Home Hudicial Hues a condena muher gara na aeropuerto cu mas di 4 kilo...

Hues a condena muher gara na aeropuerto cu mas di 4 kilo di cocaina na 16 luna di prison

222
0
SHARE
- Advertisement -

Teniendo cuenta cu e situacion di Coronavirus actual

ORANJESTAD (AAN)  – Den casonan penal por a constata cu tanto Fiscal como Hues ta tene debido cuenta cu e situacion actua di Coronavirus. Den un caso contra un dama kende a wordo gara na aeropuerto cu mas di 4 kilo di cocaina cu e kier a hiba Hulanda, envez di duna castigo completo, Fiscal a exigi un castigo combina o sea un parti condicional. Fiscal a bisa cu e ta haci asina pasobra e ta tene debido cuenta cu e situacion di Coronavirus. Hues a bay di acuerdo cu esaki.

BODYPACK CU MAS DI 4 KILO DI COCAINA

E dama C.M. dia 25 Januari 2020 a wordo gara na aeropuerto cu un lote di cocaina. Fiscal ta acusa C.M. di exporta cocaina. Miembronan di Douane a deteni C.M. na aeropuerto cu bodypack yen di cocaina y su intension tabata pa viaha pa Hulanda. E tabatin pakinan di cocaina na curpa. En total e pakinan aki a pisa 4207 gram di cocaina. C.M. a admiti na Polis cu e tabatin droga pega na su curpa.

Vida video conference, caminda e sospechoso ta na KIA, Hues na Corte, Fiscal na Ministerio Publico y e abogado na su oficina, e tratamento a tuma lugar. Hues a puntra C.M. pakico el a transporta e droga. C.M. a bisa cu door di situacion financiero dificil el a actua sin pensa. El a pidi Hues si e por haya castigo di trabaou pa comunidad pa asina e por ta cu su yiunan na e momento hopi tenso aki di Corona Virus. El a bisa cu e tin 4 yiu cu ta bou di 18 aña.

EXIGENCIA DI FISCAL

Fiscal a bisa cu e ta haya legalmente proba cu C.M. a exporta cocaina. C.M. tabatin plan pa viaha pa Hulanda cu e droga aki. Fiscal a bisa cu no tin raport di laboratorio pero si tin “field test”. E dama tabatin 6 paki na su curpa pega. Pa cu e castigo, Fiscal a bisa cu tin un maneho pa cu transportacion di cocaina. El a bisa cu e ta tene cuenta cu e situacion actual y a exigi 24 luna di prison di cual 8 luna ta condicional cu 2 aña di prueba. Pa cu e peticion di C.M., pa haci trabao pa comunidad, Fiscal a bisa cu mirando e seriedad di e caso, no tin lugar pa esaki. El a exigi tambe pa destrui e droga.

ABOGADO

C.M. su abogado, mr. Thielman, a bisa cu C.M. a transporta droga door di su yiu homber na Hulanda cu ta den un institucion. Mirando e circumstancianan, e abogado ta haya cu e exigencia di Fiscal ta mucho halto. E abogado a remarca cu ta riba dos paki di droga so a haci field test y ta 1600 gram. E ta haya cu mirando e situacion di Corona Virus, e yiunan ta sinti falta di nan mama. C.M. kier ta serca su yiunan pa proteha nan. E abogado a bisa cu den KIA. C.M. ta core peliger pa contagia cu e virus. E abogado a pidi Hues pa duna un castigo combina o sea un castigo igual na loke el a sinta caba den KIA y e otro parti condicional.

Fiscal a reacciona cu el a compronde anterior di abogado den caso pro forma cu no ta problema pa cu e raport di laboratorio pero awor e ta mira cu abogado ta cuestiona cu no tin raport. El a pidi cu si ta necesario, pa pospone e caso pa asina laga haci e raport di laboratorio. Fiscal a bisa cu e ta haya su exigencia na su lugar.

SENTENCIA

Hues a sera tratamento di caso y a bisa cu e ta dicta sentencia di biaha. Hues a bisa cu el a studia e caso anterior y a scucha bon kico abogado y e acusado a bisa y e ta haya cu e por dicta sentencia. Hues ta haya legalmente proba cu C.M. a transporta cocaina. Na opinion di Hues, e hecho cu e “field test” ta positivo, tabatin bodypack, esakinan ta suficiente prueba cu C.M. a exporta cocaina.

Hues a mustra cu lamentable Aruba tin hopi di haci cu traficacion di droga. Corte di Husticia tin puntonan di orientacion pa cu castigo pa cu exportacion di droga. Hues a bisa cu e ta haya cu e exigencia di Fiscal, 24 luna di prison ta e castigo standard pa e cantidad di cocaina cu C.M. a transporta. El a condena C.M. mescos cu Fiscal esta 24 luna di prison di cual 8 luna ta condicional cu un tempo di prueba di 2 aña. Hues a duna orden pa destrui e droga.

 

- Advertisement -

DUNA COMENTARIO

Please enter your comment!
Please enter your name here