Home General International Labour Organization ta calcula cu desempleo mundial por hasta yega casi...

International Labour Organization ta calcula cu desempleo mundial por hasta yega casi 25 miyon hende

76
0
SHARE
- Advertisement -

ORANJESTAD (AAN): E asina yama International Labour Organization (ILO) cu sede na Suiza, ta calculando un aumento di desempleo mundial cu ta varia entre 5,3 miyon (caso ‘mas favorable’) te na 24.7 miyon (caso ‘menos favorable’), usando un referencia aki di 188 miyon di hende desemplea cu tabatin na 2019, y esaki como consecuencia di e pandemia di Covid-19.

Via e documento titula “Covid-19 and the world of work: Impacts and responses”, e organizacion internacional ta indica cu e perspectivanan economico y pa loke ta e cantidad y calidad di empleo ta empeorando na un ritmo hopi rapido.

ILO ta considera cu ta necesario pa politiconan na un forma rapido y coordina na escala mundial, bin cu medidanan di escala grandi, urgente, y bon coordina rond di tres pilar, esta pa proteha trahadornan na pia di trabao, stimula e economia y empleo, y sostene trabao y entradanan.

E medidanan aki ta inclui, extension di proteccion social, sostene retencion di empleo (e.o. cu trabao chikito, keda cas cu pago, demas subsidionan), y tambe alivio financiero y di impuesto, incluyendo empresanan chikito y mediano.  Ademas, e nota ta propone medidanan fiscal y di politica monetario, y tambe sosten di prestamo y financiero pa sectornan economico specifico.

   DIFERENTE SCENARIO:

Basa riba diferente scenario pa cu e impacto di Covid-19 riba crecimento global di GDP, aki ILO ta calcula cu un aumento den desempleo global di entre 5.3 miyon (scenario ‘abao’) y 24.7 miyon (scenario ‘halto’) for di un nivel basico di 188 miyon den 2019.  Comparando esey cu e crisis financiero global di 2008 y 2009, eynan desempleo mundial a subi cu 22 miyon.

Subempleo tambe ta wordo mira di lo bay subi riba scala grandi, como cu e consecuencianan economico di e brote di virus por nifica reduccion den oranan di trabao y salario.  Empleo propio na paisnan den desaroyo, cu tin biaha ta sirbi pa ta e bumper di e impacto di cambionan, kizas lo no bay haci esey e biaha aki debi na e restriccion di movimento di ciudadanonan y producto.

Caida den empleo por nifica tambe perdida grandi di entrada pa trahadornan.  E estudio ta calcula cu como US$ 860 biyon y US$ 3.4 triyon lo bay ta perdi den salario pa fin di 2020.  Esaki lo nifica caida den consumo di producto y servicio, y esey na su turno lo bay afecta e prospecto di negoshi y economianan.

Pobreza di trahador lo bay subi significantemente tambe, como cu e ‘presion riba entrada” debi na e caida di actividad economico lo devasta trahadornan cu ta cerca of bao di e liña di pobreza.  ILO ta calcula cu entre 8.8 y 35 miyon persona adicional lo bay cay den pobreza rond mundo, compara cu e calculo original di 2020 (cu a proyecta un caida di 14 miyon mundialmente).

“Esaki no ta djis un crisis global di salud, e ta tambe un crisis grandi pa mercado laboral y economia cu tin un impacto gigantesco riba hendenan,” ta loke e Director-General Guy Ryder di ILO a bisa.  “Na 2008, mundo a presenta un frente uni pa ataca e consecuencianan di e crisis financiero global, y asina a evita lo peor.  Nos mester awor di e tipo di liderato y solucion awor,” el a agrega.

ILO ta adverti cu cierto grupo lo bay ta afecta desproporcionalmente pa e crisis di empleo, cu lo bay aumenta desigualdad.  Esaki ta inclui hendenan den trabaonan di pago minimo y menos protehi, particularmente trahadornan hoben y di edad.  Muher y migrantenan tambe.  E ultimonan ta vulnerable debi na e falta di proteccion social y derechonan, y muhernan casi semper ta wordo sobre-representa den trabaonan di pago abao y sectornan afecta.

“Den temponan di crisis manera esun aki, nos tin dos herment principal cu por yuda mitiga e daño y restaura confianza publico.  Prome, tin di bin cu dialogo social, laga trahadornan participa y doñonan di trabao y nan representantenan, y esey ta vital pa trece bek confianza publico y sosten pa e medidanan necesario pa sobrepasa e crisis aki.  Na di dos lugar, standardnan internacional di labor ta suministra un fundacion confiable pa cambionan di politica cu ta enfoca riba un recuperacion cu ta sostenible y equitativo.  Tur cos mester wordo haci pa minimaliza e daño na hende na e momento dificil aki,” Ryder a conclui.

 

- Advertisement -

DUNA COMENTARIO

Please enter your comment!
Please enter your name here