Home Parlamento Parlamentario Endy Croes ta desea pa habri Waf di Playa pa baha...

Parlamentario Endy Croes ta desea pa habri Waf di Playa pa baha prijs di comestible

1565
0
SHARE
- Advertisement -

ORANJESTAD (AAN): Parlamentario Endy Croes ta splica cu e crisis actual di Coronavirus a cambia mundo henter. Alaves e crisis actual ta percura pa nos bira mas creativo.

El a bisa cu Aruba ta para dilanti un cruzada hopi grandi. Un cruzada unda mas di 25 mil hende a perde trabao. Un momento pa cada conciudadano refleha den tur trankilidad poniendo man na curazon y puntra Bo mes con nos tur por aporta pa yuda nos prohimo y saca e pais aki dilanti.

Gobierno ta den un posicion pio cu nunka antes den historia di Aruba. Trabaonan duro ta worde haci tanto pa bringa e virus salvaguardiando comunidad y alaves  ta sondea e mihor manera y kizas e manera menos doloroso pa nos por sali for di e crisis aki economicamente.

Gobierno ta negoshando cu sindicatonan di empleadonan publico kendenan tin e deber moral pa aporta. Esaki ta conta pa tur desde Politico, Ministers, Parlamentario, Hefe di Departamento, Overheids N.V’s te na e ambtenaar.

Sano huicio, humildad, hermandad, solidarismo ta entre otro lokual mester prevalese den temponan dificil aki. Parlamentario Endy Croes ta sigui splika cu e tin confianza den henter e pueblo aki cu nos lo sa pa uni pa yuda otro den momentonan mas dificil.

    Cuminda mas barata:

Parlamentario Endy Croes ta ilustra cu den tempo di crisis nos mester por bira mas creativo. Momento un cantidad enorme di conciudadano perde trabao y nos economia ta plat pa motibo di corona virus unda a sera frontera y hotelnan ta bashi nos mester busca otro alternativa.

Banda di e efecto economico y e cantidad di hendenan cu a perde trabao empleadonan publico tambe lo bay ta entregando demostrando asina solidarismo sacando un man pa nos rumannan sin entrada. Ta e momento corecto pa nos percura pa alimentacion na prijs accesibel pa pueblo.

Di acuerdo cu informacion y un discusion publico di basta tempo ta refleha cu prijsnan pa trece container y gastonan mara na esaki cu ta paga ASTEC ( kende tin un monopolio riba Waf) ta causa cu prijsnan ta keda halto unda finalmente e prijs riba shelf na Supermercado no tin mucho espacio pa un reduccion.

Banda di e pensamento aki gobierno ta trahando duro pa kita e EU standard pa importadornan por trece galiña di Brasil y carni di Colombia no necesariamente mara na  EU standard na un prijs mucho mas abao cu awor. Pues creatividad y curashi di un Gobierno den crisis lo logra traha e brug bahando e prijs di comestibel pa pueblo.

    Waf na playa pa barconan di cuminda:

Ta momento husto y corecto pa e temporada di crisis mester por desvia di e contract di ASTEC. Parlamentario Endy Croes ta haci un suplica riba Gobierno pa permiti Barconan cu ta trece container di cuminda usa Waf na playa pa descarga comestibles.

Permiti comerciantenan importa containernan di cuminda  cu barconan “roll-on roll-off” usando Waf di playa sin gasto pa pueblo.  Pues no mester di grua “gantry” pa esey.  E barco ta djis yega, habri su gate y containernan por subi y baha cu trekker sin mester haci uso di ASTEC cu su tarifanan sofocante.

Esaki mester conduci cu productonan riba shelf na supermercado mester por baha cu minimo 15% pa pueblo. Haciendo e ehercicionan aki pueblo lo logra cruza e brug sobreviviendo  e temporada di corona virus na un manera husto cu prijsnan accesible pa comunidad.

Parlamentario Endy Croes ta kere den decisionnan drastico na fabor di pueblo lo contribui na bienestar general den e temponan aki.

 

- Advertisement -

DUNA COMENTARIO

Please enter your comment!
Please enter your name here