan normaliza.

- Advertisement -

DUNA COMENTARIO

Please enter your comment!
Please enter your name here